Eron va Afg`oniston chegarasidagi vaziyat og`irlashmoqda

Ikki davlat o`rtasidagi ziddiyat suv bo`yicha keskinlik fonida sodir bo`ldi.

Tolibon vakili va Eron davlat matbuotiga tayanib, Reutersʼning yozishicha, Eron va Afg`oniston o`rtasidagi chegara posti yaqinida sodir bo`lgan otishmada ikki eronlik chegarachi va bir Tolibon jangchisi halok bo`lgan.

Sputnikʼning biroz oldin bergan xabarida Eron tarafdan bir nafar harbiy halok bo`lgani va ikki chegarachi jarohat olgani rasman tasdiqlangan. Tolibon tomoni esa, 10 kishigacha yaralangan, 2 nafar o`ldirilganlarning suratini e`lon qildi.

Ikki davlat o`rtasidagi ziddiyat suv bo`yicha keskinlik fonida sodir bo`ldi.

Eron Tolibonni Hilmand daryosidan Eronning qurib qolgan sharqiy hududlariga suv oqimini cheklab, 1973 yilda tuzilgan shartnomani buzganlikda aybladi, bu ayblovni Tolibon rad etdi.

• «Bugun Nimroz viloyatida Eron chegara kuchlari Afg`oniston tomon o`t ochdi, bu esa qarshi javob bilan kutib olindi», — dedi Tolibon boshqaruvidagi Ichki ishlar vazirligi matbuot kotibi Abdul Nafi Takor.
   

Shanba kuni Eronning rasmiy IRNA axborot agentligi “ikki eronlik chegarachi halok bo`lganini va ikki nafar Eron fuqarosi yaralanganini" ma`lum qilgan.

• «To`qnashuvdan so`ng Eron hukumati keyingi ogohlantirishgacha to`qnashuv joyini emas, yirik savdo o`tish joyi bo`lgan Milak – Zaranj chegara postini yopib qo`ydi», deyiladi IRNA axborot agentligi xabarida.
   

Tolibon mudofaa vazirligi matbuot kotibi Enayatulloh Xovarazmiy aytishicha, bugun yana Nimroz viloyati Kong tumanining chegara hududlarida Eron askarlari tomonidan otishma yuz bergach mojaro boshlangan.

• «Afg`oniston Islom Amirligi har qanday muammo uchun muloqot va muzokaralarni oqilona yo`l deb biladi. Urush va salbiy harakatlar uchun bahona topish tomonlardan hech birining manfaatiga to`g`ri kelmaydi», — dedi Tolibon Mudofaa vazirligi matbuot kotibi.
   

May oyi boshida Eron prezidenti Ibrohim Raisi Tolibonni Eronning 1973 yilgi shartnomaga ko`ra, suvga bo`lgan huquqlarini mensimaslik haqida ogohlantirgan edi. Tolibon esa Raisi tomonidan taxmin qilingan tahdidni rad etgan.