Олий Мажлис Сенати раиси Танзила Норбоеванинг “жим туриш” ёки “қўрқоқлик” дипломатияси ҳақида
Хабарингиз бор, Россия Федерал мажлиси Федерация кенгаши раиси, МДҲ Парламентлараро ассамблеяси кенгаши раиси Валентина Матвиенко Ўзбекистон Олий Мажлиси Сенати раиси Танзила Норбоевани «Дўстлик» ордени билан тақдирлади.
Сенатимиз раиси Россия ҳукуматининг мазкур мукофотини қабул қилиб олиш жараёнида орден учун миннатдорлик билдириб, жумладан, «Бу мен учун катта шараф. Россия президенти Владимир Путинга самимий миннатдорлик сўзларимни билдирмоқчиман ва ушбу орденни, албатта, оқлаймиз», деди.
Танзила Норбоеванинг “албатта оқлаймиз”, деган фикрлари кенг жамоатчиликда норозилик кайфиятини уйғотди. Бироқ журналистлар ва жамоатчиликнинг “Нега шу сўзларни айтди”, мазмунидаги сўровларига қарамай Сенат раиси “айтган сўзлари” учун ҳозиргача на ўзи ва на Сенатдаги ваколатли шахслар ҳеч бир изоҳ, муносабат билдиргани йўқ.
Бу қўрқоқликми ёки жим туриш дипломатияси?
Жамоатчилик томонидан Танзила Норбоеванинг ўзга давлат ҳукумати вакилидан мукофот олатуриб, “оқлаймиз” деган сўзларни айтиши Ўзбекистоннинг сувиренитети, дахсизлигига нисбатан ҳақорат сифатида қабул қилинмоқда.
Ўзбекистон Республикаси Конститутциясининг 30-моддасига кўра, мансабдор шахслар фуқароларнинг манфаатларига дахлдор масалалар юзасидан ахборот беришга мажбур. Аммо, Ўзбекистонда Президентдан кейинги иккинчи шахс бўлган сенатор Танзила Норбоева жамоатчилик талаби ва қатор оммавий ахборот воситалардаги танқидий чиқишларга қарамай “чурқ” этгани йўқ. Ҳукумат вакилларининг жамоатчилик, ОАВи талабларига нисбатан бефарқ бўлиши демократик принципларга зид ҳисобланади.
Эслатма, Ўзбекистон Республикаси Олий Мажлисининг Сенати тўғрисидаги Қонунда Сенатни тарқатиб юбориш мумкинлиги ҳам назарда тутилган.
УЗ
