Kuni kecha saytimizda korrupsiyada ayblangan Xorazm viloyati hokimi o`rinbosari Bahrom Qurbonov haqida maqola e`lon qilingan edi.
Unda Xorazm viloyati hokimi o`rinbosari raislik qilgan tenderda uning ukasi asoschi bo`lgan firma g`olib bo`lgani hikoya qilingandi. Maqolada ushbu korrupsion holatda qatnashgan va Korrupsiyaga qarshi kurash agentligi tomonidan korrupsiyada qo`l urganlikda ayblagan hokim o`rinbosari hamon amalda ekani tanqid ostiga olingan.
Viloyat hokimi o`rinbosari B.Qurbonovning bu korrupsion qissasi aslida ommaviy axborot vositalari tomonidan 1 yildan buyon yoritib kelingan. Shu bilan birga Korrupsiyaga qarshi kurash agentligi ham yil davomida Xorazm viloyatidagi ushbu korrupsion holatni brifinglarda qayta-qayta e`lon qilib kelgan. Ammo, rost24.uz muxbirlarining surishtiruviga ko`ra, agentlik tomonidan jinoyat sifatida talqin etilgan holat yuzasidan prokuratura allaqachonlar o`z oqlovlarini bayon qilgani ma`lum bo`ldi.
Qonun buzilishini oldini oluvchi Qurbonovning ishini organ quyidagicha izohlaydi:
"Xorazm viloyati hokimining kapital qurilish kommunikasiyalar, kommunal xo`jalik va obodonlashtirish masalalari bo`yicha o`rinbosari B.Qurbanov 20 mlrd. so`mlik “Urganch shahridagi perinatal markazini rekonstruksiya qilish” bo`yicha davlat buyurtmasi bo`yicha o`tkazilgan tenderda raislik qilib, tenderda ob`ektni rekonstruksiya qilish ukasi U.Qurbanovga tegishli bo`lgan “Bunyodkor” MChJga berilganligi holati yuzasidan to`plangan hujjatlar qo`shilgan.
Aniqlanishicha, viloyat hokimligi yagona buyurtmachi injiniring kompaniyasi tomonidan 7018648-sonli lot orqali o`tkazilgan boshlang`ich narxi 20.380,6 mln. so`m bo`lgan “Xorazm viloyati Urganch shahridagi perinatal markazini rekonstruksiya qilish” ob`ekti bo`yicha “Bunyodkor” MChJ, “Urganch qurilish beton” MChJ va “Irdimzon qurilish” xususiy korxonasi tomonidan ofertalar taqdim qilingan.
Shuningdek, komissiya tomonidan 1-yig`ma jild xujjatlarini baholash natijalari bo`yicha “Urganch qurilish beton” MChJ 65,6 ball, “Irdimzon qurilish” xususiy korxonasi 80 ball, “Bunyodkor” MChJ 81,7 ball to`plaganligi ma`lum bo`lgan. “Urganch qurilish beton” MChJ o`tish ballini to`plab bilmaganligi sababli tenderdan chetlashtirilgan. 2-yig`ma jildni xujjatlari ochilganda, “Irdimzon qurilish” xususiy korxonasi 20.257,1 mln. so`m va “Bunyodkor” MChJ 20.180,6 mln. so`m taklif qilgan holda tender g`olibi bo`lgan.
Bundan tashqari, tenderda “Bunyodkor” MChJning ta`sischisi U.Qurbanov, viloyat hokimining o`rinbosari, tender komissiyasi raisi B.Qurbanovning ukasi ekanligi, shuningdek tenderda U.Qurbanov emas, jamiyat bo`lim boshlig`i B.Saidov ishonchnoma asosida ishtirok qilgani hamda tender komissiyasi yig`ilishlarida komissiyasi raisi B.Qurbanov ishtirok qilmagani ma`lum bo`lgan.
Tergovda yuqoridagi holatlar Monopoliyaga qarshi kurashish qo`mitasi viloyat hududiy boshqarmasi tomonidan o`rganilib, tender qonuniy o`tkazilgani hamda tender xujjatlarini baholash to`g`ri amalga oshirilganligi haqida ma`lumotnoma taqdim qilingan."
Endi oddiy savollar tug`iladi:
Korrupsiyaga qarshi kurashish agentligi nega amaldorlarni korrupsiyaga qo`l urganlikda ayblab uni oshkora ommaga bot-bot ma`lum qilib kelmoqda. Top-toza amaldorlarni bunday badnom qilishga qarshi agentlik mutasaddilariga nisbatan jazo bo`lishi kerak emasmi?
Agar agentlik ma`lumotlari rost bo`lsa, nega unda prokuratura kabi organlar amaldorlarni oqlab yana o`z ishini davom ettirishga imkoniyat yaratib beradi?
To`g`rirog`i bizga tushuntirib bering. Nimalar bo`layapti? Jamoatchilik bilishga haqqi bor. Tegishli mas`ullardan munosabat kutib qolamiz.
УЗ
