Amaldorlarning oʻz mansablaridan foydalangan holda katta-katta iqtisodiy imperiyalarni yaratishi va ofshor hududlarda yashirin nomlar bilan soliqlardan berkitilgan kompaniyalarni yuritishiga koʻz yumish davlat, xalq mulkiga xiyonat sifatida koʻrilishi kerak emasmi?
Rost24.uz saytida kuni kecha Bosh vazir oʻrinbosari Ochilboy Ramatovning rafiqasi Raʼno Ramatovaga tegishli boʻlgan ofshor hududlardagi kompaniyalar va Shveysariya banklarida ochilgan hisob raqamlari haqida «Ramatova xonim ortidagi milliardlarga yetaklovchi biznes imperiya oshkor boʻldi», sarlavhali maqola eʼlon qilingan edi.
Oʻzbekiston Respublikasi Korrupsiyaga qarshi kurash agentligi matbuot kotibi Durdona Ochilova mazkur maqoladagi maʼlumotlar agentlik tomonidan oʻrganilayotganini maʼlum qildi.
Joriy yilning fevral oyida Raʼno Ramatovaga tegishli Credit Suisse bankidagi hisob raqam va undagi mablagʻ miqdori ochiqlangan edi. Bu borada muxbirimiz Akmal Burxonovga murojaat qilib, amaldorning rafiqasi boʻlgan Raʼno Ramatova ishi korrupsiyaga aloqadorlik boʻyicha oʻrganilishi kerakligini soʻradi. Agentlik rahbari soʻrovga nisbatan Credit Suisse masalasi boʻyicha oʻrganish uchun yetarli, ishonchli dalillar yoʻqligini maʼlum qilgan edi.
Endilikda, Ochilboy Ramatov 10 yildan ortiq rahbarlik qilgan “Oʻzbekiston temir yoʻllari” AJning Ramatova orqali ofshor hududlardagi moliyaviy oʻyinlari toʻgʻrisidagi maʼlumotlarni Korrupsiyaga qarshi kurash agentligi qanday talqin etadi? Amaldor qonun oldida javob beradimi? Tafsilotlarni saytimiz orqali tanishtirib boramiz.
Eslatib oʻtamiz, Korrupsiyaga qarshi kurash agentligi rahbari Akmal Burxonov Oʻzbekiston amaldorlarining xorijda hisob raqam yuritishi kelajakda qonunan taqiqlanishi kutilayotgani haqida xabar bergan edi. Shuningdek, agentlik tomonidan 2022-yildan davlat xizmatchilari daromad deklaratsiyasini toʻldirishlarini koʻzda tutuvchi meʼyor joriy etilishi haqida ham maʼlumot berilgan.
УЗ
-middle.jpg)