“O`zbekiston Qahramoni” unvoni kimlarga berilishi kerak?

08.07.2021 11:08

Vazirlar Mahkamasi e`tiboriga

Vatan uchun tik turib jon berganlarga “O`zbekiston Qahramoni” unvoni berilishiga nima to`sqinlik qiladi?

Abdulla Qodiriy, Cho`lpon, Abdurauf Fitrat... Bular "O`zbekiston Qahramoni" unvoniga arziydimi, yo`qmi? Albatta, bu biz xulosa qiladigan masala emas.

Lekin mustaqilligimizning 30 yilligi munosabati bilan shu jadid bobolarimizga ushbu unvon berilsa yaxshi bo`lardi. Bu mukofot faqat tiriklarga beriladi, degan qoida bo`lsa, istisno tariqasida, albatta.

Qolaversa, nomlari zikr etilgan bobolarimiz merosi va jasorati oldida tirik yurgan ko`pchiligimiz pesh emasmiz. Aynan ular peshonasida miltiq tiralib turgan bo`lsa-da, millatning bugungi ozodligini, tilini va o`zligini qattiq turib himoya qilishgan edi.

Bizning 65 nafar deputatimizga o`xshab tilimizga bepisandlik qilishmagan edi... Ular ozodlik uchun bilvosita jonlaridan kechgan, o`limni bo`yniga olib shu Vatan, millat hurligini himoya qilgan va buni tik turib mustabidlar yuziga aytishdan qo`rqmagan edi...

To`g`ri, ular bugun oramizda yo`q, biroq bugun biz kuylayotgan istiqlol g`oyalari yoki mintaqa integrasiyasi, buyuk millat va davlat g`oyalarini aynan shu jadid bobolarimiz shakllantirishgan, tomirlarimizda oqayotgan qonga singdirib ketishgan edi.

Amerikalik muarrix Edvard Ollvort “Turkiston” atamasi joriy qilinishini jadidlarning keyingi avlodlarga ta`sir ko`rsatgan intellektual xizmati, deb hisoblaydi.

Tarixchi yana qayd etadiki, o`sha mustabidlikning olatasir zamonlarida ham kommunistik mafkura tomonidan etnik jihatdan betaraf kishilarni yaratishga urinishlar bo`lganiga qaramay, XX asrning 80-yillarida ham o`zbeklar uchun SSSRga umumiy tegishlilikdan farq qiluvchi Vatan tushunchasi mavjud edi.

Mamlakatda O`zbekistonga nisbatan “ona yurt” atamasi ishlatilar, bu SSSR davridagi maktab darsliklaridagi katta harf bilan yoziladigan “Vatan” tushunchasidan farq qilar edi.

Bu, albatta, o`sha qaramlik davrlarida ham xalqimiz qalbida erkka, ozodlikka bo`lgan talpinishning mudom “o`lmagani”ni anglatadi. Hech shubhasizki, bu tuyg`u millatparvar bobolarimizning benazir xizmati mahsuli, desak hech adashmagan bo`lamiz. Shu ma`noda, ularni har qancha sharaflasak arziydi.

@rost24_uz_bot — Хабар йўлланг. Сизнинг хоҳишингизга кўра ҳар қандай маълумот сир сақланади
2
Изоҳ қолдириш
Изоҳлар
10.07.2021 12:08
Буюк боболаримиз -Абдулла Қодирий, Чўлпон, Абдурауф Фитратлар миллат қаҳрамонлари.Уларнинг номи ҳар қандай давлат мукофотию, унвонларидан юқоридир. Ўзбекистон Қаҳрамони унвони фермерларга, тўқувчилар, ўқитувчилар ва нари борса шоирларга берилган ва бериладиган унвон. Шундай экан, буюк сиймолар кўксига ана шу унвонни тақиб уларнинг номини сийқалаштириш кимга керак?..
08.07.2021 12:36
жуда тўғри!