Avtomobillarga ekostikerlarni berish tartibi belgilandi

Hukumat qarori bilan avtotransport vositalaridan chiqariladigan ifloslantiruvchi moddalar miqdorining me`yorlarga mosligini aniqlash, ekologik toifalarga ajratish hamda ekologik stikerlarni berish tartibi belgilandi.

Nizomga ko`ra, transport vositasining ekologik toifasi uning ishlab chiqaruvchi tomonidan tasdiqlangan ekologik sinfiga muvofiq belgilanadi. Transport vositalari quyidagi mezonlar asosida ekologik toifalarga ajratiladi:

Benzin, siqilgan va suyultirilgan gazda harakatlanuvchi transport vositalari:

“Evro-2” va undan yuqori ekologik sinf — “toza” ekologik toifa;
“Evro-0” va “Evro-1” sinf — “o`rta” ekologik toifa.

Dizel yoqilg`isida harakatlanuvchi transport vositalari:

“Evro-4” va undan yuqori ekologik sinf — “toza” ekologik toifa;
“Evro-3” sinf — “o`rta” ekologik toifa;
“Evro-0”, “Evro-1”, “Evro-2” sinf — “zararli” ekologik toifa.

Gibrid avtomobillar, muqobil yoqilg`ida ishlovchi transport vositalari hamda ishlab chiqarilganiga 3 yildan oshmagan transport vositalari — “toza” ekologik toifaga kiradi.

Transport vositalarini ro`yxatga olish yoki qayta ro`yxatga olish jarayonida ularga toifasiga mos ravishda “yashil”, “sariq” yoki “qizil” rangli ekologik stikerlar Davlat yo`l harakati xavfsizligi bo`linmalarida ekologik operatorlar tomonidan beriladi.

Transport egasi ixtiyoriy ravishda ekologik stiker olish uchun IIV Jamoat xavfsizligi departamenti Yo`l harakati xavfsizligi xizmati rasmiy veb-sayti yoki Yagona interaktiv davlat xizmatlari portali (my.gov.uz) orqali murojaat qilishi mumkin.

Ariza belgilangan talablarga mos bo`lsa, transport vositasiga ekologik toifasiga muvofiq stiker beriladi. Ekologik stikerlar muddatsiz amal qiladi.

Toshkentda haydovchilarga ekologik stikerlar berish 2026 yil yanvar oyida boshlanadi. Poytaxtdagi barcha mashinalarni ekologik baholash muddati ham 2027 yil o`rniga 2028 yil boshigacha uzaytirildi. 

Nukus shahri va viloyat markazlarida avtomobillarni ekologik baholash uchun 2031 yil yanvarigacha (ilgari 2029 yilgacha edi) muddat belgilangan. Boshqa hududlarda oxirgi muddat 2035 yil boshigacha (ilgari 2031 yil edi) belgilandi.