Saytimizda fevral oyida «19 yil Ramatov boshqargan «O`zbekiston temir yo`llari»ning badbo`y, kir va chang bosgan vagonlaridan reportaj» nomli material e`lon qilingan edi. Mazkur maqoladan so`ng saytimizga «O`zbekiston temir yo`llari» xodimlarining o`z rahbariyatidan norozi bo`lgan bir qancha murojaatlari kelib tushdi.
Temir yo`lchilar asosan maoshning kamligi, xodimlar pogonli formalarni o`z maoshlariga sotib olishga majbur ekanliklarini bayon qilishgan. Saytimizga xat yo`llagan xodim 18 yildan buyon pogonli formasini o`z hisobidan sotib olishini iddao qiladi.
Shuningdek, «O`zbekiston temir yo`llari» AJning 2021 yil, 23 fevraldagi 61 sonli buyrug`i asosida xodimlarga ovqatlanish uchun to`lanishi kerak bo`lgan ustama narxlar to`lanib berilmayotgani ustidan shikoyat qilgan. Aslida ushbu muammolar kasaba uyushmalari federasiyasi yordami bilan hal etilishi kerak bo`lgan muammolardir. Biroq, bizga murojaat qilgan «O`zbekiston temir yo`llari» xodimlarining aytishicha, kasaba uyushmasidan foyda yo`q.
Rost24.uz sayti xodimlarining ushbu murojaatiga javob olish uchun «O`zbekiston temir yo`llari» AJning marketing va servis xizmatlari bo`yicha direktori Sunnatilla Hamidovga murojaat qildi.
Sunnatilla Hamidovning aytishicha, Toshkent – Qo`ng`irot, Toshkent – Termiz yo`nalishdagi 40 yillik poezdlar yaqin 3 yil ichida almashtiriladi.
Bundan tashqari «O`zbekiston temir yo`llari» aksionerlik jamiyati eski poezdlarning barchasidan voz kechmoqchi emas, ularning ichki ko`rinishini yaxshilab ta`mirlatish rejalashtirilgan.
Temir yo`l xodimlarining kiyimlari muammosiga kelsak, Sunnatilla Hamidovning ta`kidlashicha yo`l kuzatuvchilarning pogonli kiyimlari maxsus kiyim hisoblanmaydi. Shuning uchun ularning puli ham to`lab berilmaydi.
Mehnat kodeksiga ko`ra, ish beruvchi xodimni o`z hisobidan maxsus kiyimlar bilan ta`minlashi shart. Agar Sunnatilla Hamidovning so`zlariga ishonilsa, yo`l kuzatuvchilarning pogonli kiyimlari maxsus kiyimlar sirasiga kirmasa, xodimlar bu kiyimni sotib olishga va uni kiyishga ham majbur emas bo`ladi.
Intervyuning to`liq shaklini quyida ko`rishingiz mumkin.