— Prezident Administrasiyasi rahbari Sardor Umrzoqov moliyaviy manba, milliardlarni tanlaydimi yoki millat genofondini saqlab qoluvchi qonunnimi?
— “UZBAT A.O.” AJ snyus va tamaki mahsulotlarini cheklovchi qonunni to`xtatish maqsadida lobbistlik qilayaptimi, Sardor Umrzoqovdan najot kutishmoqdami?
Bu savollar ayni paytda kun tartibiga chiqmoqda.
Oliy Majlis Qonunchilik palatasi «Alkogol va tamaki mahsulotlarining tarqatilishini hamda iste`mol qilinishini cheklash to`g`risida»gi Qonunni Senatga taqdim etgan. Biroq, Senat hamon mazkur Qonunni yoqlayotgani yo`q. Mazkur qonun loyihasida ayni damda sotuvda bo`lgan snyusni (tarkibida nikotin bo`lgan mahsulot) cheklash nazarda tutilgan. Qonun loyihasidagi snyus cheklovlaridan norozi bo`lgan “UZBAT A.O.” AJ Prezident Administrasiyasi rahbari Sardor Umrzoqovga xat bilan murojaat qildi.
Xatda “UZBAT A.O.” S.Umrzoqovdan O`zbekiston ichida snyus mahsulotining sotuvi va iste`molga qo`yilishi kutilayotgan taqiqni olib tashlashni so`rab murojaat qilgan. Ular o`z so`rovlarini oqlash maqsadida snyusni zarar keltirmasligi haqida ma`lumotlar keltirgan. Biroq, shifokorlarning ta`kidlashiga ko`ra, O`zbekistonda o`smirlar orasida bir necha marta snyusdan zaharlanish va o`lim holatlari ham kuzatilgani aytiladi. Shu jumladan, Rossiyada ham snyus iste`molidan o`lim holati qayd etilgan.
UZBAT A.O.” AJ Sardor Umrzoqovdan snyuslarni cheklashni to`xtatishni so`rar ekan, o`zining O`zbekistondagi eng yirik soliq to`lovchi ekanligiga ishora qilgan hamda snyus ishlab chiqarishi bilan bog`liq yirik investisiyalar kiritilayotganini ro`kach qilgan.
Shu o`rinda shifokorlar snyus va tamaki mahsulotlari sababli millat genofondiga jiddiy zarar etishi mumkinligini ta`kidlab kelmoqdalar. O`zbekistonda ortib borayotgan onkologik kasalliklar ham asosan tamaki va nikotinli mahsulotlar iste`moli ortidan kelib chiqishi aytiladi. O`zbekiston byudjeti tamaki mahsulotlaridan kelib chiqqan onkologik kasalliklarni davolash uchun ham mablag` ajratib keladi. Qolaversa, Ichki ishlar Bosh boshqarmasining ma`lumotiga ko`ra aynan snyus mahsulotini iste`mol qilgan o`smirlar orasida jinoyatchilik ortgan.
Senat hamon «Alkogol va tamaki mahsulotlarining tarqatilishini hamda iste`mol qilinishini cheklash to`g`risida»gi Qonunni tasdiqlagan emas.
Endilikda Sardor Umrzoqov ham yirik soliq to`lovchi UZBAT A.O. AJ xatiga ijobiy javob beradimi yoki millat genofondini saqlab qolish uchun qonun loyihasini o`zgartirmagan holda qabul qilinadimi?
Bu savol hozircha ochiq qolmoqda.
УЗ
