O`zbekistonda “yordam beruvchi daftarlar” soni yana bittaga ortdi

O`zbekistonda yana bir “yordam beruvchi daftar” — “Nizoli oilalar bilan individual ishlash daftari” joriy etiladi. Bu haqda AOKAda joriy yil 11 aprel kuni bo`lib o`tgan brifingda Oila va xotin-qizlar davlat qo`mitasi raisi o`rinbosari Nodira Egamberdieva ma`lum qildi. Shuningdek, “Mahalladagi xotin-qizlar faollari faoliyatini tashkil etish” uslubiy qo`llanmasi ishlab chiqilgani ham aytib o`tilgan. 

Hozirgacha O`zbekistonda nechta “yordam beruvchi daftarlar” ishlab chiqildi? 

1. Temir daftari
2. Ayollar daftari 
3. Yoshlar daftari 
4. Mehr daftari
5. Oltin daftari 
6. Nizoli oilalar bilan individual ishlash daftari

Albatta, har bir daftarning o`z yordam ko`rsatadigan yo`nalishi bor.

• Temir daftar – yordam va ko`makka muhtoj oilalar uchun yaratilgan;
• Yoshlar daftari – ishsiz yoshlar uchun;
• Ayollar daftari – ishsiz va boquvchisiz xotin-qizlar uchun;
• Mehr daftari – etim va ota-ona qaramog`idan mahrum bo`lgan bolalarni qo`llab-quvvatlash maqsadida;
• Oltin daftar – xorijdagi o`zbekistonliklar uchun; 
• Nizoli oilalar bilan individual ishlash daftari esa o`z nomidan nizoli oilalar bilan alohida ishlash uchun yaratilmoqda.
   

Ma`lumot o`rnida, 2021 yil sentyabr oyida “Temir” va Ayollar” daftariga qancha fuqarolar kiritilganining statistik raqamlari ochiqlangan edi. Unga ko`ra, “Temir daftar” ro`yxatiga deyarli 600 ming oila kiritilgan. Ta`kidlanishicha, aksariyatining mavjud muammolari bartaraf etilgani bois 564 612 ta oila undan chiqarilgan. “Ayollar daftari”ga esa jami 432 781 nafar xotin-qiz ro`yxatga olingan bo`lib, ularning deyarli barchasiga amaliy yordam ko`rsatilganligi aytiladi. 

Eslatib o`tamiz, bu “daftarlar” O`zbekistonda pandemiya davrida (2019 oxiri – 2020 yil boshlarida) muhtoj oilalarni qo`llab-quvvatlash uchun shakllantirilib boshlangan edi. Qariyb 3 yil ichida bu daftarlar soni 6 taga etmoqda.