Rost24.uz muxbiri eng kam oylik olayotgan soha xodimlarining muammolari yuzasidan vazirlik mutasaddilariga savol berdi. Maktabgacha ta`lim vazirligi vakili esa oylikni oshirish uchun jurnalist va blogerlar yordami kerakligini aytmoqda.
Vazirlik mutasaddilari maosh kamligi sababli «bog`cha opa»lariga ta`zim qilishga tayyorligini bildirdi.
«Bizning sohada ishlayotgan har bir tarbiyachi xodim oldida ta`zim qilishga tayyormiz. Sababi, o`n yarim soat ishlaydigan tarbiyachi toifalanishiga ko`ra 1 yarim milliondan 3 milliongacha maosh olishi mumkin. Bu ham albatta, judayam kam. Biz ham bog`cha xodimlarining maoshi xalq ta`limi xodimlari o`qituvchilarnikiga tenglashtirishni xohlaymiz», deydi Maktabgacha ta`lim vazirligi matbuot kotibi Mavluda Asqarxo`jaeva.
Bog`cha tarbiyachilari va oshpazlarining maoshi o`ta kamligi masalasi Axborot va ommaviy kommunikasiyalar agentligida Maktabgacha ta`lim vazirligi tomonidan o`tkazilgan matbuot anjumanida ko`tarildi. Vazirlik xodimlari bog`cha tarbiyachilarining xaqiqatdan ham maoshlari kamligini og`riqli masala ekanligini qayd etishdi hamda bu muammoni o`nglashda jurnalist va blogerlardan yordam so`rashdi.
«Oliy Majlis Qonunchilik palatasi deputatlari va Moliya vazirligiga maoshlar kamligi masalasi haqida gapirilgan. Bu muammoda boshqa vazirliklar bilan ham kelishishimiz kerak. Bu borada agar, jurnalist va blogerlarimiz bizga yordam bersa, juda xursand bo`lar edik», deydi Mavluda Asqarxo`jaeva.
Eslatib o`tamiz, 2021 yilning noyabr oyida Maktabgacha ta`lim vazirligining moliyaviy-iqtisodiy rivojlanishni rejalashtirish boshqarmasi boshlig`i o`rinbosari Sherzod Pardaev maktabgacha ta`lim tizimi xodimlari maoshlarini oshirish rejasi ishlab chiqilgani haqida ma`lumot bergan edi.
УЗ
-middle.jpg)