Oddiy fuqaro kimnidir ursa javobgarlikka tortiladi, hokim o`rinbosari ursa ish «yopiladi»mi?
Toshkent shahridagi «Usta Normat» MFY raisi Alisher Ikromovga Toshkent shahar o`rinbosari B.Rahmonov tarsaki tushirgani haqidagi ma`lumot ommaviy axborot vositalarida katta bahs munozaralarga sabab bo`lgandi.
Rost24.uz axborot sayti muxbiri Toshkent shahar hokimi o`rinbosari Baxtiyor Rahmonovga qanday chora ko`rilgani, qonun oldida javob berganmi yoki yo`qmi, voqealar qanday yakun topgani bilan qiziqdi.
Odatda bunday ishlar ikki tarafning kelishuvi ostida bosti-bosti qilib yuboriladi.
Joriy yilning 9 may kuni Toshkent shahridagi «Usta Normat» MFY raisi Alisher Ikromov Toshkent shahar o`rinbosari Baxtiyor Rahmonov tomonidan chaqirtiriladi va o`zining xizmat vazifasiga umuman aloqador bo`lmagan, mutlaqo boshqa bir masalaning bajarilmagani yuzasidan haqoratlaydi, hattoki, kaltaklaydi ham.
Ushbu masala Mahalla va oilani qo`llab-quvvatlash vazirligi tomonidan nazoratiga olingan edi. Vazirlik bayonotiga ko`ra, mahalla raislarini vazifa va faoliyat yo`nalishlari bilan bog`liq bo`lmagan yig`ilish va boshqa tadbirlarga jalb qilish, ularning faoliyatiga asossiz aralashish, taalluqli bo`lmagan vazifalarni yuklash talablarini buzgani uchun davlat organlari va tashkilotlari mas`ul va mansabdor shaxslarini egallab turgan lavozimidan ozod etishgacha bo`lgan jazo choralarini qo`llash bo`yicha O`zbekiston Respublikasi Bosh vaziriga o`rnatilgan tartibda taklif kiritib borish huquqiga egaligi eslatilgan.
Biroq, shu yilning 11 iyun kuni A.Ikromov Toshkent viloyati hokimi o`rinbosari Ismat Ibragimovning taklifiga asosan Bosh prokuratura xodimlari guvohligida B.Rahmonov uzr so`ragan va tomonlar og`zaki yarashtiriladi. Ish yuzasidan hokim o`rinbosariga nisbatan hech qanday chora ko`rilmagan, ish tinchlik yo`li bilan hal bo`lganiga qaramay, shu kuning o`zida, ya`ni 11 iyun kuni kech soat 22:10 da B.Rahmonovning akasi S.Rahmonov o`zining sheriklari bilan Tinchlik ko`chasida A.Ikromovni ko`rib qoladi va kurakda turmaydigan so`zlar bilan haqorat qilib, 9 maydagi ishga aslida Ikromovning o`zi aybdorligini aytishgan. (Voqealar haqidagi audio yozuv rost24.uz tahririyatida saqlanmoqda.)
Haqoratlangan va kaltak egan rais Toshkent shahar hokim o`rinbosarining akasi S.Rahmonov ustidan Oqqo`rg`on tumani prokurori D.Fayziev nomiga 12 iyun sanasida ariza yozadi. Oradan bir oy vaqt o`tgan bo`lsa-da hozircha hech qanday javob xati kelgani yo`q. Arizada og`zaki yarashuv kelishuvini bekor qilish ham so`ralgan edi.
УЗ
