Olis hududlardagi maktablarda ishlayotgan o`qituvchilarga boshlang`ich yordam va ijara puli to`lovida uzilishlar bo`lganda Xalq ta`limi vazirligiga murojaat etishlari so`raladi.
Rost24 nashri tomonidan olis hududlarda joylashgan boshqa hududlardan kelib faoliyat yuritayotgan pedagog xodimlarga belgilangan maxsus qo`shimcha to`lovlar to`lanmayotganligi yuzasidan maqola e`lon qilindi.
Bugungi kunda O`zbekiston Respublikasi Prezidentining joriy yil 11 yanvardagi PQ-4940-sonli qaroriga muvofiq:
- ta`lim sifati yuqori bo`lmagan ta`lim muassasalarida boshqa hududlardan kelib ishlayotgan o`qituvchilarga respublika byudjeti hisobidan 100 va 50 foizlik qo`shimcha ustamalar;
- olis va chekka hududlardagi ta`lim muassasalarida boshqa hududlardan kelib ishlayotgan o`qituvchilarga mahalliy byudjetlar hisobidan bir martalik boshlang`ich yordam puli va uy-joylarni ijaraga olganlik uchun har oylik pul kompensasiya to`lovlari to`lab kelinmoqda.
Biroq, Xalq ta`limi vazirligi tomonidan mazkur maqolada ko`tarilgan masala yuzasidan holatlar manzilli o`rganilganda haqiqatdan ham ayrim pedagog xodimlarga bir martalik boshlang`ich yordam puli va uy-joylarni ijaraga olganlik uchun har oylik pul kompensasiya to`lovlarida uzilish holatlariga yo`l qo`yilganligi aniqlandi.
Ayni damda aniqlangan holatlar vazirlik tomonidan nazoratga olingan bo`lib, ularni bartaraf etish bo`yicha tezkor choralar ko`rilmoqda. Shuningdek, shu kabi holatlarni zudlik bilan hal etish hamda kelgusida yo`l qo`ymaslik yuzasidan hududiy xalq ta`limi bo`linmalariga topshiriqlar berildi.
Olis va chekka hududlardagi maktablarda boshqa hududlardan kelib ishlayotgan o`qituvchilardan O`zbekiston Respublikasi Prezidentining joriy yil 11 yanvardagi PQ-4940-sonli qarorida belgilangan qo`shimcha to`lovlarni joylarda turli bahonalar bilan amalga oshirilmayotganlik holatlariga duch kelayotgan bo`lsa, har bir murojaatni Vazirlik tomonidan manzilli o`rganilib, echish maqsadida vazirlikning 71-202-09-09 raqamiga murojaat qilishlarini so`rab qolamiz.
Shuningdek, Rost24 axborot saytiga ushbu muammoni ko`tarib chiqqani uchun minnatdorlik bildiramiz.
УЗ
-middle.jpg)
