Akmal Saidov Inson huquqlari bo`yicha O`zbekiston Respublikasi Milliy markazi direktori, Oliy Majlis Qonunchilik palatasi Spikerining birinchi o`rinbosari.
63 yoshni qoralagan A.Saidov 20 yildan ortiq vaqt davomida Inson huquqlari bo`yicha O`zbekiston Respublikasi Milliy markazi direktori lavozimida faoliyat yuritib kelmoqda. Ma`lumki, Milliy markaz to`g`risidagi nizomga ko`ra, markaz direktori maqomi Prezident qarori bilan vazir darajasiga tenglashtirilgan. Demak bir shaxs bir vaqtning o`zida ikki vazifada – vazir, Oliy Majlis deputati lavozimida turibdi. Ya`ni, ayni paytning o`zida Oliy Majlis Qonunchilik palatasi deputati, vazir darajasiga tenglashtirilgan.
Bir vaqtning o`zida inson huquqlari bo`yicha O`zbekiston Respublikasi Milliy markazi direktori bo`lgan Akmal Saidovning bu darajasi ham o`ziga yarasha imtiyoz va maqomlarga ega.
Markazni O`zbekiston Respublikasi prezidenti tomonidan lavozimga tayinlanadigan va lavozimidan ozod etiladigan direktor boshqaradi.
Markaz direktori maqomi, tibbiy va transport ta`minoti sharoitlari bo`yicha vazirga tenglashtirilgan.
Shuningdek, maxsus imtiyozlar ham berilgan bo`lib, tibbiy xizmat ko`rsatish O`zbekiston Respublikasi prezidenti Administrasiyasi huzuridagi Bosh tibbiy boshqarmasining muassasalarida amalga oshiriladi.
Va yana bir katta daraja – Markaz direktoriga O`zbekiston Respublikasi adliya organlari va muassasalari xodimlari uchun qonun hujjatlarida nazarda tutilgan O`zbekiston Respublikasi Haqiqiy davlat adliya maslahatchisi maxsus unvoni, martaba darajasi ham beriladi.
Ma`lumki, “O`zbekiston Respublikasi Oliy Majlisi Qonunchilik palatasi deputatining va Senati a`zosining maqomi to`g`risida"gi Qonuniga ko`ra, Qonunchilik palatasi deputatlari o`z vakolatlari davrida ilmiy va pedagogik faoliyatdan tashqari haq to`lanadigan boshqa turdagi faoliyat bilan shug`ullanishlari mumkin emas. Ammo, deputat Akmal Saidov maosh olmasada, haq to`lanadigan, vazir bilan tenglashtirilgan, turli imtiyozlari bor lavozimda ishlab kelmoqda.
Qonunchilikda maosh olmasdan, istagan lavozimda ishlagan holda parlamentdagi deputatlikni davom ettirish mumkinligi qayd etilmagan.
Eslatib o`tamiz, Akmal Saidov avvalgi deputatlik davrida ham Milliy markaz direktori hamda “Demokratlashtirish va inson huquqlari” jurnali bosh muharriri va inson huquqlari markazi raisi sifatida 3 ta lavozimda faoliyat yuritib kelgan.
Qonun ijodkorlari bo`lgan deputatlar bu masalani qanday izohlaydi? Deputatning qonunni buzmaganiga qanday asos ko`rsatiladi. Istagan deputat oylik olmasdan vazir bo`lib ishlashi mumkinmi? O`zbekistonda malakali kadrlar shu qadar tanqismi? Bir nechta o`ta mas`uliyatli faoliyat turida pensiya yoshidagi fuqaroni saqlab qolishga ehtiyoj kattami? Yurtimizda malakali kadrlar shu qadar tanqis ekan, demak bu ta`lim islohotlari natija bermayotganiga ishoradek ko`rinmayaptimi?
УЗ
