Rost24.uz saytida “Rossiyada o`zbeklar askarlikka chorlanmoqda, byudjetdan milliardlarni sarflayotgan Ma`naviyat markazi esa uyquda” maqola e`lon qilingan edi.
Shundan so`ng Rossiyada askarlikka yollanayotgan o`zbekistonliklar yuzasidan Respublika Ma`naviyat va ma`rifat markazi rahbari Minhojiddin Mirzo Hojimatov rasmiy munosabat bildirdi:
“Rossiyaning Perm shahridagi o`zbek diasporasi rahbari Jahongir Jalolov Rossiyada ishlayotgan va yashayotgan O`zbekiston fuqarolaridan Ukrainadagi harbiy harakatlarda qatnashishi uchun batalon tuzish tashabbusi bilan chiqqani bugungi kunda vatandoshlarimizga nisbatan yangi ma`naviy tahdidlar paydo bo`layotganini ko`rsatmoqda.
Jahongir Jalolovning bu chiqishi, o`zbeklarning nafaqat u boshchilik qilayotgan jamiyatga bo`lgan ishonchini susaytirmoqda, balki O`zbekiston xalqini, O`zbekistonda yashayotgan qanchadan-qancha ota-onalar, turmush o`rtoqlarini kechayu kunduz duoi-jonini qilib turgan kelinlar, ularning farzandlarini ham jiddiy tashvishga solmoqda.
Dunyoda eng og`ir gunoh bu o`z vatandoshlaring, senga ishongan odamlarga hiyonat qilmoq, ularni halokatga boshlamoqdir. Boz ustiga bunday guruhni Amir Temur nomi bilan atashni O`zbek xalqiga nisbatan hurmatsizlik sifatida baholash o`rinlidir.
Albatta, tarixan bir bo`lgan ikki birodar xalq o`rtasida yuzaga kelgan urushni oqlab bo`lmaydi. Bunday shaxslar ziddiyatni bartaraf etish, urushni tugatish borasida tashabbus bilan chiqqanlari chin ma`noda insoniylik, ma`naviyatlilik bo`lar edi.
G`ururi, ori, hamiyati bor inson o`z vatandoshlarini bunday nafaqat qonunga xilof, balki milliy qadriyatlarimizga xilof yo`llarga boshlamaydi. Biz Rossiyada, Ukrainada yashab, ishlayotgan fuqarolarimizdan hamisha ogoh bo`lib, oqilona ish tutishlarini so`rab qolamiz.
O`zbekiston tinchliksevar mamlakat. Biz hamisha tinchlik va yaxshilik yo`lidagi hamkorlik tarafdorimiz. Yurtimizda olib borilayotgan ichki va tashqi siyosatning ma`no-mazmuni ham ana shunda. Davlatimiz tashqi siyosatda hamisha turli harbiy bloklarga qo`shilmaslik, muammolarni tinchlik va muzokaralar yo`li orqali hal etish yo`lini tutadi. Bu mamlakat tinchligi, obodligini ta`minlovchi eng insonparvar yo`ldir. Shu bois biz Rossiya va boshqa xorijiy mamlakatlardagi vatandoshlarimizdan hamisha hushyor, mulohazali bo`lishni, turli axborot xurujlari, xavf-xatarlardan ogoh bo`lishlarini so`rab qolamiz”.
* * * * * * * *
P.S.: Ma`naviyat va ma`rifat markazi mutasaddilari uyg`ondimi?
Tanqiddan so`ng markaz rahbari o`zga yurtda harbiy harakatlarga chaqirilgan o`zbekistonliklarga o`z munosabatini bildirdi. Ammo shuni ta`kidlash o`rinliki, aql va ma`naviyat markazlari yong`indan keyingi o`t o`chiruvchi kabi harakatlanmasligi kerak. Aslida, ular yuzaga kelayotgan kasalni avvaldan bilib, uni oldini olishlari kerak emasmidi? Fojiadan keyin afsuslanadigan aql markazlariga byudjetdan milliardlar sarflashni to`xtatish vaqti kelmadimi?
УЗ
