Otabek Umarov Osiyo olimpiya kengashi direktori bilan uchrashdi

Osiyo Olimpiya kengashi vise-prezidenti Otabek Umarov Osiyo Olimpiya kengashi direktori, Butunjahon suzish federasiyasi prezidenti Husayn Al Musallam bilan uchrashdi. 

Martabali mehmon poytaxtdagi Olimpiya va Paralimpiya shon-shuhrati muzeyida rasmiylar bilan uchrashuv o`tkazdi.

Unda Sport vaziri Adham Ikramov, Osiyo Olimpiya kengashi vise-prezidenti Otabek Umarov, MOQ Bosh kotibi Oybek Kasimov ishtirok etishdi.

Janob Musallam dastavval o`rganish ishlari bo`yicha o`z xulosalari bilan o`rtoqlashdi. Unda tayyorgarlik yaxshi ketayotgani, Olimpiya shaharchasidagi qurilish ishlari bir maromdaligi, shuningdek, tashkiliy ishlar ham ko`ngildagidek yo`lga qo`yilganini ta`kidladi. Shuningdek, e`tibor qaratilishi kerak bo`lgan qator masalalar bo`yicha ham o`z tavsiyalarini berib o`tdi. 

Suhbat davomida tomonlar o`zaro hamkorlikning keyingi bosqichiga oid qator istiqbolli rejalarni ko`rib chiqishdi.

Shundan so`ng Al Musallam zamonaviy qiyofa ochgan muzey bilan yaqindan tanishdi. Unda mehmonga o`zbek sportining shonli tarixi, bugungi kundagi muvaffaqiyatlari haqida batafsil ma`lumot berildi. Yakunda u faxriy mehmonlar kitobiga o`z dil izhorlarini yozib qoldirdi.

Shuningdek, u Olimpiya shaharchasida bo`lib, qurilish ishlarining bugungi holatini o`rgandi. Unga MOQ Bosh kotibi Oybek Kasimov hamda qurilish ishlariga mas`ul Xitoyning SAMS Engineering kompaniyasi vakillari hamrohlik qilishdi. 

Shundan so`ng O`zbekiston Milliy Olimpiya qo`mitasida tashkiliy ishlar bo`yicha uchrashuv o`tkazildi. Yig`ilishda Toshkent-2025 direksiyasi xodimlari O`yinlarga tayyorgarlik yuzasidan taqdimotni namoyish qilishdi.

Unda olib borilayotgan katta hajmdagi hozirlik, O`yinlar dasturiga kiritiladigan sport turlari va ular o`tkaziladigan ob`ektlar, delegasiyalarning tahminiy soni, transport-logistika masalasi va shu kabi tashkiliy mavzular haqida atroflicha ma`lumot berildi. O`z o`rnida, Husayn Al Musallam taqdimot yuzasidan fikr bildirar ekan, anti-doping, viza va aviaqatnovlar to`g`risida ham to`xtalib, ushbu yo`nalishlarni ham batafsil o`rganish kerakligi yuzasidan fikr bildirdi.