14 yanvar – Vatan himoyachilari kuni! IIB tizimidagi kamchiliklarni aytgan "uchastkavoy" esa qamoqda

Uning bo`yniga 7 ta modda bilan ayblov "ilishdi"

Ijtimoiy tarmoqlarda tarqalgan "Inson qadri uchun" nomli videomurojaatda Namangan shahar Sumalakguzar MFY katta leytenanti Sardor Otaboev Ichki ishlar tizimida avj olayotgan "planvozlik"lar, sohadagi kamchiliklar hamda byurokratik holatlar haqida ma`lumot bergan edi.

"Rahbardan shaxsiy haq-huquqingizni talab qilsangiz ig`vogar bo`lasiz, xizmatini qilsangiz "u" bo`lasiz, biron gapni etkazsangiz "kozyol" bo`lasiz, biz bu tizimga tushunmayapmiz. Bir kelib Namangandagi IIBni tekshirib ketsangiz", deya Ichki ishlar vaziriga murojaat qilinadi videomurojaatda.

IIV bu holatga tezkorlik bilan javob qaytarib murojaatchi Sardor Otaboevning "xavfli residivist, o`z xizmat burchidan foydalanib firibgarlik sodir etgani"ni aniqladi va unga ko`ra JK 168-modda, 3-qism "b", "v" bandlari bilan jinoyat ishi qo`zg`atilib, tergov harakatlari olib borilayotgani haqida xabar berishdi.

Natijada Sardor Otaboev ishdan bo`shatilgan va qamoqqa olingan.

So`nggi ma`lumotlarga qaraganda sobiq katta leytenant Otaboev jami 7 ta modda bilan ayblangan.

Jinoyat kodeksining:

1. 206-moddasi 1-qismi(Hokimiyat yoki mansab vakolati doirasidan chetga chiqish);
2. 230¹ moddasining (Dalillarni soxtalashtirish (qalbakilashtirish) 1-qismi (a. bir guruh shaxslar tomonidan oldindan til biriktirib sodir etilgan bo`lsa);
3. 168-moddasi (Firibgarlik) 3-qismi "b", "v” bandlari (b. takroran yoki xavfli residivist tomonidan, v. xizmat mavqeyidan foydalanib sodir etilgan bo`lsa);
4. 209-moddasi (Mansab soxtakorligi) 2-qismi "a" bandi (a. takroran yoki xavfli residivist tomonidan);
5. 238-moddasi (Yolg`on guvohlik berish) 2-qismi (Surishtiruv olib borish, dastlabki tergov yoxud ishni sudda ko`rish chog`ida yolg`on ko`rsatuvlar berish uchun guvohni yoki jabrlanuvchini yoki yolg`on xulosa berish uchun ekspertni yoxud noto`g`ri tarjima qilish uchun tarjimonni pora evaziga og`dirib olish, xuddi shuningdek ularga yoki ularning yaqin qarindoshlariga ruhiy, psixologik, jismoniy ta`sir ko`rsatish yoki boshqacha tarzda ta`sir ko`rsatish orqali yolg`on ko`rsatuv berishga majbur qilish);
6. 205-moddasi 1-qismi (Hokimiyat yoki mansab vakolatini suiiste`mol qilish);
7. 208-moddasi (Hokimiyat harakatsizligi) kabi moddalari bilan ayblov e`lon qilingani o`qib eshittirildi.

Sardordek Otaboev bunday ayblov xulosasi bilan tanish emasligi sababli sud 24 yanvargacha tanaffus e`lon qildi.

Ungacha ayblanuvchi yana qamoqda saqlanadi.

Bayramingiz muborak bo`lsin, aziz Vatan himoyachilari!