Kecha Nasafnyus tarmog`i orqali “Qashqadaryo viloyati transport boshqarmasi boshlig`i: «Hamma «damas»dan norozi bo`ldi” sarlavhali maqolasi e`lon qilindi.
Unda Qashqadaryo viloyat transport boshqarmasi boshlig`i Narzulla Namozovning «Damas»lar faoliyati bo`yicha quyidagi fikrlari berilgan:
«Mana hozir 50 ta avtobusni bo`ynimga olib, 14 milliardga xalq uchun olib keldim. Kim uchun, xalq uchun, o`zim uchun olib kelganim yo`q. O`ylaysizlar, foyda ko`radi deysizlarmi? Ballonni qo`ysangiz, yog`i keladi, yog`ini qo`ysayiz, boshqa «zapchasti» keladi. Hamma narsani o`ziga yarasha muammosi bor. Bizlarni ham to`g`ri tushunish kerak.
Mana avtobus, damas deyapsizlar? Biz jamoat transportiga 800 ta avtobusni berdik. Kredit olish uchun tushuntirdik. Viloyat hamma hokimlaridan yig`ilishga so`radi. Hamma «Damas»dan norozi bo`ldi. Hamma norozi bo`ldi. Chunki jamiyatga damaschilarni hech qanday foydasi tegmayapti. Faqat o`zini band qiladi. Bir so`m tushumi yo`q, oylik ish haqi yo`q.
Bizlar avtobus qo`yolmaymiz, ertaga agar damaslarga ruxsat bervorsa hozir. O`zi zavodlarimizga avtobus tiqilib ketdi. Nima uchun olmaydi tadbirkor? Qoplamaydi»,- dedi Narzullo Nomozov.
Avvalo, Narzulla Nomozov iqtisodni yaxshi tushunadiganga o`xshamaydi. “O`ylaysizlar, foyda ko`radi deysizlarmi?”, deganda zarar ko`rsak ham qilayapmiz demoqchimi? Bozor iqtisodiyotida foyda bermaydigan ishdan nima naf? Transport boshqarmasi umumiy siyosat yuritish, sohada ishlayotganlarga amaliy yordam berish o`rniga nima uchun avtobuslarni kreditga sotib olib, biznes faoliyati bilan mashg`ul bo`layapti. Bir paytning o`zida xususiy bozorga ta`qiq qo`yish bilan shug`ullanishining o`ziyoq korrupsiya alomatlaridan dalolat bermaydimi?
“Chunki jamiyatga damaschilarni hech qanday foydasi tegmayapti. Faqat o`zini band qiladi. Bir so`m tushumi yo`q, oylik ish haqi yo`q”. Avvalo, odamlar o`zini o`zi band qilib yurgan bo`lsa, do`ppini osmonga otish kerak. Ular nafaqat ishlab ro`zg`orini boqayapti, aksariyati lisenziya ham olib ishlayotgan edi.
«Damaschi»lar foydali va odamlar uchun qulayligini, kerak bo`lsa uyingizdan aytgan manzilingizgacha etkazib qo`yishini, qimmatbaho mashinada davlat hisobidan yurgan o`sha tuman hokimlaringiz bilmayotgan bo`lsa, demak ularning ham tafakkur ko`zi yoki ko`r, yoki jamoat transportidan ham mo`may foyda olish ilinjida “yangi nimadir” o`ylab topish bilan band. Endi amal-taqal qilib, tirikchilikning yagona manbaidan ham mahrum bo`lgan oilani qandaydir daftarlarga kiritib davlat yordam berishi kerakmi?!
N.Namozov agar tashkilotining faoliyati nimadan iborat ekanligini bilmasa, O`zbekiston Respublikasi transport vazirligini tashkil etish bo`yicha Prezident farmon va qarorlarini yaxshilab o`qib chiqishi kerak. Unda “transport va logistika xizmatlari bozorini rivojlantirishni rag`batlantirish, ularning barcha toifadagi iste`molchilar uchun ommabopligini ta`minlash” kerakligi juda chiroyli qilib yozib qo`yilgan.
Shu kunning o`zida Qashqadaryo viloyat transport boshqarmasi bo`lim boshlig`i Ozod Hayitovning “damas”lar bo`yicha intervyusi ham telegram kanallarida paydo bo`ldi:
“Damas”larga cheklov qo`yilmaydi, pandemiya sababli maxsus komissiya tomonidan qabul qilingan 45-sonli yig`ilish bayoni sababli belgilangan Damaschilar faoliyati respublika bo`yicha vaqtinchalik to`xtatilib turilibdi. Bundan keyin “Damas”lar ishlamaydi yoki yo`l qo`yilmaydi, degani emas. Bu vaqtinchalik tartib”.
Resublika Maxsus komissiyaning 45-conli bayonnomasi qachon chiqqanku, uning muddati qachongacha hech kim bilaydi. Ochiq ma`lumotlar bazasidan bu hujjatni topib ham bo`ladi. Lekin odamlar yashashi kerak, bozorga chiqishi shart, ishga borishi lozim. “Damas”ga ruxsat berilmasa, ular qanday borsin?
“Taqiqlar va man etishlar” yondashuvdan qachon voz kechamiz? Va nihoyat viloyat hokimi boshqarma boshlig`ining bunday bir tomonlama va hech bir na iqtisodiy va insoniy mezonlarga mos kelmaydigan qarashlaridan xabardormi?
УЗ
-middle.jpg)