Amaldorlar changalidan saqlab qolingan ijtimoiy obe`ktlar

So`nggi yillarda O`zbekistonda jamoatchilik fikri shakillanmoqda, natijada mansabdor-u amaldorlar xalq istagi bilan hisoblashishga majbur bo`lmoqda.

Shu kungacha aynan jamoatchilikning noroziligi va e`tirozlari tufayli bir qancha inshoot va yashil maskanlar asrab qolindi. Rost24.uz ularning bir qanchasini sanab o`tadi.

Moviy gumbazlar xiyoboni

2021 yil 17 dekabrdagi prezident qarori bilan poytaxtda «Istiqlol» majmuasi tashkil etilib, u erda yodgorlik kompozisiyasi barpo etilishi belgilangan edi. Majmuani qurish uchun Sharof Rashidov, Islom Karimov va Afrosiyob ko`chalari oralig`ida, Markaziy univermag (MUM) qarshisidagi hudud – “Moviy gumbazlar xiyoboni"ning tanlangani jamoatchilikning ko`plab noroziligiga sabab bo`ldi. Hatto odamlar maxsus platformada petisiya uchun imzo to`plashni boshladi. Natijada, Toshkent hokimligi ushbu loyiha haqida qo`shimcha hisobot berishga majbur bo`ldi. Oradan biroz vaqt o`tib, “Istiqlol” majmuasi loyihasi Toshkent viloyatining Qibray tumaniga ko`chirildi.

Respublika Onkologiya markazi

2022 yil oxirida Onkologiya markazi va uning ikki filiali yangi qurilayotgan onkologiya kompleksiga ko`chirib o`tkazilishi rejalashtirilgandi. Markaz binosi va yam-yashilligi bilan ajralib turuvchi hududi elektron auksionga qo`yib yuborildi. Keyin esa “jamoatchilikning qarshi fikridan kelib chiqqan holda, tegishli topshiriqqa asosan”, onkologiya markazi hamda uning poytaxt va Toshkent viloyati filiallarini auksion orqali sotish jarayoni to`xtatildi va savdodan olib tashlandi.

Buxoro shahar markazi

2023 yil boshida Buxoro shahri qoq markazida turizm markazi tashkil etilishi va qurilish doirasida shaharning Ibrohim Mo`minov va Mustaqillik ko`chalari o`qi atrofidagi barcha bino va inshootlar, jumladan, katta sport majmuasi ham buzilishi belgilandi. Loyiha e`lon qilinishi bilan buxoroliklar markazning bu hududda qurilishidan norozi bo`lib, prezidentga murojaat yo`lladi. Shundan so`ng Qurilish va uy-joy kommunal xo`jaligi vaziri Botir Zokirov markaz qurilishi hali loyiha ekanligi, jamoatchilik muhokamsiga qo`yilishi haqida ma`lum qildi. Keyinroq, markaz uchun boshqa hudud tanlanishi aytildi.

Toshkent Botanika bog`i

Oktyabr oyi boshlarida Toshkent shahridagi Botanika bog`i Fanlar akademiyasi tasarrufidan Toshkent shahar hokimligiga o`tkazilishi va u erda attraksionlar qurilishi haqida hujjat imzolangan edi. Bu loyiha keskin qarshiliklarga uchradi: Ekopartiya vakillari, jurnalistlardan tortib, ijtimoiy tarmoq foydalanuvchilarigacha o`z noroziligini ochiqcha namoyish etdi. Keyin esa Toshkent shahar hokimligi "ushbu ilmiy dargohning ahamiyatini e`tirof etishini va uni istirohat bog`iga aylantirishga yo`l qo`ymasligini" bildirdi. Shunday qilib, bu loyiha ham bekor bo`ldi.

“Madaniyat va Ma`rifat” telekanali

Shu yilning aprel oyida “Madaniyat va Ma`rifat” telekanali “Karvon” nomi bilan qayta tashkil etilishi kutilayotgani ma`lum bo`lgandi. Bu haqdagi prezident qarori loyihasida, telekanal Madaniyat va turizm vazirligi tizimiga o`tkazilishi belgilangan. Bu esa jamoatchilik noroziligiga, ayniqsa, ziyoli qatlamning keskin tanqidlariga sabab bo`ldi. Tanqidlardan so`ng madaniyat va turizm vaziri Ozodbek Nazarbekov “Madaniyat va ma`rifat” telekanali nomi “Karvon”ga o`zgartirilmasligini ma`lum qildi.

Shuningdek, aholining qat`iy kurashlari bilan Toshkent shaharida ko`pqavatli uylar atrofidagi bir qancha hududlar ham hokimlar changalidan asrab qolingan.