Koronavirus ko`pchilikni yaqinlaridan ayirdi. 13 yoshli Abdulloh ham covid-19 sababli onasiz ko`chada qoldi.
Abdullohning onasi Nargiza Mansurova o`pkasining 90 foizi zararlanishidan vafot etdi. U Toshkentdagi 7- shahar klinika shifoxonasi qabul bo`limida katta hamshira sifatida ishlab kelgan. Aprel oylarida kasalxona karantinga yopilganda ham u kasalxonada bo`lgan. Voqealar kasalxonaga koronavirus sababli o`pkasi zararlangan bemor kelgach boshlangan edi. Marhuma Nargiza Mansurova og`ir bemorga hamshiralik qilgan va kasallikni yuqtirib olgan.
Marhumaning hamshira sifatida birga ishlagan qizi Umida onasini kasal holatda ham ishlashda davom etganini aytadi. Nargiza og`irlashgach, farzandlari unga virusolog, pulmonolog mutaxassislarini topib bera olmagan. Bu borada hamshiraning o`zi ishlagan 7-kasalxona ma`muriyati ham yordam ko`rsata olmagan. Nargiza Mansurova uyda davolanib, o`pkasi 90 foiz zararlangach, kasalxonaga etkazilgan va o`sha erda vafot etgan. Marhumaning qizlari onasi ish vaqtida koronavirus alomatlari bilan og`irlashib, vafot etganiga qaramay unga maxsus to`lovlar berilmaganidan norozi bo`lishmoqda. Nargiza Mansurovaning 3 farzandi va ikki nevarasi bor. Uning turmushga chiqmagan bir qizi va voyaga etmagan o`g`il farzandi bugun ko`chada qolgan va ijara uyda yashab kelmoqda. Marhumaning qizi Umida moliyaviy qiyinchilik tufayli Toshkent Arxitektura-qurilish institutidagi o`qishini davom ettira olmayapti.
Bugun hamshiraning farzandlari onasi ish vaqtida kasallik orttirib vafot etganini isbotlab Sog`liqni saqlash vazirligi, Toshkent shahar, Yunusobod tuman hokimiyat eshigiga yugurmoqda. “Biz yordam uchun pul so`rayotganimiz yo`q. Biz Prezidentning 4652-sonli qaroriga ko`ra, bemorlar bilan ishlash davomida koronavirus infeksiyasini yuqtirib olgan tibbiy personalga berilishi kerak bo`lgan, qonuniy to`lovni talab qilmoqdamiz. Onamiz ish vaqtida koronavirusni yuqtirib vafot etdi. U og`irlashsada, shifoxonadagi kasallarni tashlab ketishni istamagandi. Butun umrini shu shifoxonaga bergan edi”, deydi marhumaning katta qizi Aziza G`ulomova.
Quyidagi videoda intervyuni to`liq tamosha qilishingiz mumkin.
УЗ
