Bugun, 17 iyun kuni O`zbekiston Milliy matbuot markazida “Biznesni rivojlantirish banki” ATB tomonidan “Raqamli mijozlar sonini oshirish: natijalar va rejalar” mavzusida matbuot anjumani bo`lib o`tdi.
Anjumanda ta`kidlanishicha, endilikda BRB Mobile ilovasi orqali 10 million so`mgacha bo`lgan barcha tranzaksiyalar foizsiz amalga oshiriladi. Bu yangilik mijozlarga moliyaviy qulaylik yaratish bilan birga, raqamli xizmatlarga o`tishni jadallashtirishga xizmat qiladi.
Tadbirda bank vakillari tomonidan loyihalar, kelajak rejalar va xavfsizlik choralari haqida ham atroflicha ma`lumot berildi.
Xususan, bankning strategiyasida 2026 yil oxiriga qadar mobil ilova foydalanuvchilari sonini 1 million nafarga etkazish vazifasi belgilangan. Hozirgi kunda ilovada ro`yxatdan o`tgan mijozlar soni 546 ming nafardan oshgan. Mazkur maqsadga 2025 yil oxiriga qadar erishgan holda, 2026 yil oxirida foydalanuvchilar sonini 1,6 million nafardan oshirish ko`zda tutilmoqda.
“Hozirda biz o`zini o`zi band qilgan aholiga raqamli moliyaviy echimlar taklif qilyapmiz. Ayni damda bu loyihalarda 28 mingdan ortiq foydalanuvchi faol ishtirok etmoqda. Kelgusida bu yo`nalishni kengaytirish, to`lov tizimlari bilan integrasiya qilish va xizmat ko`rsatishda qulayliklar yaratish ustida ishlayapmiz”, — dedi "BRB TECH" IT direktori Abdulla O`taev.
Uning so`zlariga ko`ra, o`tgan yilning dastlabki 5 oyida mobil ilovadan ro`yxatdan o`tgan yangi mijozlar soni 42 ming nafarni tashkil qilgan bo`lsa, joriy yilning yanvar–may oylarida mazkur ko`rsatkich 210 ming nafarga etkazildi. Bu bankning raqamli mijozlari soni shiddat bilan o`sib borayotganini ko`rsatadi.
Shuningdek, joriy yilning dastlabki 5 oyi davomida 2,3 millionga yaqin to`lov tranzaksiyalari amalga oshirilgan bo`lib, bu o`tgan yilning mos davridagi 1,9 millionta ko`rsatkichdan ancha yuqori. Kredit va bank kartalari olish uchun taqdim qilingan arizalar soni esa 66 mingtadan ortiq bo`lib, bu o`tgan yilning shu davriga nisbatan 7,3 barobarga oshgan.
IT direktor Abdulla O`taevning ta`kidlashicha, foydalanuvchilarning asosiy xavotirlaridan biri — xavfsizlik masalasi. Shu bois, bank tomonidan ilg`or “Session antifraud” tizimi joriy etilgan.
“Masalan, agar siz bir qurilmada ilovaga kirgan bo`lsangiz, boshqa qurilmada ham foydalanish uchun birinchi qurilmangizdan ruxsat so`rashingiz kerak bo`ladi. Faqat siz ekanligingiz tasdiqlangandan keyingina ikkinchi qurilmada ham foydalanishga ruxsat beriladi. Biz shaxsiy ma`lumotlar va moliyaviy resurslar xavfsizligini ana shunday ta`minlaymiz”, — dedi u.
Ma`lumotlarga ko`ra, bank kredit ajratish jarayonlarida ham sun`iy intellekt va biometrik texnologiyalarni joriy etgan. Har bir kredit so`rovi Face ID, SMS orqali shaxsni tasdiqlash va 24 soatlik monitoring orqali nazorat qilinadi.
Bankning 52 ta xizmatidan 43 tasi (ya`ni 83%) raqamlashtirilgan. Yuridik mijozlar uchun mo`ljallangan “BRB Internet banking” sahifasida 33 mingdan ortiq foydalanuvchi ro`yxatdan o`tgan bo`lib, bu o`tgan yilga nisbatan 47 foizga o`sgan. Oxirgi 5 oyda yuridik shaxslar tomonidan 32,7 trln so`mlik 1,9 milliontadan ortiq tranzaksiya amalga oshirilgan.
Tadbir so`ngida jurnalistlar o`zlarini qiziqtirgan barcha savollarga javob oldilar. Bank vakillari raqamli xizmatlarni yanada takomillashtirish, xavfsizlikni kuchaytirish va innovasion echimlar orqali mijozlar ishonchini mustahkamlash borasidagi ishlar izchil davom ettirilishini ta`kidlashdi.
УЗ
