Toshkent shahar hokimi o`rinbosari Durdona Rahimova boshchiligidagi ishchi guruh talabalar yotoqxonasiga borib, vaziyatni joyida o`rgangan. O`rganishda tadbirkor, mas`ullar, prokuratura xodimlari hamda Toshkent davlat texnika universiteti rahbariyati ishtirok etgan.
Ma`lum bo`lishicha, Talabalar shaharchasida davlat-xususiy sheriklik asosida qurilgan mazkur talabalar turar joyi hali rasman foydalanishga topshirilmagan. Ob`ektning kadastr hujjatlari rasmiylashtirilmagan va foydalanish uchun zarur ruxsatlar olinmagan.
Bundan tashqari, binoning issiq suv va isitish tizimlari hali ulanmagan. Yong`in xavfsizligi bo`yicha ham ob`ekt amaldagi talablarga to`liq javob bermaydi.
Shu sababli talabalar xavfsizligini ta`minlash maqsadida ular mazkur ob`ektdan chiqarilib, universitetning mavjud talabalar turar joylari hamda ijara xonadonlariga joylashtirilgan.
Toshkent shahar hokimligi ma`lum qilishicha, ob`ektga avval joylashtirilgan talabalardan undirilgan to`lovlar tadbirkor tomonidan uch kun muddatda to`liq qaytarib beriladi.
Ayni paytda ob`ektning kadastr hujjatlarini rasmiylashtirish va undan foydalanish uchun zarur ruxsatlarni olish bo`yicha ishlar davom ettirilmoqda.
Holat bo`yicha barcha jihatlar o`rganilib, talabalarning xavfsizligi va qonuniy manfaatlarini ta`minlash choralari ko`rilmoqda.
УЗ
