5 nafar fuqaro vafot etdi. Voqealar markazidan reportaj
Jizzax viloyati Forish tumani Egizbuloq qishlog`i aholisi yana bir tunni seldan keyingi vayronalar orasida o`tkazadi. Ayni damda muxbirlarimiz u erda vaziyatni o`rganib, aholi bilan suhbatlar qilmoqda.
Eslatib o`tamiz, 20 aprel kuni respublikaning ayrim hududlarida kuchli yog`ingarchilik natijasida sel va toshqinlar yuzaga keldi.
Bugun FVV sel keltirgan talofatlar bartaraf etilayotgani haqida xabar berdi.
Forish tumanidagi sel oqimi «Egizbuloq» MFYda joylashgan 260 ta xo`jalikka zarar keltirgan. Ularning 53 tasi to`liq, 44 tasi o`rta va 163 tasi engil darajada talofat ko`rgan. Sel oqimi 15-son maktab va 9-son bog`cha binolarning 1-qavatiga ham kirgan. 1,5 km ichki yo`llarga sel suvlari toshishi oqibatida transport vositalari harakati vaqtinchalik to`xtagan.
«Egizbuloq» MFYda joylashgan 25 ta xo`jalikda istiqomat qiluvchi 100 dan ortiq fuqarolar vaqtinchalik yashash uchun yaqin qarindoshlarining uylariga ko`chirib o`tkazilgan va ular zaruriy mahsulotlar zaxirasi bilan ta`minlangan.
Qutqaruvchilar tomonidan 6 nafar fuqaro sel oqimlari ichidan qutqarilgani aytilmoqda.
Forishda bunday sel oqimlari bundan taxminan 80 yillar avval kuzatilgan.
Favqulodda vaziyatlar vazirligi tomonidan hodisa oqibatlarini bartaraf etish ishlari davom ettirilmoqda.
So`nggi ma`lumotlarga qaraganda Jizzaxda kuzatilgan sel oqibatida vafot etganlar soni 5 nafarga etdi.
УЗ
