Yoxud dastlab elektr, suv, gaz tashkilotlariga, Energetika vazirligiga, Prokuraturga, hatto Davlat xizmatlari agentligiga qilingan murojaatlar besamar ketgani, faqatgina Prezidentga yozilgandagina echim topayotgan oddiy muammolar haqida
Bu maqolam “gaz yo`q”, “elektr yo`q” degan mazmunda emas, balki bir emas, bir nechta kichik ijtimoiy muammolar yuzasidan o`z haqqimni talab qilib mamlakat rahbariga qadar murojaat qilganim haqida...
Boshladim...
Elektr...
Toshkent viloyati Zangiota tumani Amir Temur ko`chasi 3 uy 11 xonadonda tuman elektr energiyasi xodimlari 2020 yil 24 avgust kuni mening va biz yashaydigan ko`pqavatli uyning barchasini ogohlantirishsiz va ko`pgina uy egalarining ishtirokisiz ishlab turgan elektr hisoblagichlarini yangisiga almashtirib ketishgan. Dalolatnoma bir tomonlama tuzilgan. Asl uy egalarining hech birining imzosi yo`q. Shu noqonuniy hujjatda plomba raqami ham ataylaganday qo`shni xonadon elektr hisoblagichi bilan almashtirib o`rnatilgan yoki noto`g`ri yozilgan. Eng yomoni, avvalgi hisoblagich ko`rsatkichi 3578 kVt da echilib, korxona elektron bazasiga 6500 kVt dan ortiq qilib ma`lumot kiritilgan. (Bu o`rinda shunchaki adashish mumkin emas negaki uyimiz yangidan qurilgan bo`lib, hatto qo`shnilarimda ham bunday katta elektr sarfini ko`rmadim). Natijada 1 mln. 600 ming so`mdan ortiq sun`iy qarz abonent raqamimga kiritilgan.
Ushbu muammo yuzasidan eng birinchi Hududiy elektr tarmoqlari AJning telegramdagi botiga 2020 yil 28 oktyabr kuni keyinchalik e`tiborsiz va natijasiz qoldirilgan ariza yubordim. Murojaat botda ta`kidlanganidek o`z vaqtida emas, balki umuman bajarilmadi. Qo`limdagi to`lov qog`ozlarimning aniq hisobiga ko`ra o`sha vaqtda va hozirda Zangiota tuman elektr ta`minoti korxonasi mendan 400 kVt atrofida qarzdor (barcha to`lov qog`ozlari mavjud). Energetika vazirligining matbuot xizmati rahbari bilan qilgan suhbatimdan esa mening bu kichik muammom echimsizdek ko`rina boshladi. Hech qanday natijasiz murojaatimlaridan so`ng 2020 yil 10 noyabr kuni o`zgarmagan mavzum va muammom bilan Toshkent viloyati prokuraturasiga navbatdagi besamar murojaatni yo`lladim. Natijasiz...
Taqillatilmagan onlayn eshik faqat bitta qoldi. Prezidentning virtual qabulxonasi. Prezidentga murojaat qildim va bir haftaga qolmay muammo hal bo`ldi.
Suv....
Ko`pqavatli uyimizni ichimlik suvi inspektori 2020 yil 10 oktyabrda kelib xonadonimdagi suv hisoblagichning navbatdagi metrologik ko`rigi vaqti kelganini og`zaki aytdi va to`lov varog`ining orqa tomoniga ruchkada yozib qo`ydi. U o`ziga 150 ming yoki 100 ming so`m bersam o`zi bu ishni amalga oshirishini aytdi. Men esa o`z e`tirozimni bildirib bu ish Davlat xizmatlari agentligi orqali amalga oshirilishini va bu xizmat 40 ming so`mdan sal ortiq qiymatga egaligini tushuntirganimda, ko`ramiz qanday amalga oshirishingizni, deb jilmayib qo`ydi. Keyinroq bildimki u bejizga jilmaymagan ekan...
Shu sanada Yagona interaktiv davlat xizmatlari portali orqali Ichimlik suvi hisoblagichini qiyoslashdan o`tkazish (echish va ulash bilan birga) uchun to`lov orqali ariza qoldirdim. Navbatdagi natijasiz kunlar o`ta boshladi. Oradan bir oyga yaqin muddat muddat o`tib, 2020 yil 5 noyabrda ishonganimiz Davlat xizmatlari agentligi bo`ysunuvchi Adliya vazirligiga, 18 noyabr kuni esa suvsoz korxonasiga ham (javobsiz qolgan) murojaatlarimni yo`lladim. Bari besamar...
Va yana arzimagan kichik muammo (Ichimlik suvi hisoblagichini qiyoslashdan o`tkazish) bilan Prezidentga murojaat yo`lladim. Muammo hal...
Gaz...
Tumangaz idorasiga ham yugur – yugurlar uchrab turadi. O`zimdan misol. 2018 yilda hujjatlashtirish uchun pul to`lab bir necha marta u idoraga ham qatnab, bir necha xodimlari bilan uzoq iltimoslar bilan 2020 yilga kelib abonent raqami ochilishiga erishdim...
Ko`rayapsizmi, tizim xodimlarining aslida vazifasi bo`lgan ishlarni paysalga solishini, odamlarni ovvora-yu sarson qilishini... Elektr, suv, gaz, prokuratura, hokimlik tizimida fuqaroning murojaatiga e`tiborsizlikni. Odamlar ko`p narsa talab qilayotgani yo`q, davlat xodimlaridan oddiygina o`z vazifasini sidqidildan bajarishini so`rayapti xalos.
Ma`lumotlarga ko`ra, 2017 yildan buyon 2020 yil avgust oyiga qadar Prezident nomiga 3,7 milliondan ortiq murojaat kelib tushgan. Murojaatlarda turmush darajasi, bandlik, uy-joy, kommunal xizmatlar, sog`liqni saqlash va ta`lim xizmatlari bilan bog`liq ko`plab muammolar aks ettirilgan.
Ko`tarilgan ko`plab masalalar fuqarolarni ijtimoiy qo`llab-quvvatlash, aholining kambag`al va zaif qatlamlariga yordam berish bilan bog`liq bo`lgan. Demak, raqamlar shuni xulosa qiladiki, 4 yil ichida quyi tizimda o`z muammosini hal etolmagan 4 millionga yaqin fuqaro Prezidentgacha murojaat qilishga majbur bo`lgan. Ya`ni, 4 millionga yaqin katta va kichik masalalar Prezident hal etmaguncha joyidan siljimagan.
УЗ
