O`zbekistonda bir yillik elektromobillar sotuvi hajmi 62,6 foizga oshdi

Mamlakatda bir yillik elektromobillar sotuvi hajmi 62,6 foizga oshdi. Bu haqda Iqtisodiy tadqiqotlar va islohotlar markazi tahlilida qayd etilgan.

Avtomobil bozoridagi vaziyat

Joriy yil boshidan beri O`zbekiston avtomobil bozorida barqaror faollik saqlanmoqda. Iyun oyida engil avtomobillar savdosi hajmi maydagidan 3 foizdan ko`proq oshdi.

Yanvar—iyun oylarida engil avtomobillar savdosi taxminan 446 ming donadan iborat bo`ldi. Bu 2024 yil mos davriga nisbatan 23 foizga kam.

“Bunday pasayish, asosan, savdolarning katta qismi to`g`ri keladigan ikkilamchi bozordagi faollikning susayishi bilan izohlanadi. Mazkur omil umumiy bozor faoliyati pasayishining asosiy sababi bo`ldi”, deyiladi tahlilda.

Birlamchi avtomobil bozoridagi vaziyat

Iyunda birlamchi engil avtomobillar savdosi maydagiga nisbatan 2,6 mingtaga (10 foizdan ortiq) o`sdi. Bir oy davomida 23,7 ming dona mahalliy ishlab chiqarilgan yangi engil avtomobillar sotildi. Bu ko`rsatkich maydagiga qaraganda 15,6 foiz ko`p.

Yangi va xorijda ishlab chiqarilgan engil avtomobillar segmentida salbiy dinamika kuzatildi. Iyundagi savdo hajmi taxminan 4 ming donani tashkil etib, maydagiga nisbatan 12,6 foizga kamaydi.

Ikkilamchi avtomobil bozori

Markaz tahliliga ko`ra, o`tgan oyda 52 ming donadan ortiq foydalanilgan engil avtomobillar sotilgan. Mazkur raqam maydagiga nisbatan 0,4 foizga kam. Umuman olganda, ikkilamchi bozorda yillik o`sish 1,3 foizni tashkil etgan.

Elektromobil bozoridagi vaziyat

Iyun oyida 5,1 ming dona engil elektromobillar sotildi. Bu maydagiga qaraganda 1,7 foizga kam. Oylik savdolar bir oz kamayishga qaramay, yillik ko`rsatkichlarda bozor barqaror dinamikani namoyon etmoqda.

Joriy yil birinchi yarimida sotilgan elektromobillar soni 28,8 ming donaga etdi. Mazkur ko`rsatkich 2024 yil mos davridagiga nisbatan 62,6 foizga ko`p. Elektromobillar savdosining eng katta o`sishi Sirdaryo, Xorazm va Qashqadaryo viloyatlarida qayd etilgan.

2025 yil 1 aprel holatiga ko`ra, O`zbekistonda jami 65,2 mingta elektromobil ro`yxatga olingan. Toshkent shahri (49,7 mingta) elektromobillar soni bo`yicha peshqadam bo`lib qolmoqda. Eng kam elektromobillar Surxondaryo viloyatida — 198 dona.

Avtomobil bozori kutilmalari

Amerikaning Boston Consulting Group kompaniyasi prognozlariga ko`ra, O`zbekiston avtomobil bozori 2030 yilgacha har yili o`rtacha 6 foizga o`sadi. Mamlakat avtomobil sektori yaqin 3–5 yilda rivojlanishiga quyidagi uch asosiy tendensiya ta`sir qiladi:

elektromobillar va gibrid avtomobillar (XEV) savdosining oshishi;
yanada yuqori toifadagi (premium) modellarga o`tish;
SUV (yo`l va yo`ldan tashqari — off-road haydov uchun mo`ljallangan) modellarga bo`lgan barqaror xaridorlar talabi.

Shu bilan birga, avtomobil bozori rivojida mamlakat iqtisodiy o`sish sur`ati, valyuta kursi va Markaziy bank asosiy stavkasi hal qiluvchi rol o`ynashi ta`kidlangan.