YoXUD O`zbekistonni cho`lga aylantirgan amaldorlar xorijning bahavo maskanlarida dam olishadi
O`zbekiston Respublikasi hukumati va Prezident administrasiyasi, ya`ni Bosh vazir, uning o`rinbosarlari, vazirlar, hokim va uning barcha o`rinbosarlari, Prezident maslahatchilari 2022 yil 1 yanvardan 15 yanvar kuniga qadar navbatma navbat barchasi mehnat ta`tiliga chiqib, dunyoning eng so`lim maskanlariga dam olish uchun ketmoqda.
Rasmiy xabarlarga ko`ra, o`zbekistonliklar har yili chet elda dam olish uchun 1 milliard 200 million dollar atrofida pul sarflashmoqda. Bu summaning qanchasi amaldorlar hisobiga to`g`ri kelishi haqida hozircha aniq ma`lumot yo`q.
Manbalarning xabar berishicha, amaldorlarimiz Antaliya, Tailand, Maldiv orollari, Sochi, Kislovodsk, Yalta kabi dunyoga mashhur xorijning sihatgohlarida dam olishi ko`zlangan.
Ichki turizmni rivojlantirish tashabbusi targ`ib qilinayotgan bir vaqtda amaldorlarimizning xorijda dam olayotganini tushunish qiyin. Savol tug`iladi. O`zbekiston iqlimi, tabiatini avaylay olmayotgan, aksincha, daraxtlarning shiddatli kesilishini oldini olish uchun maxsus qonun va moddalarni ishlab chiqolmagan amaldorlarning o`zlari tabiati go`zal davlatlarda dam olishida adolat bormi?
Go`yoki, daraxtsiz qolayotgan O`zbekiston tabiati chet mamlakatlarga dam olgani chiqa olmagan fuqarolar uchun sovg`a sifatida qoldirilgandek. Xorijning ko`m ko`k, so`lim maskanlarida dam olayotgan amaldorlar O`zbekistonning tabiati uchun jiddiy qayg`urarmikan?
O`zi umuman barcha amaldorlarning bunday tarzda ommaviy dam olishga, o`zga davlatlarga chiqishidan maqsad nima?
Qolaversa, korrupsiyasiz jamiyat qurishga otlangan davlatlarda doimo bu kabi holatlar, shaffof tarzda ommaga ochiqlanadi. Ya`ni, qaysi amaldor qaerda, qancha pulga dam olayotganidan xalq habardor bo`lishi shart. Xalq soliqlari hisobiga yashaydigan hukumat vakillarining qanday dam olishi ommaga ochiqlanadigan ma`lumot bo`lishi lozim. Bu korrupsion holatlarni chek qo`yilishiga ham yordam beradi. Ammo, shu vaqtgacha biron bir matbuot kotibi bu haqida ma`lumotni bergani yo`q.
O`ylaymizki, hukumat tuzulmasi matbuot kotiblari OAV orqali o`z rahbarlarining qaysi davlatga, nechi kunga dam olishga ketgani, qancha harajat davlat hisobidan ketayotgani borasidagi aslida xalq bilishi kerak bo`lgan ma`lumotlarni ochiqlaydi.
Ma`lumotlarga ko`ra, ayni paytda Toshkent shahar hokimi Jahongir Ortiqxo`jaev Maldiv orollarida dam olmoqda.
УЗ
-middle.jpg)
