Rost24.uz ushbu savolni ayrim amaldor, yozuvchi va jurnalistlarga berib koʻrdi.
MUSTAQILLIK BU NIMA?
"Inson erkin bo`lsagina yarata oladi. Erkin bo`lmagan inson — yangiliklar, tashabbus va saxovat qilish imkoniyatiga ega bo`lmaydi.
Aynan shu sababli, shaxs uchun erkin va ozodlik — hayot-mamot masalasidir. Chunki, inson yashadimi, insondek yashashi kerak. U atrofdagilarga yaxshilik ulasha olishi kerak. Erkin bo`lmagan inson bunday imkoniyatlarga ega bo`lmaydi.
Agar, biz har bir davlatni insonga qiyoslaydigan bo`lsak, ozod bo`lmagan davlatlar, na o`z fuqarosiga, na insoniyatga foyda keltira oladi. Bunday davlatlar faqatgina iste`molchi kayfiyatdagi davlatga aylanadi. Ya`ni, qornini to`q qil va ishlat.
Aynan shu sababli ozodlik nafaqat inson taqdiri, balki davlatlar taqdiri uchun ham muhim ahamiyatga ega.
Azaldan bosqichi davlatlar bosib olgan erlarida insonlarda ozodlikka intilish ruhiyatini turli yo`llar bilan bosish uchun harakat qilishgan va ko`p hollarda erishishgan ham. Bu illatning nomini boqimandalik deb aytish mumkin.
Bosib olingan erlarda faqat qorni uchun yashaydigan xalqlar shakllantirish bosqinchilarning azaliy maqsadi bo`lgan.
Biz mustaqil bo`lganimizdan keyin ta`bir joiz bo`lsa, kurashayotgan eng katta illatimiz ham aynan — shu!
Biz ozod ruhimizni tiklab olishimiz, ozodligimizni nafaqat tiklash uchun, balki asrash uchun ozodlikparvar, millatparvar, vatanini sevuvchi yangi avlodni shakllantirishimiz juda ham muhim.
Biz «koma»dan qaytgan insonga o`xshaymiz. Endi, tezroq sog`lom bo`lishimiz va azaliy 3000 yillik davlatchilik tariximizga tayanadigan tiriklik tajribamizni tiklab olishimiz kerak!
Mustaqillik bayramingiz muborak bo`lsin!"
Alisher Qodirov – Oliy Majlis Qonunchilik palatasi Spikerining o`rinbosari, «Milliy tiklanish» Demokratik partiyasi Markaziy Kengashi raisi
MUSTAQILLIK BU NIMA?
"O`zbekiston mustaqilligi bu juda muhim qadriyat. Tarozining bir pallasiga masalan tinchlik¸ xotirjamlik¸ boylik va ikkinchi pallasiga mustaqillik qo`yilsa men mustaqillikni tanlayman. O`zbekistonni 1924 yilda tuzgan uchta davlatdan biri Turkiston ASSR bu Rossiya tarkibidagi avtonomiya edi. O`sha paytda Tatariston ham shunaqa edi va bugun Tatariston mustaqil emas va Rossiya imperiyasi tarkibida. Tatarlar qanday havas qilishini bilasizmi bizga. Son¸ til va madaniyat jihatdan o`zbeklarga juda yaqin o`lka Sharqiy Turkiston uyg`urlaridan so`rang. Ular ham erkinlikni qandoq istaydi. Holbuki ular farovon boy badavlat yashamoqda. Xitoy bosimi ostida qanday yashaganini bir o`zi biladi.Siyqasi chiqib ketgan bo`lsa ham aytay. Har bir hayvon zooparkda emas erkinlikda yashashni istaydi. Bugun moddiy qashshoqligini pesh qilib mustaqillik kerak emas¸ o`risga qul bo`lsak ham qornim to`q bo`lsin deganlardan o`sha hayvon ming marta erksevar. Turmadagi odamdan so`rang. Senga erk kerakmi ëki qamoqmi deb. Nima deb javob beradi. Afsus pasportiga fuqaro deb ëzilgan millionlab o`zbeklar qul bo`lishga jon jon deb rozi. Buni his qilish shu mustaqil yurt vatandoshi bo`lgan menga og`ir botadi. Qisqa qilib Pahlavon Mahmud misrasi bilan aytaman. «Kim agar ozoddir ul shoddir»
Rassom TUZ — Eltuz.com sayti karikaturachisi
MUSTAQILLIK BU NIMA?
"Mustaqillik... bu ko`p mehnat. Mustaqillik... bu og`ir mehnat. Mustaqillik... bu mehnatdan qo`rqmaslik.
Davlat mustaqil bo`lgandan so`ng kuzatishadi: qani bular nimaga qodir ekan...
Biz nimaga qodir ekanligimizni mehnat orqali ko`rsatishimiz mumkin".
Sherzodxon Qudratxo`ja —
O`zMMA Boshqaruvi raisi,
O`zJOKU rektori
MUSTAQILLIK BU NIMA?
"Kecha poytaxtdagi bayramda «Go`zal Turkiston, senga ne bo`ldi?» qo`shig`i qo`yilibdi. Shuni o`ylab o`tiribman. Bechora keksa kommunistlarning holi ne bo`ldi ekan o`sha damlarda? Men Karimov «Lazgi»ga o`ynagan zamonlardan beri bayramlarni ko`rmayman, ular bir hovuch «protokol»dagi to`ralar uchun. U erlarga oddiy qora xalq yaqinlashtirilmaydi ham. «Bezatilgan toychoqlar», ya`ni «Zulfiyachi»lar, 5-10 mukofotlanganlar boradi, xolos. Qolgani qora kostyumlilar. Xalqniki bo`lmagan bayramni ko`rib nima qilaman.
Ammo «Go`zal Turkiston»ni maydonda tinglagan bechora kommunistlarga ichim achidi.
Ammo Brejnevdan mukofot olgan «partapparat»ning eski tulkilari Karimovdan ham orden-medallarni, mukofot va imtiyozlarni olishdan armoni qolmadi. Qizig`i, uning qabri sovishga ulgurmay, o`sha qari takalar Mirziyoevga hamdu-sano o`qishni boshlashdi. Otaga yoqqani Akaga yoqmaydimi? Yana o`shalar siylandi, yana unvonlar, yana imtiyozlar, yana orden-medallar o`shalarniki bo`ldi...
Ishonamanki, Turkiston qayta tiklansa, yana o`shalar amalda, lavozimda bo`ladi.
Hazardan Oltoygacha cho`ziladigan Buyuk Turk davlati dunyoga kelsa, o`sha Buyuk davlatda ham bular mansab va lavozimlarni egallashadi!
100 % aminmanki, Amudaryodan sersoqollar o`tib kelsa, non-tuzni o`shalar ko`tarib chiqishadi. Soqol o`stirib, oyog`iga «tapichka» kiyib, ulardan ham mansab, lavozim olishadi!
Mustaqillikka tish-tirnog`i bilan qarshi bo`lgan, ammo Karimovni «Mustaqillik me`mori» deb atagan, bugun Mirziyoevni «Xalqning otasi» deyotgan, xullas, mustaqillik davrida ham maza qilayotgan amaldorlarga bayram muborak bo`lsin!
Karimberdi To`ramurod – jurnalist, yozuvchi
Xush, siz uchun mustaqillik bu nima?
УЗ
