Poytaxt bosh rejasini eplamagan amaldor bugun Toshkent viloyatida hokimlik qilmoqda

 YoXUD 4 yil ichida 4 marotaba lavozimi almashgan amaldor

Bir necha bor tanqid ostiga olingan, o`ziga yuklatilgan vazifalarni bajara olmagani uchun yuqori lavozimlardan ishdan bo`shatilgan, bugun esa yana e`tiborli mansabga — Toshkent viloyati hokimi darajasiga ko`tarilgan Davron Abdufattoxovich Xidoyatovning amaldorlik karerasi haqida.

2014-2017 yy. - O`zbekiston Respublikasi Xususiylashtirish, monopoliyadan chiqarish va raqobatni rivojlantirish davlat qo`mitasi raisi
2017-2018 yy. - Chilonzor tumani hokimi
2018-2018 yy. - Chilonzor tumani hokimi vazifasini bajaruvchi
2018-2021 yy. - Toshkent shahar hokimining arxitektura, kapital qurilish va kommunikasiyalarni rivojlantirish masalalari bo`yicha birinchi o`rinbosari
2021- y - h.v  -  Toshkent viloyati hokimi

Yuqori mansab pillapoyalarini u 2014 yildan 2017 yilga qadar Xususiylashtirish, monopoliyadan chiqarish va raqobatni rivojlantirish davlat qo`mitasi raisi lavozimidan boshlagan.

2017 yilning aprel oyida o`tgan videoselektor majlisida Prezident Shavkat Mirziyoev shaxsan Davron Xidoyatovni keskin tanqid qilgan holda, uning faoliyatidan norozi ekanini bildirgan. Jumladan, qo`mita va uning tarkibiy bo`linmalari faoliyatida samarali natijalarga erishilmagani, Vazirlar Mahakamasining 2017 yil 14 yanvardagi majlisida berilgan topshiriqlarning ijrosi yuzasidan amaliy kompleks chora-tadbirlar ko`rilmagani hamda O`zbekiston Respublikasi Prezidenti farmoni loyihasini puxta ishlab chiqishdagi shaxsiy intizomsizligi uchun Xususiylashtirish, monopoliyadan chiqarish va raqobatni rivojlantirish davlat qo`mitasi raisi lavozim ishdan bo`shatgan edi. 

Shundan so`ng tanqid qilingan amaldor Toshkent shahrining Chilonzor tumaniga hokim etib tayinlangan. Ammo shu tuman hokimi davrida ham (2018 yil) faoliyatidagi kamchiliklar sababli yana ishdan olinib, Chilonzor tumani hokimi vazifasini bajauvchisi darajasiga tushirilgan.

Biroq qisqa davrda ish davomidagi kamchiliklari tufayli vazifasini bajaruvchisi bo`lib ishlayotgan Xidoyatov shu yilning o`zida (2018 yil) Bosh vazir Abdulla Aripov boshchiligidagi yig`ilishda Toshkent shahar hokimining arxitektura, kapital qurilish va kommunikasiyalarni rivojlantirish masalalari bo`yicha birinchi o`rinbosari lavozimiga tayinlandi va 2018 yildan 2021 yilga qadar ishlab keldi. Bu yillar davomida Toshkent shahrida katta “snos”lar amalga oshirildi, qurilishlar avj oldi.

Davron Xidoyatov shu davrda Toshkent shahrining bosh rejasi uchun javobgar amaldor ham bo`lgan. U o`z vaqtida, ya`ni 2019 yil oktyabr oyida poytaxtning bosh rejasi 2020 yilda tayyor bo`lib, jamoatchilik va hukumatga taqdim etilishi haqida ma`lum qilgan edi. Ammo, oradan shuncha vaqt o`tgan bo`lsa-da, bugunga qadar barchaning diqqat markazida turgan Toshkent bosh rejasi hamon tasdiqlangani yo`q.

2021 yil mart oyiga kelib Davron Xidoyatov Toshkent viloyati hokimi lavozimiga tasdiqlandi. Unga ishonch bildirildi. Biroq, biz Davron Xidoyatovning shuncha vakolatli vazifalari davrida — bankirlikdan hokimlikkacha bo`lgan yo`lida favqulodda qilgan yirik ijobiy o`zgarishni izlab topa olmadik. Aksincha, uning ikki bor rahbarlik lavozimini egallab turgan vaqtida tanqid qilingani va lavozimidan pastlaganiga guvoh bo`ldik.

Davlat xizmatini rivojlantirish agentligi kadrlar ma`muriyatchiligi departamenti mudiri Ilhom Qurbonovning bildirishicha, birgina kadrning qanchalar muvafaqqiyatli faoliyat yuritganiga baho berish uchun u bir lavozimda 1 yildan ortiq ishlashi talab etiladi. Davron Xidoyatov esa  4 yil ichida 4 marotaba lavozimi almashgan amaldorlardan hisoblanadi.

Eslatma: Davron Xidoyatov Toshkent viloyati xokimi lavozimidaligi vaqtida uning qizi Madina Xidoyatova Toshkent viloyati Qibray tumanidagi “Universal jumping” ot sporti klubida ot sportining konkur yo`nalishi bo`yicha “Toshkent viloyati hokimi kubogi” ning 110 sm balandlikka sakrash musobaqasi g`olibi bo`lgan.
Madina Xidoyatova avvalroq “Evroosiyo ot sporti assosasiyasi vise – Prezidenti kubogi uchun musobaqa”da ishtirok etib 100 sm balandlikka sakrash bo`yicha g`oliblikni qo`lga kirita olmagan.

Rost24.uz axborot sayti bundan oldin "Rahbarlikdan rahbarlikka: 4 yil ichida 4 ta amaldorlik kursisiga sakragan Rahmonbek Usmonovning yurishi" hamda “Oltita lavozim egasi Aziz Abduxakimov boshqaruvidagi 6 tarmoqning qaysi biri rivojlandi?” maqolalari e`lon qilingan edi.