Eltib berish (dostavka) xizmati ommalashayotgani kimlarningdir “ishtahasini ochib yubordi”

Endi moped va skuterlar uchun ham alohida davlat raqami belgilari joriy etiladi.

Vazirlar Mahkamasining qarori bilan moped va skuterlarga egalik qilish uchun salkam 1 million qo`shimcha to`lov qilish belgilanmoqda (Texnik ko`rikdan tashqari. Texnik ko`rikning eng arzoni 1,7 million so`m).

Normativ-huquqiy hujjatlar loyihalari muhokamasi portaliga Vazirlar Mahkamasining “Foydalanishda bo`lgan moped yoki skuterlarni davlat ro`yxatidan o`tkazish bo`yicha vaqtinchalik nizomni tasdiqlash haqida” qarori loyihasi qo`yildi.

Yo`l harakati xavfsizligi sohasidagi davlat xizmatlarini ko`rsatishda fuqarolarga qo`shimcha qulayliklarni yaratish maqsadida, vaji bilan qabul qilinayotgan qaror loyihasiga ko`ra, 1 iyuldan boshlab moped va skuterlar uchun ham davlat raqami belgilari joriy qilinadi.

Qarorda “Moped yoki skuterlarni ro`yxatdan o`tkazish hamda ularga ro`yxatdan o`tkazish davlat raqami belgilarini va ro`yxatdan o`tkazilganligi to`g`risidagi guvohnomalarni berish uchun undiriladigan to`lovlar Ichki ishlar vazirining 2011 yil 23 noyabrdagi 174-sonli (ro`yxat raqami 2303) buyrug`ida mototransport vositalari uchun belgilangan summada amalga oshiriladi”, deyilgan.

Mazkur buyruq bo`yicha ro`yxatdan o`tkazish, davlat raqami va guvohnomalarni berish narxlari quyidagicha belgilab berilgan:

- Mototransport vositalari, motorollerlar va tirkamalarga (yarim tirkamalar) ro`yxatdan o`tkazish davlat raqami belgilari berish BHMning 1,75 baravari miqdorida – 595 ming so`m;

-   Ro`yxatdan o`tkazish BHMning 10 foizi – 34 ming so`m;

- Avtomototransport vositasi ro`yxatdan o`tkazilganligi to`g`risida guvohnomani berish uchun BHMning 70 foizi – 238 ming so`m;

-  Sotish uchun bir dona ma`lumotnoma berish BHMning 10 foizi – 34 ming so`m.

Bitta skuter yoki mopedga egalik qilish uchun enda jami 901 ming so`m to`lov qilish lozim bo`ladi.

Qarorda texnik ko`rik ham aytilgan. Majburiy texnik ko`rikning eng arzon narxi BHMning 5 barobari etib belgilangan. Ya`ni 1,7 million so`m.

Mazkur vaqtinchalik nizom joriy yil 31 dekabrgacha amal qilishi va 2025 yil 1 yanvardan boshlab ro`yxatga olinmagan bu turdagi transport vositalaridan foydalanish amaldagi qonunchilik talablari asosida taqiqlanishi ham belgilab qo`yilgan.

Dvigatelining ish hajmi 25 sm3 va undan ortiq, lekin 50 sm3dan oshmaydigan, shuningdek elektrodvigatelining quvvati 0,25 kilovatt va undan ortiq, lekin 4 kilovattdan oshmaydigan, konstruktiv tezligi soatiga 25 kilometr va undan ortiq, lekin 50 kilometrdan oshmaydigan transport vositalari (moped va skuter) uchun alohida ro`yxatdan o`tkazish davlat raqami belgilarini olish uchun quyidagi soddalashtirilgan tartib belgilanmoqda:

• Moped yoki skuterlarning texnik tavsiflari texnik jihatdan tartibga solish sohasidagi normativ hujjatlar, shuningdek, yo`l harakati xavfsizligini ta`minlash sohasidagi me`yorlar talablariga mos kelishi kerak.
• Moped yoki skuterlar egalari tomonidan ro`yxatlash bo`linmalariga olib kelinadi va ular soddalashtirilgan tartibda davlat ro`yxatidan o`tkaziladi.
• Moped yoki skuterlarni davlat ro`yxatidan o`tkazish uchun moped yoki skuter egasi yoki uning vakili ro`yxatlash bo`linmalariga quyidagi hujjatlarni taqdim etadi:
• moped yoki skuter egasi yoki uning vakilining shaxsini tasdiqlovchi hujjat;
• moped yoki skuter egasi yoki uning vakilining belgilangan namunadagi arizasi;
• moped yoki skuterning texnik tavsiflari aks ettirilgan savdo tashkilotlari (ishlab chiqaruvchi, uning vakili yoki vositachi (distribyutorlik, dilerlik) tashkilotlar) tomonidan berilgan hujjat (rusumi, identifikasiyalovchi rama va dvigatellar raqamlari, dvigatelining quvvati, to`liq vazn va boshqalar aks ettirilgan hujjat);
• moped yoki skuterga bo`lgan mulkiy va boshqa ashyoviy huquqlarni tasdiqlovchi hujjat yoki xarid qilinganligini tasdiqlovchi hujjat (agar mavjud bo`lsa);
• moped yoki skuterni ro`yxatdan o`tkazish hamda ularga ro`yxatdan o`tkazish davlat raqami belgilarini va ro`yxatdan o`tkazilganligi to`g`risidagi guvohnomalarni berish uchun to`lovlar to`langanligini tasdiqlovchi bank to`lov hujjati (elektron to`lov tizimlar orqali to`lov amalga oshirilgan hollar bundan mustasno).
• Agar moped yoki skuter uchun xatboshilaridagi hujjatlar mavjud bo`lmasa, haqiqatdan ham ushbu moped yoki skuter shu shaxsga tegishli ekanligi to`g`risida, o`zi yashab turgan mahalladan ma`lumotnoma taqdim etiladi.
• Shuningdek, egasi ushbu moped yoki skuterni qaerdan qachon olganligi to`g`risida erkin shakldagi tushuntirish xati yozib beradi.
• Ro`yxatlash bo`linmalari tomonidan moped yoki skuterlarning rusumi, identifikasiyalovchi rama va dvigatellar raqamlarining (keyingi o`rinlarda – texnik ko`rsatkichlari) taqdim etilgan hujjatlarda ko`rsatilgan ma`lumotlarga to`g`ri kelishi predmeti yuzasidan texnik ko`rikdan o`tkaziladi.