Халқ ўзи боқаётган партияларни танийдими?

17.04.2022 09:50

Бир йиллик харажати — 108 миллиард сўм бўлган Ўзбекистон сиёсий партиялари ва уларнинг етакчиларини юртдошларимиз қанчалик танийди? 

Йиллар давомида олиб борилаётган тарғибот-ташвиқот ишлари учун ажратилаётган маблағлар ўзини оқлаяпитми? 

Rost24.uz  бу саволларга жавоб олиш мақсадида кичик сўровнома ўтказди:

- Партия етакчиларидан Алишер акани биламиз, Халқ демократик партиясидан;

- ҳа, партияларни биламан. Масалан, «коммунист партияси»;

- билмаймиз. Тўғрисини айтайми? Сиёсатга аралашмаймиз, фойдаси йўқ;

- партияларнинг сони - 17 тами, 15 тами;

Батафсил видеода кўринг:

Видеода кўрганингиздек, бугун одамлар партияларнинг фаолияти билан кўп ҳам қизиқмайди. Бу балки партияларимиз халқнинг ичига етарлича кириб бормаётгани, турли ҳисоботлар кетидан қувиб, йиғилишлару, фақат ўз аъзолари иштирокидаги анжуманлардан нарига ўтмаётганликлари самарасидир. 

Бугун сиёсий партиялар ҳақиқатдан фаол бўлиши учун яна Президент танқид қилиши керакми? 

Сайловлар олдидангина ҳаракатга тушиб қоладиган партияларга электоратига берган ваъдалар қизиқ эмасми? Бундан аввал ўтказган сўровномаларимизда ҳам фақат икки уч депутатнигина билишларини айтишган. 

Президент 2017 йилги партия вакиллари билан учрашувида  сиёсий партиялар ўз электоратига берган ваъдаларини, сайловолди дастурларини тўла ва самарали бажара олмаётганини таъкидлаганди. Улар ҳанузгача мамлакат ижтимоий-сиёсий ҳаётида, фуқаролар онгида ўзининг мустаҳкам ўрнини эгаллай олмади. Сиёсий партиялар ва Олий Мажлис Қонунчилик палатаси фаолиятида партия фракциялари томонидан устувор мақсад ва вазифаларни амалга оширишга қаратилган аниқ таклиф ва ташаббуслар деярли сезилмаяпти. Партияга тегишли бу гаплар орадан қарийб 5 йил ўтган бўлсада эскиргани йўқ. Ҳали ҳам партияларни ҳолати ўша-ўша.

Халқнинг чўнтагидан бериладиган беминнат миллиардлар

Бугун Ўзбекистонда бешта сиёсий партия фаолият юритади ва уларга ҳар йили мамлакат бюджетидан миллиардлаб маблағ ажратилади.

Жумладан, 2021 йил сиёсий партияларга давлат бюджети ҳисобидан 100 милларддан ошиқ маблағ ажратилган. Бу ҳақида Олий Мажлис Қонунчилик палатаси депутати Расул Кушербаев маълум қилганди. Унга кўра:

Ўзбекистон Либерал демократик партияси - 36 млрд 564,9 млн сўм;

«Миллий тикланиш» демократик партияси  - 25 млрд 818,4 млн сўм;

«Адолат» социал демократик партияси- 17 млрд 000,4 млн сўм;

 Ўзбекистон Халқ демократик партияси - 16 млрд 465,1 млн сўм;

Ўзбекистон экологик партиясига эса –12 млрд 886,6 млн сўм берилган.

Партиялар  қуйидаги молиявий манбалардан ҳам фойдаланиши мумкин:

– Партия аъзоларининг аъзолик бадаллари;

– Ўзбекистон Республикасининг юридик шахслари ва фуқаролари томонидан қонунга мувофиқ бериладиган хайрия ёрдамлари;

– давлат бюджетидан қонунга мувофиқ ажратилган маблағлар;

– қонун ҳужжатларига мувофиқ тадбиркорлик фаолиятидан олинган даромадлар;

– амалдаги қонунларга зид бўлмаган бошқа тушумлар.

Ҳар йили партиялар ҳисобига келиб тушган маблағларнинг асосий қисмини айнан мамлакат бюджетидан ажратилган пуллар ташкил қилади. Масалан, 2020 йилда ЎзЛиДеП  ҳисоб рақамига тушган пулларнинг 84 фоизи,  ЎзМТДП га тушган маблағларнинг 90 фоизи,  ЎзХДП маблағининг 52 фоизини  бюджетдан ажратилган пуллар ташкил қилади. 

Шунингдек, 2021 йил президентлик сайлови ўтказилгани сабабли бюджетдан жами 300 миллиард сўм, ҳар бир номзод учун эса 3 миллиард сўмдан ажратилган.

