«Men bu ishni erimni qarindoshlari ko`rishi va kelib bolalarimga qarashi uchun qilgandim,- demoqda ayol Qoraqalpog`iston ichki ishlar vazirligi axborot xizmatiga bergan intervyusida. Uning pushaymonligi vaziyatni engillashtiradimi? Tushkunlikka tushgan bo`lsa bolalarga shunday munosabatda bo`lish mumkinmi? Nahot ayol faqat “uzr” so`rash bilan qutulib ketsa?
- Qizlarimni urib videoga olganim sababi erim Rossiyada edi, men farzandlarim bilan birga yolg`iz yashardim. Ukalari kelib qarashadi degandim, bari bir kelishmadi. O`rtada ota-onam kasal bo`lib, shok holatda edim, deydi u
Ayol 2016 yil mayda turmush qurgani keyin iyunda eri bilan Qozog`istonga ketgani, so`ng o`sha yili avgustda Rossiyaga ketgani, farzandiga homilador bo`lganida qaytganini aytadi.
"Maqsadim, uyidan hech kim kelmaydi, nabiralari bilan ham hech kimni ishi yo`q. Videoga o`zim oldim, va erimga jo`natdim oilasiga yuborsin,menga rahmi kelar, bizni yonimizga kelishar deb, lekin unday bo`lmadi. keyin yana videoga olib jo`natdim yana ta`sir qilgani yo`q. Xudo ko`zimni ochdi. Otam o`ldi. Shu norasidalarni ko`z yoshi shu deb bilaman".
Kelin o`z qilmishlari internetda tarqab ketganidan norozi bo`lib, buni tarqalishida qaynonasi aybdorligini aytgan va ularni nomardlikda ayblagan.
«Qaynonam qo`rqitardi tarqatvoraman, ertaga televizorda ko`rasan derdi. Aytganini qilishdi nomardlik bo`yicha birinchi o`rin. Lekin, mardlik qilib, men ming yomon bo`lar ekanman, kelib nega xabar olmadi nabiralaridan?»
Ro`zg`or nima hisobidan ekanligi haqidagi savolga, Moskvadan eri pul jo`natishi, o`zining ishsiz ekanini aytgan. Bizga bu ayol yashaydigan honadonning suratlari kelib tushgan bo`lib, ushbu suratlarda sharoitlar ancha yaxshiligini ko`rishingiz mumkin.
Ayol, o`z qilmishi haqida to`xtalarkan, erini o`rnida bo`lganida kechirmasligini ta`kidlagan.
- Bolasini urib turilganda man kechirmasdim, kechiriladigan narsamas. Lekin xalqimdan iltimos qilib so`rardim, bilib bilmay "komentariyalar" yozmasdan, meni ichimda hamm birnarsalar bo`lgandir . Lekin, qizlarimni agar o`sha erda men urib "invalid" qilib, yoki o`ldirib qo`ygan bo`lganimda o`sha holatimda Xudo bor ekan, qizlarim soppa sog`.
Hozir baxtli qizlarim, parklarga boramiz, qaynanam ko`rolmayapti baxtli yashayotganimizni, deb hamma aybni erining onasiga yuklamoqchi bo`lgan. Eski videolarni olib tarqatishgan deb, aytgan.
Bu bo`yicha tez orada ikkinchi tomon, ya`ni erining oilasidan izoh olib sizning e`tiboringizga havola etamiz.
Shuningdek, ayol video oxirida juda pushaymonligini, qilgan ishi yaxshi ish emasligini aytib, boshqa onalarga farzand hamma narsadan ustun ekanligiga va ularga e`tibor qaratishni so`ragan.
Ota nima demoqda?
Bolalarning otasi ham bu voqea yuzasidan intervyu bergan bo`lib, u bu vaqtda Rossiyada bo`lganini va aniq qaysi sanada yuz berganini eslolmasligini aytgan.
- Sababi shu tortishib, asabiylashib jo`natganda menga. Urush janjal bo`lib turardi, oilaviy mojaro. U yoqqa olib ketib ishlashni olib ketishni xohlamadim. Pul jo`natib turaman bolalarga qara degandim. Bu bilan ZAGSda emasmiz. Qizlar hozir o`zimda. Men Rossiyadan 13 martda keldim. Shundan beri o`zimda. U uzr so`rab turibdi, bolalar bor ikki, etim qolmasin deb harakatdaman. O`zini tiysa chiqar deb o`ylarman (qamoqdan. Tahr.). Biz vrachga ko`rsatdik, travmalar yo`q. Normal holatda bolalar, dedi u.
Eslatib o`tamiz, Rost24.uz saytida e`lon qilingan «Xo`jaylida «ona» farzandlarini ayamay savalab kun ko`rmoqda. Bolalarni devorlar ortida kim himoya qiladi? (https://t.me/rost_24uz/4859)" nomli maqola yuzasidan Ichki ishlar vazirligi rasmiy munosabat e`lon qilgandi:
«Joriy yilning 29 mart kuni Qoraqalpog`iston Respublikasi Xo`jayli tumani Yangihayot ko`chasida yashovchi fuqaro A.A. tuman IIB boshlig`i nomiga ariza bilan murojaat qilib, 2021 yil iyul oylaridan boshlab turmush o`rtog`i bo`lgan X.F. bilan o`rtalaridagi o`zaro kelishmovchilik sababli, X.F. o`zining ikki nafar voyaga etmagan qizlarini urib, ularga azob berib kelayotganligini, shu sababli X.F.ga nisbatan qonuniy chora ko`rishda amaliy yordam berishni so`ragan.
Shu bilan birga, joriy yilning 9 aprel kuni ijtimoiy tarmoqlarda tarqalgan videotasvirda, fuqaro X.F. tomonidan o`zining voyaga etmagan farzandlari (2017 y.t.) X.Sh. hamda (2019 y.t.) X.A.ni har xil so`zlar bilan haqoratlab, ularning ojiz ahvoldaligini bila turib, do`pposlayotganligi tasvirlangan.
Hozirda mazkur holat yuzasidan O`zbekiston Respublikasi JKning 110-moddasi 2-qismi «a,v» bandlari bilan jinoyat ishi qo`zg`atilib, gumonlanuvchi X.F.ga nisbatan prosessual cheklov chora belgilash masalasi ko`rilmoqda»,- deyiladi IIV Axborot xizmati e`lon qilgan xabarda.
Qoraqalpog`iston IIV vakilining ma`lum qilishicha, ayolni hozirda vaqtincha ozodligi cheklangan.
УЗ
-middle.jpg)