Bir qancha vaqt avval Rost24.uz nashri taniqli turkolog olim, Michigan davlat universiteti professori — Temur Xo`ja o`g`lining hukumatga ochiq murojaatini yoritgan edi.
Olim o`z murojaatida otasining Buxorodagi tarixiy xonadoni mehmonxona sifatida ish boshlaganidan noroziligini bildirgan va bu borada O`zbekiston rasmiylaridan yordam so`ragan.
Ma`lumot uchun, uning otasi Usmon Xo`ja Po`latxo`jaev - Buxoro Xalq Respublikasining birinchi rahbari va ilk jadid maktablarining asoschisi edi.
Shuningdek, murojaat matni keltirilgan maqolada Temur Xo`ja o`g`lining turkiy olamdagi ilmiy faoliyati keng yoritib berilgan, tarixiy obidaning oyoq osti qilingani esa tanqid ostiga olingan edi.
Mazkur maqola e`lon qilingach, yillar davomida e`tibor qaratilmay kelayotgan jarayon hukumat rasmiylarining e`tiboriga tushdi.
Yaqinda olim O`zbekiston hukumatining favqulodda taklifi bilan mamlakatimizda bo`ldi.
Xususan, kuni kecha Temur Xo`ja o`g`li va Prezident Administrasiyasi Ijro etuvchi apparatining Kommunikasiyalar va axborot siyosati bo`yicha sho``ba mudiri Saida Mirziyoeva hamda Administrasiya rahbarining o`rinbosari Komil Allamjonovlar o`rtasida samimiy uchrashuv bo`lib o`tdi.
Saida Mirziyoeva uchrashuv haqidagi taassurotlari quyidagicha ifodalagan:
"Kecha turkiyalik tarixchi, siyosatshunos, jadidlar harakati va ularning konstitusiyaviy g`oyalari tadqiqotchisi, Buxoro Xalq Respublikasi etakchilaridan biri bo`lgan Usmon Xo`ja o`g`lining zurriyoti Temur Xo`ja o`g`li bilan nihoyatda maroqli uchrashuv o`tkazdik.
Suhbat chog`ida jadidlik mohiyatini ochib beruvchi qo`shma loyihalarni amalga oshirish bo`yicha g`oyalar tug`ildi.
Darvoqe, uchrashuvimiz Mass-media fondida o`tganining o`zi ham ramziy ma`noga ega, chunki ushbu tuzilmaning faoliyati, birinchi navbatda, ta`lim berish va salohiyatni oshirishga qaratilgan.
Professor Xo`ja o`g`li jadidlarga bag`ishlangan qator kitob va maqolalar muallifi va muharriri, shu jumladan, "Kommunizmdan keyingi Evroosiyoda gender siyosati" kitobidagi "O`tmish muqaddimami? Musulmon Markaziy Osiyosining tobe, itoatkor ayoli haqidagi afsonaga raddiya" bobi muallifidir".
Ma`lumot uchun, Rost24.uz nashri avvalroq, Temur Xo`janing amakisi - Fayzulla Xo`jaevning uy muzeyiga uning nomi qaytarilishiga ham sababchi bo`lgandi.
Maftuna Karimova,
jurnalist
УЗ
