Бу оила томида шифери йўқ, хароба уйда яшайди. Она 3 нафар боласини чаён ва илонлардан асрайин, дея хавотирда кун ўтказади. Ота кредитдан қолган 4 миллионни қутилиш учун кунда мардикорликка чиқади.
Rost24.uz Жиззах вилояти, Фориш туманининг Чоштепа қишлоғида Сурайё опа Ҳакимова хонадонида бўлди.
Очиғи, улар ҳаёт кечирётган уйни оддий сўз билан тарифлаш мушкул, ҳатто кўз билан кўриб ҳам ишониш қийин.
«Бу йил уйимизга намлик кўп ўтиб кетди. (Биласиз, намлик кўп жойда чаёнлар кўп учрайди). Шунга уйимизда чаёнлар кўпайиб кетди. Энди катталарни-ку, чақди. Болаларимни, айниқса, мана бу қизимни икки-уч марта чақди, ҳозир қизим қўрқоқ бўлиб қолган. Чаённи кўрса “ая-ая, чаён чиқди”, деб қолади. Майли, булар-ку, сал бўлса ҳам катта бўлиб қолган, лекин бешикдаги болам… у ҳеч нарса қилолмайди-ку, икки кўзимиз шунда-да...».
***
2020 йил. Сурайё опа «Аёллар дафтари» рўйхатда бўлган. Вақт ўтиб, кам таъминланганлар рўйхатидан чиқариш учун 7 млн. 800 минг сўм кредитга 4 та болали эчки, такаси билан беришади.
Сурайё опа ҳукумат ёрдамининг оқибатлари ҳақида шундай сўзлайди:
«Ўшанда берилган эчкилар июнь ойининг охирларига келиб касал экан, ҳаммаси ўлиб қолди. На илож, отам берган бузоқни сотиб, кредитнинг бир қисмини кучимиз етганча тўладик. Мана 4-5 ойдан бери қолган 4 миллион сўм учун, суддан қоғоз келиб ётибди».
Оила бўйнида катта қарз қолиб кетади. Қишлоқ аёлининг кредит шартномаси билан танишиш, эчкилар соғломлигини текширишга ўқуви етмаган.
Ҳукумат ёрдами билан камбағалдан қашшоққа айланган аёл томорқасида кун кўришда давом этмоқда. Касал эчкилар аёлга мажбуран ўтказилмаганда унинг ҳозир бир бош бузоғи ҳам ўзида бўлар эди. Зарар кўрган аёл, балки энди унга “ёрдам” берилгани сабаб “Аёллар дафтари”дан ҳам чиқарилган бўлса ажаб эмас.
***
Бу оила бекасини ҳаёт не синовлари билан синамасин, фақат ўтган кунига шукрона айтади. Ҳаётида кўрган кунларини, фарзандлари ҳам кўрмаслигини, ўз тенгқурлари қатори униб-улғайишини қаттиқ истайди ва бор кучи билан ҳаракат қилади. Кези келса, кунлик ишга чиқади, қўлидан келганча деҳқончилик қилади.
Фарзандлари катта бўлганида: «Бизнинг ёшлигимизда шундай бўлмаган, сизлар бизга керакли шароитни қилаолмагансизлар», деб айтишини истамайди. Айнан шунинг учун ҳам, эртаю кеч меҳнат қилади.
«Турмуш ўртоғим ичмайди, чекмайди. Топганини уйга олиб келади. Шунинг учун ҳам оилам тинч. Тинчмиз-ку, соғломмиз-ку, шунга ҳам шукр», дейди у.
УЗ
