Ayni damda Toshkent hududida haydovchilik guvohnomasini olish uchun faqatgina Allamjonovga tegishliligi aytilgan «Yagona imtihon markazi»da pul to`lab imtihondan o`tish mumkin. Oliy Majlis deputati qonunchilik palatasi deputati Rasul Kusherbaevning ma`lum qilishicha shu vaqtgacha Toshkentda faoliyat yuritgan davlat imtihon markazlari prezident qaroriga zid ravishda yopilgan. Bu esa o`z o`rnida lobbistlikka yo`l qo`ymaganiga ishontirgan Komil Allamjonov uchun Toshkentdagi yagona monopol imtihon markazi sifatida pul topishga imkon yaratgan.
Rasul Kusherbaev ayni markaz yuzasidan «deputatlik so`rovi»ni yuborganini aytmoqda.
«Keng jamoatchilik va saylovchilardan bo`layotgan murojaatlarni inobatga olib, Toshkent shahrida haydovchilar uchun imtihon oluvchi «Yagona imtihon markazi» faoliyatining yo`lga qo`yilishi va davlat imtihon markazlari yopilishida iste`molchilar huquqlari, raqobat hamda boshqa qonunchilik hujjatlariga rioya etilishi masalasida Monopoliyaga qarshi kurashish qo`mitasi raisi nomiga «deputatlik so`rovi» kiritgan edim», deydi u.
Kusherbaev ushbu so`rovnomasi yuzasidan javob ham olgan va unda qayd etilishicha prezident qaroriga zid ish qilingan.
«Qo`mitaning bildirishicha, Prezidentning 2020 yil 7 dekabrdagi «Davlat tomonidan tartibga solinadigan sohalarga xususiy sektorni jalb etish bo`yicha qo`shimcha chora-tadbirlar to`g`risida»gi PQ-4913-sonli qarorning 1-bandi, to`rtinchi xatboshida tegishli hududlarda davlat funksiyalari o`tkazilayotgan sohalarda etarli miqdorda xususiy sektor sub`ektlari tashkil etilguniga qadar mazkur funksiyalarning davlat organlari va tashkilotlari tomonidan ham amalga oshirilishi ko`rsatib o`tilgan.
Biroq shunga qaramay hozirgi kunda respublikaning ba`zi hududlarida (Qashqadaryo viloyatida 2 ta, Surxondaryo viloyatida 3 ta hamda Toshkent viloyatida 6 ta) Ichki ishlar vazirligi tizimidagi Davlat yo`l harakati xavfsizligi xizmatining nazariy va amaliy imtihonlarni o`tkazish markazlari ushbu sohada etarli miqdorda xususiy sektor sub`ektlari tashkil etilmay turib, Prezident qarori talablariga zid ravishda faoliyati to`xtatilgan», deya izohlaydi Kusherbaev.
Kusherbaevning bildirishicha, Prezident qarorida aynan bir tashkilotga eksklyuziv huquqlar berilmagan hamda tegishli lisenziyaga ega bo`lgan barcha tadbirkorlik sub`ektlariga haydovchilik guvohnomasini olish uchun nazariy va amaliy imtihonlarni olish huquqi berilgan.
Shu munosabat bilan Monopoliyaga qarshi kurashish qo`mitasi Prezident qarori talablariga zid harakatlar sodir etilayotganligi sababli Vazirlar Mahkamasiga (Hukumatga) kiritish uchun tegishli taklif ishlab chiqilgan.
Taklifda Davlat yo`l harakati xavfsizligi xizmatining nazariy va amaliy imtihonlarni o`tkazish bo`yicha faoliyati ushbu xizmatni ko`rsatuvchi tadbirkorlik sub`ektlarining etarlicha tashkil qilinguniga qadar, ya`ni har bir hududda avval faoliyatda bo`lgan imtihon oluvchi davlat tashkilotlari sonidan kam bo`lmagan xususiy sektor bozorga kirgandan so`ng to`xtatilishi nazarda tutilgan.
Bunda masalan, Toshkent viloyatida 6 ta xususiy imtihon olish markazi tashkil etilgunga qadar 6 ta davlat markazi ishlashi kerak. Nima uchun 6 ta deyilsa, asos shuki yaqin vaqtgacha talabdan kelib chiqib Toshkent viloyatida 6 ta markaz faoliyat ko`rsatgan. Undan kami etmaydi.
Deputat bayonoti so`nggida shunday xulosa qiladi: Bitta tadbirkorlik sub`ektining tezroq «soqqa ishlashi»ga imkoniyat berish uchun shoshib-pishib boshqa davlat imtihon markazlarini yopish orqali Prezident qarori talablari ham buzilgan.
Lobbist emasligiga ishontirgan «soqqakash» tadbirkorlar ayni masala yuzasidan ham izoh beradilar, deb o`ylaymiz.
УЗ
