Yoxud muammolarni hal qilishning “Forishcha” usuli — mutasaddilar ishsiz oilani hali o`zi yo`q ishxonaga joylashtirishni va`da qilishdi.
Prezident nega hududlarni sektorlarga bo`lgan?.. To`rt amaldor hududlarga jilddiy qarab, muammolarni hal qilishi, har
Saytimizda 19 iyul kuni “Hokimlik yordami bilan kambag`allikdan qashshoqlikka tushirilgan oila” deb nomlangan video material e`lon qilinganidan so`ng, maqola ijtimoiy tarmoqlarda ko`plab muhokamalarga sabab bo`ldi.
Oradan bir kun o`tib Forish tuman hokimligining mazkur maqolaga “Murojaatlar asosli bo`lsin!” nomli raddiyasi e`lon qilindi. Maqolada Forish tumani “Garasha” mahallasi Choshtepa qishlog`ida yashovchi Surayyo Hakimovaning oilaviy ahvoli bayon etilgani hokimlikdagi ba`zi amaldorlarning hamiyatiga qattiq tekkan ko`rinadi, chunki raddiyada asosdan ko`ra jahl va iddao ko`proq ko`zga tashlanadi. Hokimlik yordam olgan oilani salkam jinoyatchi va boqimandaga chiqaradi. Vaholanki, o`sha hududda oilani ishlashi uchun bironta ish o`rinlari mavjud emas, qishloq infrastrukturasi haqida gapirishning o`zi kulgili.
“Tez ko`payishi va tez daromad keltirishi inobatga olinib Vohid Hakimov oilasiga ham 7 million 800 ming so`m kredit mablag`i evaziga Surayyo Hakimova video lavhada ta`kidlayotganidek 4 bosh echki va bir bosh taka emas, balki 9 bosh echki berilgani”ni yozgan hokimlik vakillari video-lavhani tuzukroq ko`rmagan ham shekilli, chunki videoda Surayyo Hakimova “4 bosh echki bolasi bilan, bitta taka berishdi” deydi. Ya`ni, raddiyada har biri uloqchali bo`lgan to`rtta ona echki 8 bosh baquvvat va sog`lom, tanlab olingan echkilarga, xonadon egalari esa shunday sara mollarni “yo`q qilib yuborgan” jinoyatchilarga aylanib qolmoqda. Qizig`i shundaki, ayol va qo`shnilarning ta`kidlashicha, o`sha qishloqda ana shunday yordam olgan boshqa oilalarning ham echki va takalari ham kasalmand bo`lib chiqqan va nobud bo`lgan.
Video lavhada oilaning iqtisodiy ahvoli, yashash sharoiti yaqqol ko`rinib turgani holda, hokimlikning “0,49 gektar erda artezan qudug`i qazilgan (ma`lumot uchun, bu quduqni S.Hakimovaning otasi o`z mablag`iga qazdirib bergan, hokimlikning bunga aloqasi yo`q), ekilgan 50 tupdan ziyod mevali, 50 tupdan ziyod tok hosilga kirgan hamda boshqa oziq-ovqat ekinlari etishtirilmoqda” deya iddao qilishi kulgili va uyatli. Kunlik ro`zg`orini zo`rg`a yuritayotgan, doimiy ish joyiga ega bo`lmagan, dori-darmonga ehtiyoji bo`lsa-da imkoni bo`lmagan oila kasal echkilarni sog`aytirib olishi, boqishi, dalasiga suv olib chiqish uchun artezian o`rnatishi, uyiga kadastr hujjatini qilish uchun xarajatlarga pul topishi, hatto dalasiga ko`chat, o`g`it olishi ham qiyin ekanini, bunday xarajatlarni eplolmasligi tabiiy hol ekanligi, kasal echkilar parvarish qilish qanday qiyin ekanini tushunish uchun nahotki shunday kulbada va sharoitda yashab ko`rish shart bo`lsa?