Олий Мажлис Қонунчилик палатасининг расмий сайтида  депутатлар сиёсий партияларнинг 2021 йилдаги фаолиятини молиялаштириш манбалари тўғрисидаги ҳисоботларини эшитишгани ҳақидаги хабарда эса аниқ рақамлар келтирилмаган. 

Бироқ эълон қилинган хабарда сиёсий партияларнинг маблағларни сарфлаш ва уларга доир ҳисоботлар шаффоф ҳамда очиқ бўлиши лозимлиги ҳақида сўз боради. Шунингдек, Олий Мажлис Қонунчилик палатаси сиёсий партияларнинг жамият ҳаётидаги роли сезиларли даражада ошганини, уларнинг жойларда аҳолини ўйлантириб келаётган муаммоларни ўрганиш ва ҳал этиш борасидаги ишлари фаоллашгани, электорат билан ишлаш тубдан ўзгарганини ҳам қўшимча қилган. Хўш, шундай фаолият олиб борилар экан нега унда одамлар уларни танимаяпти?

 

@rost24_uz_bot — Хабар йўлланг. Сизнинг хоҳишингизга кўра ҳар қандай маълумот сир сақланади
12
Изоҳ қолдириш
Изоҳлар
21.04.2022 03:26
И. Каримов айтганидек ким пул берса ўшани ноғорасига уйнайди... Ҳукуматни танқид қилмайдиган партияни кераги йуқ.
21.04.2022 03:24
И. Каримов айтганидек ким пул берса ўшани ноғорасига уйнайди...
20.04.2022 17:10
Аслини олганда бу боқиманда партиялар ва вадабоз депутатларни кераги йўқ Майли расмиятчилик учун 2 та партия қолсин лекигин у хам ўзини бадалини хисобига фаолиятини давом этирсин Депутатлар сайловгача халқни йолгон вадалар беради Сайловдан кейин умуман сайловчилари билан учрашмайди 100 та дан - 20 таси қолса бўлади Шуларга берилайотган миллиардларни халқ манфати учун ишлатилса Масалан газ электр энергия йўлларни таъмирлаш
20.04.2022 13:12
Халкимизга хечкандай ёрдами йу́к партиялар. Эссиз буларга берилаётган халк пули! Шунча пулни нимага ишлатишди экан. Буларни ру́йхатидаги ку́п азолари хам парти азоси эканлигини билмайди. Бу партияларни Судга бериб бюджет пулни кайтариб олиш керак. Бу партияларни бюджет хисобидан яшаши Конституцияни 58 моддасига зид. Кониституцон суд нега бу борада жим.
20.04.2022 13:05
Халкимизга хечкандай ёрдами йу́к партиялар. Эссиз буларга берилаётган халк пули! Шунча пулни нимага ишлатишди экан. Буларни ру́йхатидаги ку́п азолари хам парти азоси эканлигини билмайди. Бу партияларни Судга бериб бюджет пулни кайтариб олиш керак.
18.04.2022 13:57
Ўз Лидепни раисини жуда яхши таниймиз. У киши фермерлар кенгаши раиси ҳам ҳисобланадилар. Кўп гўшт емасдан фермерларни ҳам тингланг
18.04.2022 13:51
Мени фикримча партиялар партия аьзолари бадали эвазига яшаши керак. Яни айтайлик ишчи-дехкон партияси булсин, бу партия купрок бадал йигиш учун шу катлам одамларни хукукларини жонини бериб химоя килган буларди. Окибатида аьзолари хам купайган булар эди. Амалдачи халкни соликларидан тушган пулни дачаларда еб етишибди. Лекин бир-бир куриниш бериб куйишади. Аьзолик баталии эвазига яшайдиган булса кугирчок партиялар йук булади ва хакикий халк Дарьи билан яшайдиган партиялар юзага келади.
17.04.2022 17:35
Ўзбекистон Конститутициясида 58-моддасида."Давлат органлари ва мансабдор шахсларнинг жамоат бирлашмалари фаолиятига аралашишига, шунингдек жамоат бирлашмаларининг давлат органлари ва мансабдор шахслар фаолиятига аралашишига йўл қўйилмайди."дейилган. Партияларнинг бюджеттан молиялаштирилишини давлат органларининг жамоат бирлашмаси фаолиятига тўғридан-тўғри аралашиши деб биламан. Собиқ СССР даврида Компартия ўзининг аъзоларининг бадаллари хисобига фаолият кўрсатган, шунинг учун партия аъзолари халқнинг ичида фаол иш олиб боганлар.
17.04.2022 16:06
2партия етади биттаси мухолиф булса 5та текинтамоқ нимага керак