Jamoatchilik muhokamasiga qo`yilgan hujjat loyihalarida kuz-qish mavsumida ehtiyojmand oilalarni qo`llab-quvvatlash choralari nazarda tutilmoqda. Ular orasida bir martalik moddiy yordam, suyultirilgan gaz uchun kompensasiya hamda elektr va tabiiy gaz bo`yicha mavjud yordam muddatlarini uzaytirish takliflari bor.
Xususan, 2026 yil noyabr oyida ehtiyojmand oilalarga 1 million so`mdan bir martalik moddiy yordam ajratish taklif qilinmoqda. Bu qishki xarajatlar ortadigan davrda oilalarga qo`shimcha moliyaviy ko`mak bo`lishi kutilmoqda.
Shuningdek, 1 noyabrdan aholiga sotiladigan suyultirilgan gaz narxini bir kilogramm uchun 5 ming so`m etib belgilash nazarda tutilmoqda. Bunda ehtiyojmand oilalarga 2030 yil 1 yanvarga qadar oyiga 20 kilogrammgacha gazning har bir kilogrammi uchun 3 ming so`mdan kompensasiya to`lash taklif etilmoqda.
Qo`llab-quvvatlash choralari boshqa energiya xarajatlarini ham qamrab oladi. Loyihalarda elektr energiyasi va tabiiy gaz bo`yicha kompensasiya muddatini 2028 yil 1 aprelgacha, ko`mir uchun yordam muddatini esa 2029 yil 1 yanvargacha uzaytirish ko`zda tutilmoqda.
Gazlashmagan va tabiiy gaz etib borishi qiyin hududlarda esa isitish mavsumida elektr energiyasining bazaviy me`yorini 200 dan 350 kVt·soatgacha oshirish taklif qilinmoqda.
Loyihalarda 1 noyabrdan isitish va issiq suv uchun yangi tariflarni joriy etish ham nazarda tutilgan.
Taklif etilayotgan moddiy yordam va kompensasiyalar ehtiyojmand oilalarning qishki xarajatlarini engillashtirishga xizmat qilishi kutilmoqda.
Ushbu choralar hozircha loyiha bosqichida bo`lib, jamoatchilik muhokamasiga qo`yilgan.
УЗ
