Prezident Shavkat Mirziyoev Shayxontohur tumaniga tashrifi davomida shahar IIBB boshlig`i hamda shahar prokurori faoliyatini keskin tanqid ostiga oldi.
«Toshkentdagi jinoyatchilik bo`yicha vaziyatni men aytmay, sizlar eshitmang. Jinoyatchilar orasida «soliqchilar» paydo bo`ldi hozir. Ular bozorlardan soliq undirishyapti, davlatdan alohida soliq oladigan guruhlar paydo bo`lgan. Men er tagida ilon qimirlasa bilaman. Biz bundaylarni darhol jilovlashimiz kerak, jilovlaymiz ham», dedi Prezident.
Rost24.uz sayti ham 10 kun oldin aynan shu mavzuda tanqidiy mavzu tayyorlagan edi.
Unda poytaxtdagi zamonaviy bozorlarimiz atrofi yoyma bozorlarga to`lib borayotgani, valyuta ayriboshlashdagi qora bozor yo`qolgandan so`ng valyuta bozoridagi katta daromad qilib o`rgangan xotinlar endi eng gavjum bozorlarning atrofiga egalik qilishga o`tishgani, hattoki, yo`l atroflarini egallab ijaraga berishni ham boshlab yuborayotgani tilga olingan. Bularning ortida turganlarga chora ko`rilishi lozimligi ham aytib o`tilgan edi.
Shavkat Mirziyoev tanqididan so`ng Rost24.uz axborot sayti "Toshkent savdo markazi" ma`muriyatidan munosabat so`radi.
"Toshkent savdo markazi" ma`muriyatining bildirishicha, bozorlar atrofidagi yoymachilarni tartibga solish bo`yicha o`tkazilayotgan chora-tadbirlarga tomoshabin bo`lmasdan o`z hissasini qo`shayotgan ekan. Jumladan, yangi qurilgan "Toshkent savdo markazi"ning pastki qavatidan 6 oyga tekin turish imtiyozi bilan 600 ga yaqin joy ajratishgan ekan.
Shavkat Mirziyoev Toshkent shahar IIBBning faoliyatini bejizga tanqid ostiga olmadi. Bu tizim bugungi kunda jinoyatchilikka qarshi kurashishni biroz susaytirgan desak ham xato qilmagan bo`lamiz. Chunki Ichki ishlar xodimlari jinoyatchilik bir chetda qolib muammoni ko`tarib chiqqan jurnalist va blogerlarning ovozini o`chirish bilan ovora bo`lib qolmoqda. Bu borada ayniqsa, hokim va prokurorlarning topshirig`ini sidqidildan bajarib kelmoqda desak ham mubolag`a bo`lmasov...