Prezident siyosatini yuritayotganlikda da`vo qilayotgan hokimiyat oilaga 8 bosh mahalliy tovuq berganini ham alohida iddao qiladi. 8 bosh tovuq bilan bir oilani obod qilishni ko`zlagan hokimiyat Surayyo Hakimova tovuqlarini 5 tasini echki kreditini yopish uchun sotgani va qolgani ikkisini boqayotganini surishtirib ham ko`rmagan. Eng achinarlisi uyi atrofidagi 0,49 gektar erni ayol qarindoshlari yordami bilan quduq qazitib, yaqinlaridan ko`chat so`rab ekib, obod qilib, yaratgan bog`ni noqonuniy foydalanishda ayblamoqda. Atrofda bo`m-bo`sh suvsiz erlar yastanib yotibdi. Biroq, hokimlik eshigi tagidagi taqir erni obod qilib o`tirgan oilani ayblash ovora. Hokimiyat yana shu bog`ni ro`kach qilib, oila kambag`al emasligiga ishora qiladi. Vaholanki, bog` yaratilganiga 3 yil bo`lgan va daraxtlar endigina ko`chatga kirgan.
E`tibor bergan bo`lsangiz, ayol butun ko`rsatuv davomida hokimlikdan na “kadastrsiz” uyini ta`mirlab berishini, na moliyaviy yordam berishni, na tiqishtirilgan kreditni to`lab berishini so`ramaydi. Video so`nggida ikki og`iz jumla bilan, qishloqda, yaqin-atrofda zavodmi biror korxonami bo`lganida ishlagan bo`lishini, o`zidek ayollar ko`pligini aytadi xolos.
Bizda kambag`allik qachon qisqaradi?
Eri uchinchi guruh nogironi bo`lib, har olti oyda davolanishga imkoni bo`lmagan, bolalarini chayon va ilonlardan himoya qilishni istagan, hokimlik vakillari balki hayvonlarini ham yashatmaydigan devorlari nurab turgan shifersiz uyda uch nafar yosh bolasi bilan yashayotgan, kreditdan qolgan 4 million qarzini 2 yildan beri to`lay olmayotgan, borib dardini so`ragan muxbirga ham nolimagan, borini aytgan bir ayol hokimlik vakillari tomonidan shuncha iddao-yu malomatlarga uchrasa, yolg`onchilikda ayblanib, “to`liq huquqiy tushuncha berilsa”, kambag`allik qachon qisqaradi?
Hokimlikning moliya, iqtisodiyot va kambag`allikni qisqartirish masalalari bo`yicha bo`limi dardini aytgan odamning og`zini yopish bilan shug`ullanadimi?
“Yaxshilik”ni hokimlik qilmoqdami?
Raddiyada keltirilgan “Yaxshilikni yaxshilikni bilganga qil. Aks holda butun jamiyatga yomonlik qilgan bo`lasan” degan jumla bilan hokimlik vakillari nima demoqchi? Ba`zi amaldorlar davlat tomonidan qonuniy qilinayotgan islohatlarni o`z cho`ntagidan sarflanayotganday, go`yoki o`zining molidan berayotganday his qilishadimi? Hokimlik munosabatida “prezidentimiz tomonidan ilgari surilgan “Inson qadri uchun” degan ezgu g`oya” kimga nisbatan eslab o`tilgani ham qiziq, hokimlik bu bilan o`ziga o`zi nasihat qilmoqdami? Yoki o`zlari tomonidan qarzga botirilgan oilaning kreditini homiylar to`lab berganini hokimlik minnat qilyaptimi?
Yo`q qabristonga qorovul kerakmi?
Raddiyadagi “Oila sohibi Vohid Hakimov Choshtepa qishlog`ida tashkil etilayotgan yangi qabristonga ishga joylashtiriladigan bo`ldi” degan jumla bizni qiziq ma`lumot sari etakladi. Sababi, Choshtepa qishlog`ida hali qabristonning o`zi yo`q. U qachon tashkil etilishi-yu, necha kishi dafn etilganidan so`ng qabristonga xodim ishga olinishi ham bu kabi ko`plab munosabatlardagi ma`lumotlar kabi oxiri noma`lum. Balki Vohid Hakimov qabristonga ishga kirib, u erdan topgan daromadi bilan o`zini, oilaviy sharoitini o`nglashi uchun hali hali ancha yillar kerakdir?
Ma`lumot o`rnida, sayt xodimlari 2020 yildagi echki narxlari bilan ham qiziqib ko`rdi. Ma`lum bo`lishicha, 2020 yilda bozorda tanlab, saralab olish mumkin bo`lgan echkilar narxi 300 mingdan 800-900 ming so`mgacha bo`lgan (albatta, bu narxlar hayvonlarning kasalmand, qari va ozg`inligiga qarab emas, yoshiga, katta yoki kichikligiga, uloqchali ekanligiga qarab belgilangan). Bu borada xulosa o`zingizdan.
УЗ
-middle.jpg)