Sobir Shukurov davlat tilini rivojlantira oladimi?

25.05.2022 08:19

Yoxud o`zi shundoq ham abgor bo`lgan tizimni yanada yo`qlikka mahkum qilish uchun rahbar qo`yildi…(mi?)

O`zbekiston hukumatida ba`zi mutasaddilarining kursilari almashadi-yu, biroq ular egallagan lavozimda, soxada yangilik va o`zgarishlar ro`y bermaydi. Kadrlar masalasidagi bu holatlarni ko`raverib ko`nikib ham ketganmiz. 

Xo`sh rahbar qo`yildi. Nima sababdan? Qaysi karomati uchun? Qanday ishlarni bajargani uchun shu joyga munosib ko`rildi? Oddiy va haqli savollarga javob berishni, eng avvalo, hukumatdagi mas`ullar o`ylashi kerak va bu yuzasidan jamoatchilikka hisob berishlari zarur. 

Ba`zida, mavjudligini sezdirmay, jim o`tirgan rahbarlar asosan yuqori kursilarida o`ralashib yuradi. Ayrim, rahbarlik joylariga ana shunday majlislarda ko`rinib, bloknot qoralab o`tiruvchi galstuk taqib, kostyum shim kiygan tashqi ko`rinishi amal egasini eslatuvchi kishilar mos bo`ladi. Nomini aytishda odamni tili qoqiladigan amallar aslida ana shunday odamlar uchun maxsus ochib beriladigandek. Ammo, davlat tilini rivojlantirish departamentiga ana shunday jim o`tiradigan rahbarlar mos edimi? 

Vazirlar Mahkamasi Ma`naviyat va davlat tilini rivojlantirish masalalari departamenti mudirligiga  davlat tili ravnaqi uchun jon kuydiradigan shu vaqtgacha til masalasiga befarq bo`lmagan filolog topilmagan ko`rinadi. Topilsa-da, fidoyilarda «tanishlar» topilmagan bo`lsa kerak.

Yarim yildan buyon bo`sh turgan lavozim Vazirlar Mahkamasi Ma`naviyat va davlat tilini rivojlantirish masalalari departamenti mudirligiga  Sobir Shukurov nomzodi tasdiqlandi.

Sobir Shukurov shu vaqtgacha O`zbekiston milliy axborot agentligida bosh direktorining birinchi o`rinbosari lavozimida ishlagan. Xo`sh, milliy agentligimiz shu davrda rivojlanib ketdimi? Shukurov agentlikda nima o`zgarish qila oldi? Afsuski, hech bir o`zgarish uning nomi bilan bog`liq emas. Ajablanarlisi, shuncha yil ishlagan Sobir Shukurovning shu vaqtgacha agentlik saytidan chop etilgan birorta maqolasini ham topa olmadik. 

S.Shukurov agentlikka o`rinbosar lavozimiga o`tishidan avval, O`zbekiston milliy teleradiokompaniyasi, Vazirlar Mahkamasi, Axborot va ommaviy kommunikasiyalar agentligida turli rahbarlik lavozimlarida mehnat qilgan. 

U uzoq yillar (2011-2017) davomida axborot tizimlari va telekommunikasiyalar masalalari axborot-tahlil departamentining bosh mutaxassisi sifatida ishlagan. Yuqorida nomi keltirilgan tashkilot 5 yil avvallari asosan rasmiy senzura bilan shug`ullangani aytiladi. 2017 yildan so`ng Komil Allamjonovning Axborot va ommaviy kommunikasiyalar agentligini isloh qilishi ortidan Shukurov bu ma`muriyatni tark etadi. 

2017 – 2019 yillarda O`zbekiston Milliy teleradiokompaniyasi «Axborot-tahlil multimedia markazi» davlat muassasasi direktori lavozimida ishlagan Sobir Shukurovning mazkur ikki yil ichida qanday amaliy ish bilan band bo`lganini aniqlash murakkabdek. Sababi, axborot tahlil multimedia markazi byullitenlar yoki boshqa biron bir tahliliy o`rganishlarni ommaga taqdim etmagan. 

2019 yildan yaqin kunlarga qadar O`zbekiston milliy axborot agentligi bosh raisi o`rinbosarligida faoliyat yuritgan Sobir Shukurov na o`zi rahbarlik qilgan saytda va na ijtimoiy tarmoqlarda til va boshqa siyosiy masala yuzasidan biron bir fikr, munosabat bildirgan emas.

