YoXUD Adolat mansabga qarab ta`minlanadimi?
500 ming so`m pora olgan shifokorga ham, 10 ming dollar pora olgan "zam" hokimga ham 5 yil qamoq jazosi.
Bunday vaziyatlarda sudyalar tomonidan adolatli ish tutilmoqdami?
Rost24.uz muxbiri ushbu vaziyat bo`yicha savol bilan Oliy sud raisi o`rinbosariga yuzlandi.
Joriy yil 14 yanvarda Qashqadaryo viloyati Kasbi tumanida 500 ming so`m pora olgan tuman tibbiyot birlashmasi o`rinbosari 5 yilga ozodlikdan mahrum etilgani haqidagi xabarlar Oliy sudning rasmiy kanalida e`lon qilingan edi. Bu voqea ijtimoiy tarmoqlarda keng shov-shuvga sabab bo`lgan. Chunki Qo`qon shahri hokimining birinchi o`rinbosari A.N 10 ming dollar pora olgani uchun ham 5 yil muddatga qamoq jazosi berilganligi va bu ikki voqea bir-birini butunlay inkor qilayotgani barchaning e`tiboriga tushgandi.
Bu vaziyat bo`yicha Oliy sud nima deydi?
Oliy sud raisi o`rinbosari Ikrom Muslimov ushbu savolga quyidagicha javob berdi:
“Menga rais o`rinbosari bo`lib turib meni qiynaydigan narsa shuki, qaysi ish haqida gap ketyotganini bilmay turib, men javob berishim qiyin. O`sha vrach haqida ham va hokim o`rinbosari haqida ham. U ishni man qo`limga olib, o`zim shaxsan ko`rib chiqsamgina fikrimni aytishim mumkin.
U ishni men ko`rib chiqishim uchun, u ish barcha instansiyalardan o`tishi kerak bo`ladi. Birinchi appelasiya, kassasiya bosqichi. Ana undan keyin ham e`tiroz bo`lsa, takroriy kassasiya berilsa, Oliy sud raisining o`rinbosari sifatida sud qonuniyligiga baho berishim mumkin.
Men sizni savolingizga javob berishdan bo`yin tovlamoqchi emasman, to`g`ri tushuning faqat. Avvalambor bu ishni man tanishmasdan turib “Nima uchun?” degan savolga javob bera olmayman. Endi jinoyat ishida har xil holat bo`lishi mumkin. Og`irlashtiruvchi, engillashtiruvchi, jazo tayinlashda inobatga olinadigan va olinmaydigan holatlar bo`ladi. 210-modda bor, 168-modda bor firibgarlik yo`li bilan og`dirish holatlari bo`lishimi mumkin. Shuning uchun, bu ishni biz o`rganandan keyin javob berishimiz mumkin”, deya so`zini yakunladi Oliy sud raisi o`rinbosari.
Oliy sud raisi Ikrom Muslimov ta`kidlagandek, qaysidir ishni bilmasdan turib unga fikr bildirolmaydigan holatlar bo`lishi mumkin, albatta, biz buni inkor qilmaymiz. Lekin bunday holat oddiy fuqarolar uchun tushunarsiz. Shuning uchun mana shunday paradoks vaziyatlardagi moddalarni yoki ma`lumotlarni aholiga tushuntirish kerak. “Amaldorlar qancha olsa ham mayli, oddiy ishchilar 100 so`m olsa ham ko`rinadi”, qabilidagi vaziyat bo`lmayaptimi?
Biz, Oliy sud ushbu savolga beriladigan rasmiy javobini yaqin vaqt ichida e`lon qilishidan umidvormiz.
УЗ
-middle.jpg)
