Жорий йил бошидан буён ҳокимият ва ЭТКлар қувватлаш станциялари фаолиятини тартибга солиш баҳонасида уларни огоҳлантиришларсиз электрдан узиб қўйиши кузатилмоқда. Маълумотларга кўра, ҳозиргача 250 дан ортиқ станция электрдан узилган. Тадбиркорлар эса, албатта бундан норози.
Тошкент шаҳар ҳокимлиги станциялар тармоқдан узилаётганининг сабабини “уланишларни тартибга солиш ва аҳоли учун хавф-хатарларни камайтириш” билан изоҳлаган.
Маълум бўлишича, ҳокимлик ташаббусига кўра, 3 мартдан 12 та ишчи гуруҳ тузилган ва пойтахтда бу бўйича текширув ўтказилмоқда.
Улар хатлов давомида айрим қоидабузарликлар аниқлангани, 101 та шохобча зарур ҳужжатлари йўқлиги сабабли вақтинча тармоқдан узилгани, шунингдек 62 та шохобчанинг электр таъминоти корхоналари билан шартномаси мавжуд бўлмаганини хабар қилишган эди. Шунингдек, ҳокимлик муносабатида техник шартларни келтирган, лекин аниқ талаб йўқлигини ва уни белгилаш зарурлигини қайд этган.
12 март куни ўтказилган матбуот анжуманида шаҳар ҳокимининг транспорт ва йўл-транспорт инфратузилмаси масалалари бўйича ўринбосари Абдураҳмон Бахтиев станцияларни тармоқдан узиш масаласини “барча учун мағлубиятли ҳолат” деб атаган.
“Ҳокимлик позициясини қисқача айтаман. Нега биз бундай қарорга келдик? Регламент бор, шаҳар ери бор. Шаҳар ҳудудига қувватлаш станциясини ўрнатиш учун онлайн аукционда қатнашиб, шу ерни сотиб олиш керак. Ҳозирда ўчириб қўйилган станциялар шаҳар ерида турибди ва бунинг учун пул тўламаяпти, қолаверса, улар онлайн аукцион орқали сотиб олинмаган. Шунинг учун уларни ўчиришга мажбур бўлдик”, деган Абдураҳмон Бахтиев.
Ҳоким ўринбосарига кўра, станцияларнинг ўчирилиши мажбурий чора. Чунки, қишки ва ёзги мавсум туман электр таъминоти корхоналари ҳамда шаҳар электр тармоқлари учун оғриқли масала.
Ҳукумат комиссиясининг тадбиркорлар билан 28 февраль куни бўлиб ўтган йиғилишида энергиядан узилган компаниялар вакиллари бош вазир ўринбосари Жамшид Ходжаевдан муаммони ҳал қилишда ёрдам сўраган эди. Йиғилишда бизнес-омбусман ўринбосари Жамшид Урунов электромобилларни қувватлаш станцияларини ўрнатиш юзасидан ягона бир тартибнинг ўзи йўқлигини таъкидлаган.
У имконияти бўлса, ҳозирча тадбиркорларга ишлаб туришга рухсат бериш кераклигини айтган.
“Гап сизлар ноқонуний ишлатишларингда эмас. Гап, мана Энергетика вазирлиги, Ҳудудий электр тармоқлари гапирсин, булар сизлар ишлатаётган жойда бунчалик электр энергияга талаб юқори бўлишини ўзининг трансформаторлари, линияларида назарда тутмаган. Булар шундан қўрқади. Эртага трансформатор куяди, қанақадир линиялар ўчади, булар текширса, жуда катта ҳажмдаги электр энергия ишлатилаётган бўлади. Юридик шахс ижарага бераман, пул қиламан деган. Энергетик нуқтаи назардан юклама ҳисобга олинмаган-ку”, - деган Жамшид Ходжаев.
Ходжаев бу станциялардан халқ фойдаланаётганини айтиб, тегишли ташкилотлар масъулларидан иборат ишчи гуруҳ тузишни ва икки ҳафта ичида таклиф киритишни топширган, тадбиркорлар масала ҳал қилингунга қадар станцияларни ишлатиб туришга рухсат сўраган.
ЎзЛиДеП партияси қувватлаш станциялари токдан узилиши ва автобус бекатларидаги дўконлар бузилишига муносабат билдириб, буни давлат ташкилотлари томонидан тадбиркорлик фаолиятига асоссиз равишда аралашув ва хусусий мулк дахлсизлигини бузиш деб баҳоган эди.
Партия “ноқонуний қурилмалар”, деб топилган объектлар масаласи фақат суд тартибида кўриб чиқилиши шартлигини қайд этган, фраксия аъзолари давлат ташкилотларига депутатлик сўровлари юборилиши маълум қилган эди.
Электромобиллар сони тобора ортиб бораётган бир пайтда қувватлаш станцияларининг узилиши давлатнинг ҳали электромобилларга тайёр эмаслигини билдирадими? Нима бўлганида ҳам, бу ҳолатга тезкор чоралар кўрилмаса, тадбиркорлар ва аҳоли зарар кўрганидан ташқари, мамлакат обрўсига ҳам ижобий таъсир этмаслиги аниқ.
УЗ
