Benzin narxi oshdi — "O`zbekneftgaz" rahbarlari esa izoh uchun xalqqa yana bir yolg`onni to`qidi

Eng katta korrupsiya o`choqlaridan biri bo`lgan "O`zbekneftgaz» tizimi va rahbariyati jamoatchilikni nega aldamoqda?

Mutasaddilar bu yolg`on izohlari va aldovlari yuzasidan ham jamoatchilikka izoh berishi kerak. 

Dekabrdan beri ilk bor «O`zbekneftgaz» kompaniyasiga qarashli yoqilg`i quyish shoxobchalarida AI-80 benzini narxi 6800 so`mgacha (4,3%) ko`tarildi. Kompaniya buni import qilinayotgan 30 foiz neft mahsulotlarining jahon bozorlaridagi narxi oshgani bilan izohladi. Biroq, bunga qadar «O`zbekneftgaz» vakillari AI-80 benzini mahalliy xom ashyodan ishlab chiqarilishini aytgandi.

«Gazeta.uz» sayti to`plagan ma`lumotlarda yozilishicha, «O`zbekneftgaz»ga qarashli AYoQShlarda AI 80 markali benzin narxi 4,3 foizga — 6500 so`mdan 6800 so`mgacha ko`tarildi, deb xabar berilgan. Benzin narxi 2021 yilning dekabridan beri ilk marta oshdi.

Yil boshidan beri birjada ushbu marka benzinning narxi 21,1 foizga — 6,88 mln so`mdan 8,34 mln so`mgacha oshgan.

«O`zbekneftgaz» matbuot xizmati yilning dastlabki 4 oyligida kompaniya tasarrufidagi neftni qayta ishlash zavodlari ishlab chiqarilgan AI-80 rusumidagi avtobenzin birja savdolarida bir tonnasi uchun 3 mln. so`m boshlang`ich narxlarda qo`yilib kelingan bo`lsa, talabgorlar tomonidan har bir tonnasi o`rtacha 7,8 mln so`mdan sotib olingan.

May oyida esa boshlang`ich narx o`zgarmagan holda tonnasi 8,8 mln. so`mdan sotib olingan. Sotib olish narxi 1 mln. so`mga ko`p yoki 13 foizga oshgan.

«O`zbekneftgaz» birjada savdoga chiqarilayotgan avtobenzin iste`molchiga etkazib berilgunga qadar «soliq, rentabellik, transport xarajatlari va boshqa xarajatlar» borligini ham inobatga olish lozimligini ta`kidladi.

Yanvar-aprel oylarida «O`zbekneftgaz» AJ tomonidan 314,2 ming tonna ishlab chiqarilgan bo`lib, birja savdolari orqali 305,3 ming tonna sotilgan. Ushbu davrda jamiyat tasarrufidagi neftni qayta ishlash zavodlarida jami 531,1 ming tonna xom ashyo qayta ishlangan bo`lib, shundan 103,7 ming tonnasi import xom ashyolar ulushiga to`g`ri keladi 2021 yilning shu davriga nisbatan 32,8 ming tonna ko`p.

Yil boshidan Evropa davlatlarida sodir bo`layotgan geosiyosiy voqealar fonida jahon neft bozorida 1 barrel Brent neftning o`rtacha narxi 27,5 foizga — 87,2 dollardan may oyi boshida o`rtacha 111,1 dollargacha o`sdi.

Qo`shni davlatlarda avtobenzin narxlari Turkmanistonda — 0,2%, Qozog`istonda — 13,9%, Qirg`izistonda — 17,7%, Rossiyada — 63,2% o`sdi.

Eslatib o`tamiz, bundan oldin saytimizda «O`zbekneftgaz»da to`xtamayotgan korrupsiya benzin narxining keskin o`sishiga sabab bo`lmoqda...(mi?), maqolasi e`lon qilingan edi. Unda tizimdagi korrupsion holatlar ham bayon etilgan.