Pulni tejashga intilayotgan odamning surati: Rossiyada ishlayotgan mehnat migrantining o`rtacha statistik portreti tuzildi

Tahlilchilar 2024 yilda Rossiyada ishlayotgan mehnat migrantining o`rtacha statistik portretini tuzdi. Bu haqda 24.kg xabar berdi . U O`zbekistondan kelgan, Moskva yoki shu nomdagi oblastda yashovchi 28 yoshli, turmush qurgan yigit bo`lib chiqdi. Bunday ma`lumotlar «Migrant servis» platformasi mutaxassislari tomonidan o`tkazilgan tadqiqot davomida olingan. Ular 63 mingga yaqin obunachini qamrab olgan so`rovnoma o`tkazdi va uning natijalariga ko`ra hozir Rossiyada ishlayotgan oddiy mehnat migrantining portretini aniqladi.

Migrantlar orasida eng katta guruhni O`zbekistondan kelganlar (55,4 foiz) tashkil qilgan. Undan keyingi o`rinda Tojikiston (39,89 foiz) fuqarolari. Armaniston, Qirg`iziston, Belarus va Qozog`istondan kelganlar (4,82 foiz) nisbatan ozchilikni tashkil qiladi.

Chet ellik ishchilarning katta qismi turmush qurgan. So`rov natijalariga ko`ra, 14 yoshdan oshgan migrantlarning yarmidan ko`pi (51 foiz) shunday maqomga ega. Uchdan biridan kamrog`i (28 foiz) hech qachon turmush qurmagan, 5 foizi ajrashgan, yana 3 foizi beva qolgan.

Oila va bolalar eng oliy qadriyat

«Migrantlar uchun oila va bolalar eng oliy qadriyat», deydi tahlilchilar. «Asosiy e`tibor uyda qolgan oilasini qo`llab-quvvatlashga qaratilgan, bu pul o`tkazmalari chastotasida ko`rinib turibdi: 67 foizi har chorakda pul jo`natadi, 41 foizi esa daromadlarining 50 foizdan ortig`ini uyiga yuboradi».

So`rovda ishtirok etganlarning aksariyati har oy mehnat patenti uchun haq to`laydi (83 foiz), 47 foizi patentga ish haqining 10 foizidan kamini, 27 foizi esa 11-20 foizini sarflaydi. Shuningdek, 47 foizi ish haqining 10 foizi yoki undan kamini ijara haqiga sarflashini ta`kidlagan. Shu bilan birga, qariyb 45 foizi hech qachon uyini o`zgartirmaganini, 38 foizi esa yiliga bir yoki ikki marta shunday qilishini bildirgan.

Oziq-ovqat ham byudjetning katta qismi bo`lib, migrantlarning 44 foizi o`z daromadining 10 foizi yoki undan kam qismini sarflaydi. 26 foizi oziq-ovqatga 11 foizdan 20 foizgacha pul sarflashini ko`rsatdi. Qolgan 30 foizi esa daromadining 20 foizdan ortig`ini oziq-ovqat mahsulotlariga sarflaydi.

«Umuman olganda, Moskva va shu nomdagi mintaqadagi migrantning portreti pulni tejashga intilayotgan odamning suratidir», deyiladi Migrasiya xizmati xulosalarida. «U o`z daromadining katta qismini uyiga jo`natib, uy-joy va transport xarajatlarini minimallashtirishga harakat qiladi. Bundan tashqari, u o`zini tibbiy xizmatlar va o`yin-kulgilardan cheklab, moliyaviy mablag`larini tejashni afzal ko`radi».