Mojaroli seriallarning hayotiy ssenariysi esa O`zbekiston media bozorida monopoliya o`rnatishga qaratilganmi?
Ayni kunlarda ijtimoiy tarmoqlarda trendga chiqqan seriallardagi yoqimsiz sahnalar “ssenariysi” prokuratura va Antikorrupsiya agentligi aralashadigan darajagacha ko`tarildi. Aniqirog`i, shu darajagacha olib kelindi.
“Mening yurtim” telekanalida qandaydir xato ketishini kutib o`tirishgan shekilli, kimlardir kutgan sahna paydo bo`lishi bilan jamoatchilik e`tiboriga olib chiqildi. Barchaga ko`z-ko`z qilinib kattagina shov-shuv yaratildi.
Bu borada Komil Allamjonovga qarashli bo`lgan barcha OAV birdaniga harakatni boshlab yubordi. Vaholanki, seriallardagi bunday sahnalar K.Allamjonovga tegishli telekanallarda ham mavjud edi. Ammo ular haqida esa lom-mim deyilmadi.
Seriallardagi sahnalar muhokamasi prokuratura aralashish darajasigacha olib chiqilishda kinolardagi tarbiyasizliklarga chek qo`yish deb o`ylaymiz. Aslida esa asl maqsad boshqa bo`lishi ham mumkin. Asl maqsadni yurak yutib aytadigan bo`lsak, O`zbekiston media bozorida ham monopoliya o`rnatish uchun harakatlar boshlandi. Oldindan ogohlantirish sifatida shuni aytish joizki, OAV uchun bu yaxshi yangilik emas.
Bugun O`zbekiston mediasida katta kurash boshlangan. Bu kurash media bozordagi yakkahokimlik taqdirini hal qiladi.
Tarixdan ma`lumki, Komil Allamjonov boshlagan har bir ishini monopoliyaga aylantirish qobiliyatiga ega. U monopoliyani juda xush ko`radigan shaxsdir. Misol uchun haydovchilikka o`qitishning Allamjonovcha tizimi – “Avtotest”ni olaylik. Bu tizim Allamjonov siyosat sahnasidan tushirilguncha faoliyat yuritdi. Ayni kunlarda iqtidorga qaytishi bilan avtohalokatlarda halok bo`layotgan odamlar soni yo`l qoidasiga amal qilmaslikda deya bong urilmoqda. Bir zamonlar u yuritgan “Soliq-info” gazetasi ham soliq to`lovchi yuz minglab odamlarning majburiy obunasi orqali kattagina daromad manbaiga aylantirilganligini yashirishning imkoni yo`q.
U Prezident matbuot kotibi lavozimiga ko`tarilgach hukumatdagi axborotlarni ham monopollashtirishga kirishdi. Hattoki Prezident atrofidagi yangilik va xabarlarni ham o`zi tashkil etgan “Turon24” internet nashri orqali tarqatilishini tashkillashtirdi. Hattoki, hukumatning rasmiy sayti – O`zbekiston Milliy axborot agentligini ham chetlashtirishga erishdi.
Komil Allamjonov qo`l urgan har bir sohasini monopoliyaga aylantirishda har qanday xatarli qadamni ham tashlashdan cho`chimaydi. Uning ayni shu dovyuraklik xislatiga tan bermasdan ilojimiz yo`q.
Bugun esa u tanlagan monopoliya yo`lidan Firdavs Abduxoliqov chiqib turibdi.
K.Allamjonov tashlayotgan ildam va shaxdam qadamlariga qaraganda F.Abduxoliqovga juda og`ir bo`ladiganga o`xshaydi.
Ayni kunda O`zbekiston media makonida ikkita media lider paydo bo`lganligi barchaga ayon. F.Abduxoliqov boshqarayotgan O`zbekiston Elektron ommaviy axborot vositalari milliy assosasiyasi (O`zEOAVMA) o`tgan 2021 yilda media makonda kattagina hududni qamrab olishga erishdi. O`zEOAVMA bilan axborot tarqatish bo`yicha hamkorlik qilishni istagan tashkilotlar soni kundan-kunga ko`payib bormoqda. “O`zbekneftgaz” kabi yirik tashkilotlar ham O`zEOAVMA bilan shartnoma tuzgan. Bu pullar esa Allamjonovga tinchlik bermayotgan bo`lsa ajab emas.
Seriallar mojarosining ortida K.Allamjonov turibdi deyishimizga yana bir asos shuki, Allamjonov o`zining telegram kanalida F.Abduxoliqov shaxsiga nisbatan o`ziga xos bir post qo`ygan.
Bu post uning Abduxoliqovga qarshi tezkorlikda hujum boshlaganini anglatadi. Men Allamjonovnin ana shu xislatlarini hurmat qilaman. U kimgadir aytadigan yoqimsiz so`zi bo`lsa ham darhol yuziga shartta aytadi, qo`yadi. Qog`ozga o`rab o`tirmaydi.
F.Abduxoliqovga qarshi hujumlar shu darajada shiddat bilan ketmoqdaki, xatto o`tmishi ham titkilanib, uning Gulnora Karimova yonida tushgan rasmlari ijtimoiy tarmoqlar orqali qayta elga dasturxon qilinmoqda.
Yana bir shubhali fakt shuki, Allamjonovga tegishli bo`lmagan “ZO’R” telekanalidagi “Yor-yor” ko`rsatuviga chora ko`rish masalasi ham maxsus odamlar orqali Prezident oldiga ham olib chiqildi. Xuddiki, Prezidentga aytiladigan boshqa muammo qurib ketganday...
“ZO’R” telekanali Jahongir Ortiqxo`jaevga tegishli ekanligini inobatga oladigan bo`lsak, Allamjonov media bozorda birgina telekanaliga ega Toshkent hokimini ham sig`ishtirmasligi ayon bo`ladi.
Yana shuni alohida ta`kidlash kerakki, F.Abduxoliqovga kelganda o`lik qonunlar ham ishlab ketgan ko`rinadi. Korrupsiyaga qarshi kurash agentligi qisqa fursat ichida Kinematografiya agentligi tomonidan qonun buzilishi holatlarini aniqladi va chora ko`rish uchun hujjatlarni Bosh prokuraturaga yubordi. Xuddi shunday hodisa ya`ni manfaatlar to`qnashuvi Xorazm viloyati hokim o`rinbosari bilan sodir bo`lganda prokuratura tomonidan chora ko`rilmagan edi. Qolaversa, davlat xaridlari, subsidiya va tender o`tkazishda manfaatlar to`qnashuviga yo`l qo`yilishiga Abduxoliqov yagona misol emas. Shu vaqtgacha bu borada ommaviy axborot vositalarida o`nlab maqolalar e`lon qilingan.
P.S. Ushbu fikrlar bilan kimnidir qoralash yoki kiningdir yonini olish niyatidan yiroqmiz. Biz ayni kunda trendda turgan mavzuning asl mohiyatini va maqsadini ochiqlashga harakat qildik, xolos.
УЗ
-middle.jpg)