Ko`pincha, Shukurov rahbarlik qilgan tashkilot bor yoki yo`qligi sezilmay qoladi. Ma`naviyat va davlat tilini rivojlantirish departamenti ham aynan shunday tashkilotlar sirasiga qo`shilishidan xavotirdamiz. Yaqinda Daryo,uz nashrining Shukurovga yuborgan so`rovi ham javobsiz qolibdi. 

Rost24.uz sayti yangi rahbarning rejalari bilan tanishish maqsadida departamentga bir necha kun davomida bog`lanishga urindi, ammo natija bo`lmadi. Bu tashkilot ham yo`qlikka mahkum bo`lmagan, degan umiddamiz.

 

P/S: Bu maqolani buyurtma, g`arazlik, rahbarlarni ko`rolmaslik va yana o`zingiz bilgan nimalardir deb o`ylashingiz mumkin. Shunday deb ham o`ylaysiz. Lekin shu Davlat tilini rivoji uchun nimadir qila oling. Jurnalistlarni uyaltiring.

@rost24_uz_bot — Хабар йўлланг. Сизнинг хоҳишингизга кўра ҳар қандай маълумот сир сақланади
26
Изоҳ қолдириш
Изоҳлар
30.05.2022 23:52
Rost.uz да чиққан ушбу мақолани ўқиб, шу каналда ўта кетган оптимист одамлар ишларакан деб ўйлаб қолдим. Чунки, тилимизни равнақи учун кимлар нималар қилмади. Бизнинг тилимиз бу туришда йўқликка махкум бўлади. Чунки, биз ўз тилимизда илмий иш қилмаймиз...
26.05.2022 21:07
Она тилимиз билан боғлиқ долзаб муаммолар борасида ўз фикр-мулоҳазарим баён этилган «Тил тузатишлари тўғрисида ўйлашмалар» номли мақоламни Rost24.uz сайтининг телеграм каналига юборганимга бир йил бўляпти. Сайт таҳририяти ана шу ўтган муддат давомида нафақат менинг ушбу мақолани чиқариш имкони тўғрисидаги саволимга жавоб бермади, балки юборган мақоламни ҳатто очиб ўқиб ҳам кўрмади ёки менга бир энлик рад жавоб (масалан, мақолани нима сабабдан чиқармаганликлари тўғрисида) ёзишни ҳам лозим топмади. Дарвоқе, она тилимизга бундай эътиборсизликда сиз ёлғизмассиз. Бу мақола олдин Kun.uz, Daryo.uz, Qalampir.uz, Gazeta.uz сайтларига ҳам юборилган, улар ҳам бу мақолага шундай муносабатда бўлишганди. Ваҳоланки, бу сайтларда гўёки ўзбек тили билан боғлиқ муаммолар тўғрисида ёзилган, бироқ нафақат қандайдир илмийликка эга бўлмаган, балки оддий мантиқдан ҳам маҳрум бўлган “мақолалар” кетма-кет чиқиб ётибди. Шундай экан, она тилимиз билан боғлиқ муаммолар тўғрисида гапиришга қанчалик ҳақлисиз? Шундай экан, ўзингизнинг сиз танқид қилаётган ана ша шахслар – вазифаси давлат тилини қўллаб-қувватлаш ва ривожлантириш бўла туриб, бу ишга эътиборсизлик билан қарайдиган мутасаддилардан фарқингиз нимада?
25.05.2022 16:52
Мутахассислиги нима экан
25.05.2022 14:52
Баракалла Рост 24. Сизларни қўллаб қувватлаймиз. Биз ыам бу соҳада аниқ амалий кутамиз ва талаб қиламиз.
25.05.2022 14:51
Менинг ўйлашимча шу Шукуров ишлаган ҳамма ташкилотларнинг, шу жумладан маънавият ва давлат тилини ривожлантириш департаменти ҳам ҳеч кимга (шу ерда ишлаётганлардан ташқари) керак эмас ташкилотлар. Шунинг учун ҳеч қанақанги иш қилмаса ҳам ишламаётганлиги билинмайди. Шунга ўхшаган ташкилотлар тўғрисида совет вақтида "Ишдаги ишқ" ва "Флейта учун унутилган куй" деган кинолар суратга олинган эди.
25.05.2022 14:49
Сабаби оддий тил ривожланмаслиги керак,давлат тили тўғрисидаги қонун ўлик қонун 30 йилдан ошиб кетди,ишламайди.Ўзбекистонда ўнлаб жуда билимли ,салохиятли тилшунослар ,олимлар бор,нимагадир улар керак эмас.
25.05.2022 14:23
Ўзи ўзбек тилини билармикан