Hokimlarning tungi majlislari haqida ko`p xabarlar berilardi. Toshkent shahar hokimi Jahongir Ortiqxo`jaev yangi amaliyot kiritibdi. Endi dam olish kuni yarim tunda xalq bilan muloqot o`tkazish hokimlarga urf bo`lmasa bo`lgani. Bu hokimning kecha-yu kunduz ishlayotganidan darakku nimasi yomon, dersiz. Yarim tundagi uchrashuvlar rahbar uchun qulaydir, lekin, oilasi bag`rida dam olish kunlarini o`tkazishni rejalashtirgan xodimlar va tunda bezovta bo`lishiga to`g`ri kelgan xalq uchun bu noqulayliklar uyg`otgan bo`lishi ehtimoldan holi emas.
Gap shundaki, 2 aprel kuni soat 23.30 dan boshlab Jahongir Ortiqxo`jaev poytaxt hokimi sifatida Toshkent shahridagi tumanlarga borib, aholi bilan uchrashdi.
Butun tun davomida bir qancha tumanlarga borib, fuqarolar bilan uchrashib, muammolar bilan tanishgan hokimga ko`plab xodimlar ham hamrohlik qilishgan. Hokimlik telegram kanaliga qo`yilgan axborotlarda birinchi suratni olingan vaqti 23.35 bo`lsa, uchrashuvlarning so`nggi surati tonggi 3.33 da olinganini ko`rish mumkin. Bugun 3 aprel kuni yana uchrashuvlar davom etgan bo`lib,Toshkent shahar hokimi Jahongir Ortiqxo`jaev hokim o`rinbosari va sektorlar rahbarlari bilan Shayxontohur tumanidagi «Uchlola» mahallasida o`rganish ishlarini olib bordi. Shundan so`ng esa yana xalq bilan muloqotlar davom etgan.
 |  |
Sizningcha bu to`g`rimi?
Xodimlarning ish vaqtidan tashqari, tuni bilan hokimga hamrohlik qilishi, fuqarolarning uchrashuvga chiqarilishi qanchalik zarurat edi va bu mehnat qonunchiligimizga zid emasmi?
Avvalroq Reuters nashrida chiqqan maqolada O`zbekistonda davlat xizmatchilari kuniga 15 soatdan va dam olish kunisiz uzoq yillar ishlayotganligi, natijada ularda kuchli charchoq va stress borligi, o`zbek amaldorlari uchrashuvlar paytida uxlab qolishlari haqida yozilgan, «33 million aholiga ega sobiq sovet respublikasida hukumat ishchilari orasida uzoq vaqt mobaynida shakllangan an`ana bor – ular o`z boshliqlari ketmagunga qadar ofisni tark eta olishmaydi», – deya xabar berilgan edi.
Shuningdek, mazkur maqolada prezident Shavkat Mirziyoev tizimdagi ana shu charchoqni tushungani uchun ham 2019 yil sentyabrida davlat xizmatchilariga shanba kunlari soat 17:00 da ish joyini tark etish va yakshanbani oila a`zolari bilan o`tkazish bo`yicha topshiriq berganini eslab o`tilgan.
Jahongir Ortiqxo`jaev mazkur topshiriqni unutganmi yoki bu topshiriq allaqachon bekor qilinganmidi? Yo`qsa, davlat qonunchiligining kafolati bo`lishi lozim bo`lgan amaldor xodimlarini shanba va yakshanba kunlari tuni bilan olib yurib, bir nechtalab yig`ilishlar o`tkazishi matbuotda ishchanlik ramzi sifatida faxr bilan e`lon qilinmagan bo`larmidi?
Qolaversa, 2020 yilda Vazirlar Mahkamasi farmoyishi bilan vazirliklar, idoralar va boshqa davlat tashkilotlariga mehnat qonunlari va ishchilarning mehnat huquqlariga qat`iy rioya qilish buyurilgandi. Bu farmoyish o`z kuchini yo`qotganmi?
Aytgancha, bizda Davlat mehnat inspeksiyasi degan tashkilot bo`lib u ish vaqtidan tashqari va dam olish kunlari xodimlarni ishga jalb qilish bo`yicha mehnat qonunlariga rioya etilishini nazorat qilishi kerak.
УЗ
-middle.jpg)
