Korrupsiyada ayblanib, rasmiy qidiruvga berilgan tuman sudi raisi aniqlandi.
Korrupsiyaga qarshi kurashish agentligi hamda Davlat xavfsizlik xizmati bilan hamkorlikda o`tkazilgan tezkor tadbirda pora olayotgan advokat qo`lga olindi, deyiladi Antikorrupsiya agentligining rasmiy saytida.
Advokat “N.P” fuqarodan Do`stlik tuman sudidagi tanishlari orqali engil jazo turini qo`llashni va`da qilib, 11.200 AQSh dollari olgan.
Olib borilgan surishtiruvlar davomida advokat olgan summaning 1.200 AQSh dollarini sud va tibbiy ekspertiza viloyat bo`linmasi xodimiga, 10.000 AQSh dollarini esa tuman sudidagi tanishlariga berishni rejalashtirganligi aniqlangan.
Hozirda Jizzax viloyati prokuraturasi tomonidan advokat va uning jinoiy sheriklariga nisbatan jinoyat ishi qo`zg`atilgan.
Rost24.uz sayti ikki kun oldin "Korrupsiyada ayblangani aytilayotgan sud raisi yo`qolib qoldi. Rasmiy qidiruvga berildimi?" nomli maqola e`lon qilgan edi.
Unda Jizzax viloyatidagi tuman sudlaridan birining sobiq raisi qidiruvga berilgani aytilgan. Bu ma`lumotni aniqlashtirish uchun Sudyalar oliy kengashi matbuot kotibi Tursunali Akbarov va Bosh prokuratura matbuot xizmati rahbari Hayot Shamsutdinovdan izoh so`ralgan.
Tursunali Akbarov “Siz aytayotgan tuman sudining sobiq raisi faoliyatidagi jiddiy kamchiliklari uchun bir necha oy avval vazifasidan ozod etilgan. Unga nisbatan jinoyat ishi qo`zg`atilgan-qo`zg`atilmagani haqida ma`lumotga ega emasman”, deya javob qaytargan.
Bosh prokuratura matbuot xizmati rahbari Hayot Shamsutdinov esa Rost24.uz ning bir necha bor yuborgan so`rovini javobsiz qoldirgan.
Taajjubli tomoni shuki, koorusiyada ayblanib qidiruvga berilgan sud raisi haqidagi ma`lumotni matbuot kotiblari bor-yo`g`i ikki kun “berkita olishdi”, xolos. Ular oshkor qilishni (? )istamagan ma`lumot esa Korrupsiyaga qarshi kurashish agentligining rasmiy saytida oshkora e`lon qilindi.
Darvoqe, agentlik tarqatgan xabarda nomi mavhum tuman sudiga aniqlik kiritilgan: Do`stlik tumani! Garchi xabarda sud raisi haqida hech narsa deyilmagan bo`lsa-da, gap u haqda ketayotganini bilish qiyin emas.
Joriy yilning 31 may kuni AOKAda bo`lib o`tgan matbuot anjumanida Sudyalar oliy kengashi matbuot kotibi T. Akbarov bu yil tizimda birorta korrusion holat aniqlanmagani haqida bayonot bergandi. Jizzaxdagi voqea esa buning aksini ko`rsatmoqda...
УЗ
