Жаҳон банки Ўзбекистонда таълим тизими сифатини паст даражада, дея баҳоламоқда.
Бунга ким айбдор? 3 босқичли тизим ўзини оқламаяптими? Ислоҳотлар етарли бўлмаяптими? Ёки мутасадди раҳбарларнинг салоҳияти тизимни ривожлантиришга етмаяптими?
Таълимда етарлича бўй кўрсатмаётган ислоҳотлар, керагидан ҳам ортиқ бўлиб бораётган муаммолар ҳақида Ўзбекистон ичидаги таълим фидойилари ва ОАВ етарлича бонг урди. Бугунга келиб эса буни халқаро ташкилотлар ҳам қайд этмоқда, аммо сезиларли ўзгаришлардан ҳамон дарак йўқ.
“Сўнги йилларда Ўзбекистонда бошланғич, олий ва ўрта таълимда қатор ислоҳотлар амалга оширилганига қарамай таълим тизимида сезиларли даражада ўзгаришлар бўлгани йўқ”. Буни дунёдаги энг нуфузли ташкилотлардан бири ҳисобланган — Жаҳон банки ўз ҳисоботларида қайд этган.
Яъни, халқаро ташкилот Ўзбекистондаги таълим сифати ва қамровини паст даражада, ўрта таълим сифати қониқарсиз, дея баҳоламоқда. Ташкилотнинг хулосалари қатор тадқиқотчилар фикри ва сўровномаларга асосланган.
Бу хулосаси Ўзбекистон фуқаролари иштирокидаги (Listening to the Citizens of Uzbekistan) сўровномаси асосида шакллантирилган. Респондентларнинг аксарияти ўрта таълим сифатидан қониқмасликларини билдирган.
Қолаверса, яқин вақтгача Ўзбекистон ўрта таълим қамрови даражаси билан ҳам қўшнилардан ортда қолган. 2021 йилда мамлакатда олий таълим қамрови 16 фоизни ташкил этган. “Сўнгги ислоҳотларга қарамай, Ўзбекистондаги олий таълим қамрови Марказий Осиё ва Европа мамлакатлари бўйича энг паст кўрсаткичларда қолмоқда”, дейилади Жаҳон банки ахборотида.
Банк ахборотига кўра, инсон капиталини ривожлантиришни кўзлаган ҳукумат олий таълим сифати ва қамровига жиддий эътибор бериши лозим. Чунки, бу бозор иқтисодиётига ўтиш йўлидаги муҳим омиллардан бири ҳисобланади.
Rost24.uz сайтида "Ўзбекистонда таълим йўналишидаги 3 та вазирликни қисқартирса бўладими?" мақоласи эълон қилган эди. Унда тизимда бошқарувни оптималлаштириш бўйича сиёсатни амалга оширишга мамлакат кундан кун эҳтиёж сезаётгани, дунё тажрибасидан фойдаланиб, учта вазирликни ягона тизимда бирлаштириш орқали молиявий ҳаражатларни ҳам қисқартириш ва сифатини ошириш мумкинлиги ҳақида халқаро даражадаги мутахассислар фикри берилган.
Айни пайтда эса Олий ва ўрта махсус таълим вазирлиги ҳамда Халқ таълими вазирлиги ўртасидаги бир-бирига айбни ағдариш занжири кечаётгани ёзилганди.
Шунингдек, муаммолар гирдобидан чиқа олмаётган Мактабгача таълим вазирлиги ва уни бошқараётган вазир Агриппина Шин фаолияти ҳам танқид қилинганди ("Вазир Агриппина Шиннинг ортида ким турибди?").
Жамоатчилик фикрига қулоқ солмаётган ҳукумат тизимдаги муаммоларни ҳал қила олармикан?
УЗ
-middle.jpg)
