O`zbekiston sayohat qilish uchun eng yaxshi davlatlar o`ntaligida, ammo hojatxonalar hamon muammoli, ular kam, borlari ham pulli

Buyuk Britaniyaning mashhur «The Independent» internet-nashri 2022 yilda sayohat qilish uchun eng yaxshi joylar o`ntaligini e`lon qilgan, reyting sayohatchilarning tavsiyalari asosida tuzilgan bo`lib, bu ro`yxatga Normand orollari, Shimoliy Irlandiya, Kanada, Ispaniya, Italiya, Turkiya, Misr, Butan va O`zbekiston kiritilgan edi.

Sayohatchilar oqimidan katta daromad ko`radigan ushbu davlatlar reytingida O`zbekistonni ham ko`rish quvonarli albatta. Ammo biz katta ko`lamdagi sayohatchilarni qabul qilishga tayyormizmi? Sayohatchilar chindan ham O`zbekistonga sayohat qilishni tanlashadimi?

Yuqorida keltirilgan maqolada muharrir Xelen Koffi O`zbekistonga alohida e`tibor qaratib, mamlakat Ipak yo`lining markazida joylashganini, O`zbekiston bir necha yil avval Buyuk Britaniya pasporti egalari uchun viza talabini bekor qilgani va Britaniya fuqarolari mamlakatda 30 kungacha vizasiz qolishi mumkinligi ta`kidlagan.

Shuningdek, maqolada O`zbekistonga borishni rejalashtirgan sayohatchilarga 2022 yilda o`tkaziladigan xalqaro festival va boshqa yirik madaniy tadbirlar ro`yxati berilgan.

Ammo, shu paytgacha tashrif buyurgan ko`plab sayyohlarning O`zbekistondagi notekis yo`llar, pulli hojatxonalar yoki umuman topilmaydigan, topilsa ham talabga javob bermaydigan hojatxonalar haqidagi e`tirozlariga qaramasdan, ularni hal qilish yuzasidan hamon jiddiy qadamlar qo`yilmadi.

Jumladan, sayyohlarni jalb etuvchi ijtimoiy roliklar suratga olish, namoyish qilish, targ`ibot masalasi ham ko`ngildagidek emas. Ijtimoiy tarmoqlarda xorijliklarning ko`p hollarda O`zbekiston haqida deyarli tasavvurga ega emasliklariga duch kelamiz, buning asosiy sababi nimada?

Xorijlik ijtimoiy tarmoq foydalanuvchilarini O`zbekiston haqidagi ba`zi fikrlarini eshitsangiz, bizda turizm rivojiga to`siq bo`layotgan qanday muammolar borligi yaqqol namoyon bo`ladi.

- O`zbekiston haqida faqatgina bundan ikki yil oldin, universitetda o`zbek talabasidan eshitganman. Eshitishimcha, O`zbekiston yozda juda issiq, qishda juda sovuq mamlakat ekan. To`g`risi, bundan keyin ushbu mamlakat haqida hech qanday ma`lumotlarga ko`zim tushmadi. Shuning uchun ham u erga sayohat qilishni hali o`ylab ko`rmagan ekanman, - deydi 30 yoshlardagi Britaniya fuqarosi bo`lgan Muhammad Imran.

-Bundan ikki yilcha oldin, Xitoyga ish bo`yicha sayohat qilishimga to`g`ri kelgan edi. Imkoniyatdan foydalanib Buyuk Ipak yo`li mamlakatlaridan biri -O`zbekistonga sayohat qilish istagi tug`ildi. Viza olish jarayonlarini o`rganib chiqqanimdan keyin bormaslikka qaror qildim,-deydi norvegiyalik 50 yoshlik Mehmet.

- Sayohatchilarga tavsiyam, O`zbekistonga qovug`ingizni kengroq qilib keling - jamoatchilik uchun qurilgan hojatxonalar dunyodagi eng yomoni bo`lib, pashsha va chivinlarga to`lgan. Ular qurilgan kunidan beri tozalanmagan ko`rinadi, - Mixal Danziger, sayyoh va rejissyor.

2018 yilda Shvesiyaning Danfo shirkatiga O`zbekistonda jamoat hojatxonalari tizimini tashkil etish taklif qilingan edi, 2021 yilda esa Singapurda joylashgan "World Toilet Organization" - WTO (Butunjahon hojatxona tashkiloti) O`zbekistonda sammit o`tkazishni taklif qildi.

Ammo, bildirilayotgan turli e`tirozlar, sayyohlarning turli hududlarda hojatxonalar topilmasligi haqidagi fikrlari, yoki «Hojatxona ham pulli bo`ladimi?»degan hayratlariga, hukumatning turizmni rivojlantirish, sayyohlarni ko`proq jalb qilish haqidagi ko`plab qaror va farmonlariga qaramasdan, bu boradagi aytarli biror o`zgarishlarga duch kelmadik.

Turizm va sport vazirligi O`zbekistonda 2020 yil 1 sentyabrdan boshlab talab darajasidagi sanitariya-gigiena xonalari bo`lmagan yoqilg`i va gaz quyish shoxobchalarining faoliyat ko`rsatishiga yo`l qo`ymasligi e`lon qilgan edi. Lekin, ularni talabga javob berish-bermasligi o`rganilmadi shekilli, biron hisobotlarda aks etmadi. 

Yaqinda “Toshkent metropoliteni” mutasaddilari ham vanihoyat odamlarning hojatxonaga ehtiyojini eslab qolgan shekilli “Chilonzor” metro bekatida tajriba tariqasida hojatxona qurish ishlari olib borilayotgani haqida xabar berildi. Xabarda agarda bu o`zini oqlasa boshqa bekatlarda ham amalda tatbiq etilishi ko`zda tutilgani aytilgan. 

2018 yilda O`zbekiston bo`ylab avtonom hojatxonalar o`rnatilayotgani tahorat xonalari, imkoniyati cheklanganlar uchun alohida xonalar bo`lishi haqida loyiha taqdim etilgandi. Uning natijalarini ham bilmaymiz.

Mutasaddilar O`zbekistonda turizmni rivojlantirish, sayyohlar uchun qulay imkoniyatlar yaratish va shu asosda yanada ko`proq sayyohlarni jalb qilishga muammo sifatida qarayotganiga ishonch bildirgan holda, qandaydir harakat qilish uchun alohida puxta tayyorgarlik ko`rilayotganiga umid qilamiz.