Poytaxtning ikki sektor rahbari haqiqiy muammolar makoniga borib o`rganishdi.
4 dekabr kuni Toshkent shahar prokurori Ulug`bek Qosimov va IIBB boshlig`i Aziz Toshpo`latov Prezidentning “O`zbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlar to`g`risida”gi farmoni ijrosini ta`minlash uchun jinoyatchilik o`chog`iga aylangan joylarga borishdi.
Poytaxtning ikki sektor rahbari “Qo`yliq dehqon bozori” AJ va “Kompass” savdo majmuasi va “Ippodrom” deb ataluvchi savdo majmualari atrofiga borib hududlarning jinoyatchilik o`chog`ini o`rganishgan.
Rost24.uz sayti ushbu bozorlar atrofidagi joylardan “dolya” undiruvchilar muammosini bir necha bor ko`tarib chiqqan edi.
“Toshkent bozorlari atrofidagi tartibsizliklar”, “OGOHLIK QO`NG`IROG`I: Bozorlar boshqaruvi davlatdan "ko`cha" qo`liga o`tib ketmoqda” sarlavhalari bilan tanqidiy maqolalar e`lon qilingan.
Unda “Prezident topshirig`i ham bajarilmaydigan davrlar boshlandimi?”, “Birgina bozor atrofidan har oy tushayotgan 90 ming AQSh dollari qayga ketmoqda?” kabi savollar ham o`rtaga tashlanib, asl jinoyat o`choqlari haqida ogohlantirish signallari berilgan edi.
Maqolalarda aholi gavjum bozorlar atrofidagi katta yo`l atroflari noqonuniy sotuvchilar egallab olingani aytilgan. Hattoki, qo`lbola chodirlar qurib olgani ham ko`rsatilgan edi. Sotuvchilar “bizga bu erni berishgan” degan iddoalarni ham qilishgan. Ushbu muammolarga mas`ul shaxslardan “yoymachi”lar tepasida turgan tashkilotchilarni bartaraf etishni bir necha bor saytimiz orqali so`ragan edik.
Guvohi bo`lganingizdek, Toshkent shahar prokurori va IIBB boshlig`i asl muammoning makonlarini ko`zdan kechirishgan.
Umid qilamizki, Prezident topshiriqlari amalda ham bajarilib bozorlar atrofidagi "dolya"chilar bartaraf etiladi.
Bu bozorlar atrofidagi muammo haqiqatdan ham rahbarlarni cho`chitadigan darajada katta. Ammo buni hozirdanoq bartaraf etmasa, vaqt o`tgan sari yiriklashib boraverishi aniq.
Boltani muammoning shoxlariga emas, asl ildiziga urish lozim…
УЗ
-middle.jpg)