1 martdan qonunchilikda nimalar o`zgaradi?

Tuman va shahar hokimliklariga qo`shimcha vakolatlar beriladi

1martdan boshlab, mahalliy hokimliklar 10 ming m² dan kichik va 6 oy davomida sotilmagan ko`chmas mulk ob`ektlarini yangi loyihalarni ishga tushirish va ish o`rinlari yaratish sharti bilan tadbirkorlarga 10 yil muddatga ijaraga berish yoki sotish huquqiga ega bo`ladi.

Harbiy xizmatchilar uchun ijtimoiy himoya kuchaytiriladi

Harbiy xizmatchilarga turar joyni ijaraga olish uchun har oylik pul kompensasiyasi 20% ga oshiriladi. 1 iyundan esa, 10 yildan ortiq harbiy xizmat o`taganlarga ipoteka kreditlarining dastlabki badali 35% ga qisqaradi.

Pensiyani avtomatik tayinlash tizimi joriy etiladi

Yoshga doir pensiyalar avtomatik ravishda tayinlanadi. Pensiyalar Pensiya jamg`armasining axborot tizimi asosida avtomatik tarzda hisoblanadi. Ushbu tizim fuqarolarga pensiyaga chiqish vaqti kelgani haqida xabar beradi.

Skuter boshqarish uchun haydovchilik guvohnomasi talab etiladi

Moped va skuterlarni boshqarish uchun haydovchilik guvohnomasi talab etiladi. Ushbu yangi tartib Vazirlar Mahkamasining 2024-yil 8-iyulda qabul qilingan qarori asosida joriy etiladi. Skuter va mopedlar uchun tegishli toifadagi guvohnomaga ega bo`lgan shaxslar transport vositasini boshqarishi mumkin.

"Yashil to`lov" platformalari ishga tushadi

Ekologiya vazirligi huzuridagi "Yashil xayriya" jamg`armasi orqali daraxt va butalarni ekish uchun xayriya mablag`lari to`planadi. Xayriyalar "Yashil olam" va "Yashil to`lov" platformalariga yo`naltiriladi. Jamg`arma mablag`lari daraxt ekish, sug`orish tizimlarini o`rnatish va hududni obodonlashtirish kabi ekologik ishlarga sarflanadi.

Mobil malaka oshirish xizmatlari

Qoraqalpog`iston va viloyatlarda maktabgacha ta`lim tashkilotlari pedagoglari uchun mobil malaka oshirish xizmatlari joriy etiladi. Ushbu xizmatlar avtobuslar orqali amalga oshiriladi va pedagoglar malaka oshirishni pulli asosda olishadi.

Nogiron bolalar uchun kunduzgi parvarish xizmati yo`lga qo`yiladi

1 martdan nogiron bolalar uchun davlat-xususiy sheriklik asosida kunduzgi parvarish xizmati yo`lga qo`yiladi. Xizmat ota-onalar bilan tuzilgan shartnoma asosida taqdim etiladi va 3 yoshdan 18 yoshgacha bo`lgan bolalar uchun mavjud bo`ladi. 1 oktyabrga qadar barcha hududlarda joriy etilishi kutilmoqda.

Ekologik stikerlar beriladi

Transport vositalariga ekologik stikerlar beriladi. Ushbu stikerlar transport vositalarining ekologik toifasini (toza, o`rta, zararli) aniqlashga yordam beradi. Shuningdek, ekologik me`yorlarga mos kelmaydigan transport vositalariga ekologik kompensasiya to`lovlari joriy etiladi.

Boshqa o`zgarishlar

Qishloq xo`jaligi mahsulotlarini jismoniy shaxslardan xarid qilgan korxonalar uchun soliq maqsadida elektron ma`lumotlar bazasi yuritiladi.

Yagona platformada davlat organlarining rasmiy veb-saytlari yuritiladi.

Traktor va kombaynlar uchun GPS qurilmasi o`rnatmasdan ro`yxatdan o`tkazish taqiqlanadi.

Kam ta`minlangan oilalar uchun ijtimoiy yordamlar, jumladan, nogironligi bo`lgan bolalar uchun kunduzgi parvarish subsidiyalari taqdim etiladi.

Mulkchilik shaklidan qat`i nazar barcha tashkilotlarda mehnat huquqlari va mehnat muhofazasi onlayn reyting asosida baholanadi.