1 июндан конунчиликда нималар ўзгаради?

1 июндан Ўзбекистон қонунчилигида бир қатор ўзгаришлар кучга киради.

Ёш олимларга уй-жой сотиб олиш учун фоизсиз кредит берилади

Нуфузли халқаро рейтинг ташкилотларининг топ-100 рейтингига киритилган хорижий олий таълим муассасаларининг илмий даражасини (PhD ёки унга тенглаштирилган илмий даража) олган 35 ёшгача бўлган мутахассисларга уй-жой сотиб олиш учун 10 йил муддатга уй-жой жойлашган ҳудудга қараб БҲМнинг 2150 бараваригача фоизсиз кредит берилади.

Нуфузли халқаро фан олимпиадалари ғолиблари ва совриндорларига тўланадиган бир марталик пул мукофотларининг амалдаги миқдори беш баравар оширилади.

«Фаол ҳаётга қадам» дастури ишга туширилди

«Фаол ҳаётга қадам» дастури ташқаридан парваришга муҳтож бўлган катталарни қўллаб-қувватлашга қаратилган. Бешта янги турдаги ижтимоий хизматлар кўрсатиш йўлга қўйилади:

уйда ижтимоий ва маиший ёрдам;
уйда парвариш қилиш;
тиббий ва ижтимоий реабилитация;
кундузги парвариш;
шахсий ёрдамчи.

Кам таъминланган оилалар давлат хизматлари учун чегирмаларга эга бўлади

Ижтимоий ҳимоя ягона реестрига киритилган оилалар учун имтиёзлар кам таъминланган оилалар реестрига киритилган оилаларга ҳам тегишли бўлади (улар учта тоифага бўлинган — «қизил», «сариқ» ва «яшил»).

Давлат хизматлари учун божлар, йиғимлар ва бошқа тўловларни тўлашда «сариқ» тоифага кирувчи оилалар 50 фоиз, «қизил» тоифадагилар эса 75 фоиз чегирма олиш ҳуқуқига эга. «Қизил» тоифалаги оилалардан чиққан аълочи талаба қизлар асосий стипендиянинг икки баравари миқдорида махсус стипендия олади.

Ногиронлиги борларни ишга олган бизнесга 50 млн сўмгача субсидия ажратилади

I ва II гуруҳ ногиронлиги бор шахсларни ишга қабул қилган тадбиркорларга 50 миллион сўмгача субсидия ажратилади. Субсидия сурдо таржимони, психолог ва ёрдамчи ёллаш харажатларини қоплаш учун тўланади. Жисмоний шахсларга ўзини ўзи банд қилган шахс сифатида ҳамроҳлик хизматларини кўрсатишга рухсат берилади.

Кундузи йўлларни таъмирлаш  тақиқланади

Шаҳар кўчаларида соат 7:00 дан 21:00 гача (дам олиш кунлари ва шошилинч ҳолатлар бундан мустасно) йўл таъмирлаш ишларини олиб бориш ёки йўл белгиларини чизиқ тақиқланади. Иш фақат тунги вақтда, йўлларда ҳаракат минимал бўлган соатларда амалга оширилади.

Йўл чизиғини босиш камералар томонидан ёзиб олинмайди

Йўл чизиқларини босиб ўтиш билан боғлиқ қоидабузарликларни ихтисослаштирилган автоматлаштирилган фото ва видео қайд этиш ускуналари ёрдамида қайд этиш тақиқланади. Истисно — «стоп-линия» (5.33 йўл белгиси). Бироқ агар бундай қоидабузарлик ЙПХ ходими томонидан аниқланса, у белгиланган тартибда кўриб чиқилади.

Жарима баллари тизими ишга туширилди

1 июндан йўл ҳаракати қоидаларини бузганлик учун жарима балларини ҳисоблаш тизими йўлга қўйилади. Тизим ИИВ Йўл ҳаракати хавфсизлиги хизмати ягона ахборот тизимидаги E-jarimaball модули орқали ишлайди.

Биринчи босқичда янгилик фақат маъмурий баённомалар асосида ЙПХ ходимлари томонидан қайд этилган қоидабузарликларга таъсир қилади. Келгусида ҳайдовчиларни идентификация қилиш технологияси жорий этилгандан сўнг тизимни камералар томонидан қайд этилган қоидабузарликларни қоплаш учун кенгайтириш режалаштирилган.

Яна учта давлат учун визасиз режим жорий этилди

Баҳрайн, Кувайт ва Ўмон фуқаролари учун Ўзбекистон ҳудудига кирган кундан бошлаб 30 кун муддатга визасиз режим жорий этилади.

Хорижликлар учун «Олтин визалар»

Хорижий фуқаролар ва фуқаролиги бўлмаган шахслар учун беш йил муддатга яшаш учун рухсатнома олишнинг соддалаштирилган тартиби жорий этилмоқда. Ҳужжатни олиш учун аризачи 250 минг доллар, шунингдек, ҳар бир оила аъзоси — турмуш ўртоғи, фарзандлари ва ота-онаси учун 150 минг доллар тўлаши керак.

Янги биноларда қуёш батареялари ва сув иситгичларини ўрнатиш керак бўлади

Биноларни қуриш ва реконструкция қилиш жараёнида лойиҳа ҳужжатлари энергия тежовчи ускуналарни, муқобил иситиш тизимларини (иссиқлик насослари, қуёш коллекторлари) ва қайта тикланадиган энергия манбаларини (қуёш панеллари ва бошқалар) ички эҳтиёжлар учун мажбурий ўрнатиш талабларини ўз ичига олиши керак.

Бундан ташқари, марказлашган иссиқлик таъминоти ёпиқ тизимга ўтказила бошлайди.

Юк машиналари учун электрон навбат

Ўзбекистоннинг давлат чегараси орқали автомобиль ўтказиш пунктларида мамлакатдан чиқиб кетаётган юк транспортлари учун электрон навбат тизими йўлга қўйилади. Бу чегарани кесиб ўтиш вақтини тезлаштириши ва юк ташиш ҳажмини ошириши керак.