Xalq mulki bo`lgan istirohat bog`idan o`zbek adibi G`afur G`ulom nomi yulib tashlanib, endi u "Dream Park" deb ataladi.
Yilda bir marta, bir kungina eslanadigan “O`zbek tili” bayrami o`tdi. Endi istagancha, uni yana toptashimiz mumkin.
Byudjet mablag`laridan moliyalashtirilayotgan yana qator tashkilotlar bu borada hozircha lom-mim degan emas. Davlat tili bo`yicha targ`ibot-tashviqot tadbirlarini o`tkazuvchi tashkilotlar ko`p-ku, ammo birortasi o`zining keskin pozisiyasini namoyon eta olayotgani yo`q. Orada necha yillik tarixiy nomni saqlab kelayotgan istirohat bog`ining nomi shunchaki supirib tashlanmoqda.
Kuni kecha katta-kichik anjumanlar o`tkazib, tilimizni ming maqomda maqtadik, she`rlar aytdik, amaldorlar maxsus buyruqlar berib adabiy kechalar, she`rxonligu va`zxonlik avjida bo`lgan tadbirlar o`tkazilishini ta`minladilar. Hozir esa, xalq tilida hamon «Mirzo Ulug`bek» deb ataluvchi, keyinchalik o`g`li amaldor bo`lgani uchunmi, nomi G`afur G`ulom sharafiga o`zgartirilgan bog` ajnabiy tildagi so`zlar bilan atala boshladi. Tadbirkor esa xorijda kompaniya ochgani bilan asli o`zbek.
Rost24.uz saytida qayta-qayta yoritilgan, salkam 4 yildan buyon ta`mirlanishda bo`lgan G`afur G`ulom bog`i va nihoyat qayta ochilishi xabar qilindi. Bog` endi "Dream Park" nomi ostida ish boshlaydi. Bu xabar bog` ochilishini uzoq kutgan aholini ham, senator va jurnalistlarni ham xursand qildi, bog`dagi xizmatlar ko`p yillik kutishlarni oqlaydi, degan umiddamiz.
Ma`lum qilinishicha, hozirda bog`ning test rejimida (yopiq holatda)gi faoliyati sinab ko`rilmoqda. O`rnatilgan uskunalar aholi xavfsizligi uchun qayta-qayta sinovlardan o`tkazilmoqda. Tozalash va tartibga keltirish ishlari olib borilmoqda.
Bog`ni qayta ochishga nihoyatda katta mablag` va kuch sarflangani ta`kidlanmoqda, hozircha bog`ga kirish ilgarigidek tekin bo`ladimi yoki «Tashkent siti»dagiga o`xshab har qadam pullik bo`ladimi, bu haqda xabar berilmagan. Davlat tiliga e`tibor qaratishga harakat qilinayotgan bir paytda bog`ning nomi uchun nega ajnabiy so`zlar tanlangani ham noma`lum, harqalay bunga sabab investorning «xorijiy» ekanligida bo`lsa kerak.
Shuningdek, attraksionlar ham to`liq xorijdan keltirilgani qayta qayta aytilmoqda, bu narxlar borasida biroz xavotir uyg`otsa ham, harqalay bog`ning ochilishi haqidagi xabar aholini xursand qilishi aniq.
Bog` haqidagi maqolalar:
ESLATIB O`TAMIZ: BOG` HALI OChILMAGAN! Faqat test rejimida ishlatib, suratlarini tarqatishdi. Biroq ko`rib turganingizdek, “Bog` ochildi”, degan xabar ham yolg`on bo`lib chiqayotganga o`xshaydi. Bu haqda yana saytimizda xabar e`lon qilamiz.
УЗ
